TV
మాతాశిశు మరణాలు నియంత్రించాలి
కై లాస్‌నగర్‌: మాతాశిశు మరణాలు నియంత్రించేలా ప్రత్యేక చర్యలు చేపట్టాలని కలెక్టర్‌ రాజర్షి షా అన్నారు. కలెక్టరేట్‌ సమావేశ మందిరంలో జిల్లాలోని పీహెచ్‌సీ వైద్యులతో శుక్రవారం సమీక్ష నిర్వహించారు. ఈ సందర్భంగా కలెక్టర్‌ మాట్లాడుతూ, హైరిస్క్‌ కేసులను గుర్తించి మెరుగైన చికిత్స కోసం రిమ్స్‌కు తరలించాలన్నారు. వైద్యుల సూచన మేరకు బీపీ, షుగర్‌, స్కానింగ్‌, ఇతర వైద్య పరీక్షలు సమయానుసారం నిర్వహించాలన్నారు. గర్భిణుల ఆరోగ్య పరిస్థితిపై ఆశాలు, ఏఎన్‌ఎంలు నిరంతరం పర్యవేక్షించాలన్నారు. రిమ్స్‌, బోథ్‌, ఉట్నూర్‌ ఆసుపత్రుల్లో ఎనీమియా రోగుల సౌకర్యార్థం ఎఫ్‌సీఎం ఇంజక్షన్‌ అందుబాటులో ఉంచాలన్నారు. మారుమూల ప్రాంతాల్లోని గ్రామాల రోడ్లు బాగా లేవని అంబులెన్స్‌ సిబ్బంది, ఆశాలు తెలియజేయగా రోడ్డుకు సంబంధించిన మరమ్మతులు పూర్తి చేయాలని సంబంధిత అధికారులను ఆదేశించారు. డెలివరీ అనంతరం కుటుంబ నియంత్రణ చికిత్సపై అవగాహన కల్పించి, ఆపరేషన్లు నిర్వహించాలన్నారు. ఇందులో ఐటీడీఏ పీవో యువరాజ్‌ మర్మాట్‌, శిక్షణ కలెక్టర్‌ సలోని చాబ్రా, డీఎంహెచ్‌వో నరేందర్‌ రాథోడ్‌, రిమ్స్‌ డైరెక్టర్‌ జైసింగ్‌ రాథోడ్‌, వైద్యులు, ఏఎన్‌ఎం, ఆశాలు, 108 సిబ్బంది తదితరులు పాల్గొన్నారు.
