అక్రమ నిర్మాణాలు కూల్చివేత

కైలాస్‌నగర్‌: పట్టణంలోని భుక్తాపూర్‌కాలనీలో రోడ్డును ఆక్రమించి చేపట్టిన నాలుగు మడిగెల నిర్మాణాలను మున్సిపల్‌ అధికారులు శుక్రవారం కూల్చివేశారు. కమిషనర్‌ సీవీఎన్‌. రాజు, టౌన్‌ప్లానింగ్‌ అధికారి సుమలత, టీపీఎస్‌ నవీన్‌కుమార్‌లు మున్సిపల్‌ సిబ్బందితో కలిసి అక్కడికి చేరుకున్నారు. మడిగెల్లోని సామగ్రిని తొలిగించాలని దుకాణదారులకు సూచించారు. వారు సామగ్రిని తీసిన వెంటనే పొక్లెయిన్‌తో షటర్లతో పాటు నిర్మాణాలను పాక్షికంగా తొలగించేశారు. భవిష్యత్తులో ఎలాంటి అక్రమ నిర్మాణాలు చేపట్టవద్దని కమిషనర్‌ స్పష్టం చేశారు. పట్టణానికి చెందిన కుంచెమ్‌ వీరేందర్‌ రోడ్డును ఆక్రమించి నాలుగు మడిగెలు నిర్మించారని తెలిపారు. దీనిపై గంధం మోహన్‌ అనే వ్యాపారి కోర్టును ఆశ్రయించారని పేర్కొన్నారు. 2015 నుంచి దీనిపై కోర్టులో కేసు నడుస్తుందన్నారు. విచారణలో భాగంగా ఈ మడిగెలను కూల్చివేయాలని హైకోర్టు సూచించిందని, న్యాయస్థానం ఆదేశాల మేరకు చర్యలు తీసుకున్నామని వివరించారు. డిసెంబర్‌ 1న దీనిపై తుది విచారణ ఉందని, కోర్టుకు ఆధారాలు సమర్పించేందు కోసమే కూల్చివేసినట్లుగా ఆయన తెలిపారు. ఇందులో టీపీబీవో సాయికృష్ణ తదితరులున్నారు.