చరిత్ర సృష్టించిన బంగ్లాదేశ్‌

source: X

బంగ్లాదేశ్‌ జట్టు ఆస్ట్రేలియా చేతిలో రెండో టెస్టులో ఇన్నింగ్స్‌ 51 పరుగుల తేడాతో చిత్తుగా ఓడినా చరిత్ర సృష్టించింది. తాజాగా విడుదలైన ఐసీసీ టెస్ట్ ర్యాంకింగ్స్‌లో ఆ జట్టు మూడు స్థానాలు ఎగబాకి ఆరో స్థానానికి చేరుకుంది.

ఇది బంగ్లాదేశ్ టెస్ట్ క్రికెట్ చరిత్రలోనే కీలక మైలురాయి. టెస్ట్ ర్యాంకింగ్స్‌లో తొలిసారి ఆ జట్టు 9వ స్థానాన్ని దాటి 6వ స్థానానికి చేరుకుంది. ప్రస్తుతం బంగ్లాదేశ్‌కు 78 రేటింగ్ పాయింట్లు ఉన్నాయి. ఆ జట్టు వెస్టిండీస్, పాకిస్తాన్, శ్రీలంకను వెనక్కి నెట్టి ఆరో స్థానాన్ని దక్కించుకుంది.

ఆస్ట్రేలియాతో రెండు టెస్టుల సిరీస్‌ను బంగ్లాదేశ్ 1-1తో డ్రా చేసుకుంది. తొలి టెస్టులో ఆస్ట్రేలియాపై చారిత్రాత్మక విజయాన్ని నమోదు చేసిన బంగ్లాదేశ్.. ఆస్ట్రేలియా గడ్డపై తమ తొలి టెస్ట్ విజయాన్ని అందుకున్న విషయం తెలిసిందే.

డార్విన్‌లో జరిగిన తొలి టెస్టులో బంగ్లాదేశ్ తొలుత ఆస్ట్రేలియాను 198 పరుగులకు ఆలౌట్ చేసింది. హసన్ మహ్ముద్ ఆరు వికెట్లతో చెలరేగాడు. అనంతరం బంగ్లాదేశ్ తొలి ఇన్నింగ్స్‌లో 426 పరుగులు చేసింది. తంజిద్ హసన్ తమీమ్ సెంచరీతో కీలక పాత్ర పోషించాడు. రెండో ఇన్నింగ్స్‌లో ఆస్ట్రేలియా 284 పరుగులకే ఆలౌట్ కావడంతో బంగ్లాదేశ్ 57 పరుగుల స్వల్ప లక్ష్యాన్ని కేవలం ఒక వికెట్ కోల్పోయి ఛేదించింది.

అయితే రెండో టెస్టులో ఆస్ట్రేలియా పూర్తి ఆధిపత్యం ప్రదర్శించింది. మిచెల్ స్టార్క్ 10 వికెట్లతో బంగ్లాదేశ్ బ్యాటింగ్‌ను కుప్పకూల్చాడు. తొలి ఇన్నింగ్స్‌లో 6/12తో విధ్వంసం సృష్టించిన స్టార్క్, రెండో ఇన్నింగ్స్‌లో 4/39 తీసుకున్నాడు.

గొప్ప ఘనత
బంగ్లాదేశ్ టెస్ట్ కెప్టెన్ నజ్ముల్ హొస్సేన్ శాంటో మాట్లాడుతూ ఆరో ర్యాంక్‌కు చేరడం చాలా గొప్ప ఘనత అని పేర్కొన్నాడు. అయితే రెండో టెస్టులో మెరుగైన క్రికెట్ ఆడితే మరింత సంతోషంగా ఉండేదని అన్నాడు.

ఆస్ట్రేలియాలో బంగ్లాదేశ్‌కు రెగ్యులర్‌గా ఆడే అవకాశం కల్పించాలని శాంటో కోరాడు. 23 ఏళ్ల తర్వాత బంగ్లాదేశ్ తొలిసారి ఆస్ట్రేలియాలో టెస్ట్ సిరీస్ ఆడింది.

90 శాతం మంది ఆటగాళ్లకు ఇక్కడ ఆడిన అనుభవం లేదు. ఇలాంటి పరిస్థితుల్లో ఎలా బ్యాటింగ్ చేయాలి, బౌలింగ్‌ను ఎలా ఎదుర్కోవాలి అనేది వారికి తెలియదు. 23 లేదా 25 ఏళ్లకు ఒకసారి కాకుండా తరచుగా ఇక్కడ ఆడాలి అని శాంటో అభిప్రాయపడ్డాడు.

ఆస్ట్రేలియాలో బంగ్లాదేశ్‌ ఇతర ఫార్మాట్లలోనూ ఆడటం చాలా అరుదు. ఆ జట్టు చివరిసారిగా 2008లో ఆస్ట్రేలియాలో వన్డే సిరీస్ ఆడింది. ఆ జట్టు ఆస్ట్రేలియాలో ఇప్పటివరకు ఒక్క టీ20 సిరీస్ కూడా ఆడలేదు.