ఎంబీ పత్రాలనే చించేశారు!

ఎంబీ పత్రాలనే చించేశారు!

సాక్షి, ఆదిలాబాద్‌: ఎంబీ రికార్డు.. మెజర్‌మెంట్‌ బుక్‌.. ఇదీ నిర్మాణ, ఇంజినీరింగ్‌లో కీలకమైన పత్రం. అన్ని పనికొలతలు, పరిమాణాల అధికారిక రికార్డుగా పనిచేస్తుంది. కాంట్రాక్టర్‌ చెల్లింపులు, ఆడిట్లు, చట్టపరమైన సాక్ష్యాలకు ఆధారం. పని ప్రదేశం మొదలుకుంటే కాంట్రాక్టర్‌ పేరు, ప్రారంభ, పూర్తయిన తేదీ వంటి వివరాలుంటాయి. ప్రభుత్వ శాఖల్లో ఈ ఎంబీ రికార్డే అన్నింటికి ప్రామాణికం. అలాంటి ఎంబీ రికార్డు పత్రాలను చించేశారు. ఆదిలాబాద్‌ మున్సిపాలిటీలో జరిగిన ఈ వ్యవహారం రెండు రోజులుగా దుమారం రేపుతోంది. ట్రాక్టర్ల కొనుగోలులో జరిగిన అక్రమాలకు సంబంధించి ఓ అధికారి రికవరీ కోసం సూచిస్తూ జతచేసిన ఎంబీ పత్రాలను కాంట్రాక్టర్‌కు అనువుగా మరో ఉన్నతాధికారి ప్రోద్బలంతో తొలగించినట్లుగా చెప్పుకుంటున్నారు.

ట్రాక్టర్ల కొనుగోలులో అక్రమాలు

ఆదిలాబాద్‌ మున్సిపల్‌ పరిధిలో ఈ ఏడాది మొదట్లో చెత్త సేకరణ కోసం మూడు ట్రాక్టర్లను కొనుగోలు చేశారు. డీఈగా ఉన్న ఓ అధికారి ఇన్‌చార్జి ఎంఈగా కూడా ఆ సమయంలో వ్యవహరించారు. మెజర్‌మెంట్‌ తీసుకుని ఆ ట్రాక్టర్లను ఓ షోరూం నుంచి కొనుగోలు చేశారు. ఈ వ్యవహారం జరిగిన తర్వాత ఆ అధికారి బదిలీపై వెళ్లారు. మరో అధికారి ఇక్కడ బాధ్యతలు స్వీకరించారు. అయితే ఆ ట్రాక్టర్ల కొనుగోలుకు సంబంధించి అక్రమాలు చోటు చేసుకున్నాయని ఆయన గుర్తించారు. తక్కువ ధర కొటేషన్లు కాదని అసలు ధర కంటే ఎక్కువ కొటేషన్ల ద్వారా కొనుగోలు చేసినట్లు నిర్ధారించారు. బిల్లుల చెల్లింపులో ఈ అధిక మొత్తాన్ని రికవరీ చేయాలని ఆయన మెజర్‌మెంట్‌ బుక్‌లోని పత్రాల్లో నమోదు చేశారు. ఈ ప్రకారం ఆ రికవరీ జరిగి మిగతా బిల్లులు కాంట్రాక్టర్‌కు చెల్లించేలా వ్యవహారం సాగాలి. అయితే ఇక్కడే మొత్తం తారుమారైంది. ఆ అధికారి నమోదు చేసిన ఎంబీ పత్రాలను చించివేసి అదే బుక్‌లోని తదుపరి నంబర్లలో ఉన్న ఖాళీ పత్రాలను దానికి జతచేసినట్లుగా చెప్పుకుంటున్నారు.

రూ.లక్షల్లో అవినీతి..

మున్సిపాలిటీలో మూడు ట్రాక్టర్లను కొనుగోలు చే శారు. వాస్తవంగా షోరూం ధర రూ.7.48లక్షలు ఉండగా అధికారులు రూ.8.70 లక్షలు చూయించ డం ద్వారా చేతివాటం ప్రదర్శించారని ప్రచారం సా గుతుంది. ఒక్కో ట్రాక్టర్‌లో రూ.92 వేల చొప్పున మూడు ట్రాక్టర్లకు కలిపి రూ. 2.76లక్షలు స్వాహా చేసినట్లు తెలుస్తోంది. ఈ సొమ్ము అధిక మొత్తం కాకపోయినప్పటికీ మున్సిపల్‌లో ఇలా ఎలాపడితే అలా ఎంబీ పత్రాలను చించడం ద్వారా ఇంకా ఎన్ని అక్రమాలు చేశారో అనే అనుమానాలు ఇప్పు డు వ్యక్తమవుతున్నాయి. దీనిపై ఉన్నతాధికారులు సమగ్ర విచారణ చేసి చర్యలు తీసుకోవాలనే డిమాండ్‌ పలువురి నుంచి వ్యక్తమవుతుంది.

చించలేదు

మెజర్‌మెంట్‌ బుక్‌ పత్రాలను చించివేశారనేది అవాస్తవం. అయినప్పటికీ దీనిపై విచారణ జరుపుతాం. ట్రాక్టర్ల కొనుగోలులో అధిక మొత్తం చెల్లించి అక్రమాలకు పాల్పడ్డారనే వ్యవహారంలోనూ దృష్టి సారిస్తాం. – సీవీఎన్‌.రాజు,

మున్సిపల్‌ కమిషనర్‌, ఆదిలాబాద్‌