సాక్షి, చెన్నై: చెన్నై మహానగర పాలకమండలి సమావేశం మంగళవారం ఉద్రిక్తతకు దారి తీసింది. అన్నాడీఎంకే, డీఎంకే కౌన్సిలర్లు తన్నుకున్నారు. ప్రతిపక్ష నేతపై అధికారపక్ష సభ్యుల దాడితో ఈ వివాదం రే గింది. అన్నాడీఎంకే, డీఎంకే సభ్యులు పరస్పరం ఆందోళనకు దిగడంతో సమావేశ మందిరం పరిసరాల్లో ఉద్రిక్తత నెలకొంది. చెన్నై కార్పొరేషన్ పాలక మండలి సమావేశం రిప్పన్ బిల్డింగ్‌లో మధ్యాహ్నం జరిగింది. మేయర్ సైదై దురై స్వామి అధ్యక్షతన, కమిషనర్ విక్రమ్ కపూర్ నేతృత్వంలో సమావేశం ఆరంభం కాగానే, ఉద్వేగ భరిత వాతారణం నెలకొంది. తమ అధినేత్రి జయలలిత జైలుకు వెళ్లడంతో, నిరసన వ్యక్తం చేస్తూ అన్నాడీఎంకే కౌన్సిలర్లు నల్ల చొక్కాలు, నల్ల బ్యాడ్జీలతో సభకు హాజరయ్యారు. జయలలిత చిత్ర పటాల్ని చేత బట్టి తీవ్ర ఆవేదన వ్యక్తం చేస్తూ సభా మందిరంలో తమకు కేటాయించిన సీట్లలో ఆశీనులయ్యారు. సభ ఆరంభం కాగానే, మేయర్ దురై స్వామి ప్రసంగం అందుకున్నారు.
  
  ప్రసంగం: జయలలితకు విధించిన జైలు శిక్షను ఖండిస్తూ, ఆమెకు ఎదురైన కష్టాన్ని గుర్తు చేసుకుంటూ ఉద్వేగంగా ప్రసంగాన్ని అందుకున్నారు. అమ్మ జపంతో ప్రసంగం సాగుతుండగానే, డీఎంకే అధినేత ఎం కరుణానిధికి వ్యతిరేకంగా మేయర్ వ్యాఖ్యలు చేశారు. దీంతో డీఎంకే సభ్యులు తీవ్ర అభ్యంతరం వ్యక్తం చేశారు. డీఎంకే కార్పొరేషన్ పక్ష నేత, ప్రతిపక్ష నేత సుభాష్ చంద్ర బోస్ జోక్యం చేసుకుని తమ అధినేతపై మేయర్ వ్యాఖ్యల్ని తీవ్రంగా ఖండించారు.  దీంతో అన్నాడీఎంకే మహిళా సభ్యురాలు, వెంటనే మరి కొందరు సభ్యులు ఆయనపై దాడికి యత్నించారు. ఇద్దరు మహిళా ఎమ్మెల్యేలు సుభాష్ చంద్రబోస్‌పై దాడి చేసినట్టు సంకేతాలు వెలువడుతున్నాయి. తమ నేత మీద దాడితో డీఎంకే కౌన్సిలర్లు ప్రతిఘటించే యత్నం చేశారు. దీంతో పరిస్థితి అదుపు తప్పింది. అన్నాడీఎంకే మహిళా కౌన్సిలర్లు మరింతగా రెచ్చి పోయారు. డీఎంకే కౌన్సిలర్ల వైపుగా దూసుకొచ్చారు. పరిస్థితి అదుపు తప్పడంతో మేయర్ కట్టడి చేయడానికి యత్నించారు. పరస్పరం దాడికి దిగడంతో సభలో అరుపులు కేకలతో గందరగోళ వాతావరణం నెలకొంది. పరస్పరం తోసుకుంటూ ఉద్రిక్త వాతావరణాన్ని సృష్టించారు. చివరకు  తమ మీద దాడిని ఖండిస్తూ, డీఎంకే సభ్యులు సభా మందిరం నుంచి బయటకు వచ్చేశారు.
  
  పరస్పరం ఆందోళన: వెలుపలికి వచ్చిన డీఎంకే సభ్యులు ప్రవేశ మార్గంలో బైఠాయించిన నిరసన తెలియజేశారు. ఈ సమయంలో అన్నాడీఎంకే సభ్యులు సైతం సభ నుంచి బయటకు వచ్చి పోటీగా ఆందోళనకు దిగారు. దీంతో డీఎంకే సభ్యులు అక్కడి నుంచి కాస్త దూరంగా వచ్చేశారు. ప్రవేశ మార్గం వద్ద బైఠాయించిన అన్నాడీఎంకే సభ్యులు డీఎంకే అధినేత కరుణానిధి, బీజేపీ నేత సుబ్రమణ్య స్వామిలకు వ్యతిరేకంగా నినాదాల్ని హోరెత్తించారు. చివరకు మేయర్ రంగంలోకి దిగి తమ పార్టీ సభ్యుల్ని బుజ్జగించి లోనికి ఆహ్వానించారు. డీఎంకే సభ్యులు సభ ప్రాంగణం నుంచి బయటకు వెళ్లడంతో సభా మందిరంలోకి అన్నాడీఎంకే సభ్యులు వెళ్లారు. అనంతరం సభలో జయలలితకు విధించిన శిక్షణ వ్యతిరేకిస్తూ తీర్మానాలు చేశారు. ఆమెకు ఎదురైన కష్టాన్ని తలచుకుని ఉద్వేగానికి లోనయ్యారు.  
  


  పెరంబూర్‌కు చెందిన వైఎస్ జగన్‌మోహన్‌రెడ్డి అభిమానులు ఎయిర్‌పోర్టులో ఐదు వేల సీమ టపాకాయలను కాల్చడానికి ప్రయత్నించగా, పోలీసులు అభ్యంతరం చెప్పడంతో వాహనాల అవుట్‌గేట్ వద్ద కాల్చి అభిమానం చాటుకున్నారు.
  మిక్కీమౌస్ మాస్కులు ధరించిన ఐసీఎఫ్‌కు చెందిన అభిమానులు చిత్ర విచిత్ర నృత్యాలతో సందర్శకులకు కనువిందు చేశారు.
  జగన్‌మోహన్‌రెడ్డి ఢిల్లీ-హైదరాబాద్-చెన్నై-దుబాయ్ ట్రాన్సిట్ అంతర్జాతీయ విమానంలో ఇంటర్నేషనల్ టెర్మినల్‌లో దిగారు.
  పెరంబూరుకు చెందిన జగన్ అభిమానులు సందర్శకులకు వైఎస్సార్ సీపీ సింబల్ కల్గిన టోపీలను ఉచితంగా పంపిణీ చేశారు.
  ఐసీఎఫ్‌కు చెందిన జగన్ అభిమానులు జగన్ మోహన్‌రెడ్డి ముఖంను పోలిన మాస్కులను ధరించి జగన్ ఒంటరి వ్యక్తి కాదని ప్రజాసమూహ శక్తి అని చాటారు.
  సైదాపేట ప్రాంతంలో ఆగవల్సిన జగన్ కాన్వాయ్ ట్రాఫిక్ సమస్యల కారణంగా ఆగకుండా ముందుకు సాగింది.
  ఎయిర్‌పోర్టులో నగరంలోని పలు ప్రాంతాల నుంచి వచ్చిన మహిళలు జై జగనన్నా ప్లకార్డులు ధరించి 15 నిమిషాల సేపు జగన్‌కు జయజయధ్వానాలు పలికారు.
  ఎరైవల్ గేటు నుంచి జగన్ బయటకు రాగానే అభిమానులు ఎయిర్‌పోర్టులోని రైయిలింగులు ఎక్కి, కొత్తగా నిర్మించిన బ్రిడ్జి కమ్మీల మీద ఎక్కి నుంచుకొని ఈలలు, చప్పట్లతో ఎయిర్‌పోర్టును హోరెత్తించారు.
  ఇంకా ఐదు నిమిషాల్లో జగన్ కాన్వాయ్‌లోని టయోటా లాండ్ క్రూజర్ వాహనంలో ఎక్కుతారనగా సెక్యూరిటీ బలగాలు నల్లరంగు లాబ్రెడార్ జాతికి చెందిన పోలీసు జాగిలాలతో కారును మొత్తం పరీక్షించారు.
  ప్రతి ప్రాంతంలోనూ తమిళనాడు ట్రాఫిక్, పోలీసు విభాగానికి చెందిన అధికారులు జగన్ కాన్వాయ్ సాఫీగా సాగేందుకు ఎంతగానో సహకరించారు.
  ఆళ్వారుపేట నుంచి..
  ఆళ్వారుపేట బంధుగృహాన్ని సమీపిస్తున్న జగన్ కాన్వాయ్‌కు వైఎస్సార్‌సీపీ టీ షర్టులు ధరించిన జగన్ అభిమానులు జయ జయధ్వానాలు చేస్తూ స్వాగతం పలికారు.
  వైఎస్సార్ సీపీ నేత జగన్‌మోహన్‌రెడ్డి బస చేసే గృహానికి సమీపించగానే కేరళ సంప్రదాయానికి చెందిన ప్రచండ మేళాన్ని కొందరు కేరళవాసులు ప్రదర్శించారు. జగన్‌మోహన్‌రెడ్డి వారి నైపుణ్యాన్ని చూసి మెచ్చుకోలుగా వారివంక చూశారు.
  తిరువళ్లూరు నుంచి 300 మంది జగన్ అభిమానులు మినీ బస్సుల్లో ఎయిర్‌పోర్టుకు వచ్చి ఆయన కాన్వాయ్‌ను ఆళ్వారుపేట వరకూ అనుసరించారు.
  ఎయిర్‌పోర్టు నుంచి జగన్‌కు నిర్దేశించిన బస గృహం కేవలం 5 కిలో మీటర్ల దూరంలో ఉన్నా అభిమానులు అడుగడుగునా అడ్డు తగులుతూ రావడంతో కాన్వాయ్ గమ్యం చేరడానికి 2 గంటలు పట్టింది.