కాంగ్రెస్ ఆధ్వర్యంలోని ఇండి కూటమి అధికారంలోకి వస్తే అయోధ్యలోని శ్రీరాముడు మళ్లీ టెంట్ కిందకు వస్తాడు.. ఆలయంపై బుల్డోజర్ పంపుతారు.. ఇది దేశ ప్రధాని నరేంద్ర మోదీ చేసిన ఒక వ్యాఖ్య. పార్లమెంటు ఎన్నికల ప్రచారం సందర్భంగా మోదీ ఇంత మాట ఎలా అన్నారో అర్దం కాదు. ఈ మాట విన్నప్పుడు ఒక్కసారిగా దేశ ప్రజలంతా ఆశ్చర్యం చెందారు. మోదీనేనా ఇలా మాట్లాడుతుంది.. అని అంతా విస్తుపోయారు. దాంతో మోదీ ఈసారి ఎందుకో తడబడుతున్నారన్న భావన ఏర్పడింది. గత రెండు ఎన్నికలలో మోదీ ఇంత ఘోరంగా మాట్లాడారన్న విమర్శలు రాలేదు. ఈ ఒక్కటే కాదు. కాంగ్రెస్ గెలిస్తే పాకిస్తాన్ సంతోషిస్తుందని, ముస్లింలను అప్పీజ్ చేస్తోందని, ముస్లింలకు రిజర్వేషన్‌లు రద్దు చేస్తామని ఇలాంటి అనేక వివాదాస్పద వ్యాఖ్యలు చేశారు.⇒ అంటే ఈ విమర్శల ద్వారా హిందూ ఓట్ల పోలరైజేషన్‌కు మోదీ, ఆయనతో పాటు కేంద్ర హోం మంత్రి అమిత్ షా లు ప్రయత్నించారు. ఇక్కడ కూడా వారు డబుల్ గేమ్ ఆడారు. తెలంగాణ ఎన్నికల ప్రచారంలో ముస్లింలకు ఉన్న నాలుగు శాతం రిజర్వేషన్లను రద్దు చేస్తామని ప్రకటించారు. గతంలో కర్నాటకలో కూడా అలాగే చేశారు. అయినా అక్కడ ప్రభుత్వాన్ని నిలబెటుకోలేకపోయారు. తెలంగాణలో ఆ పాయింట్ పైన కూడా గట్టి ఉపన్యాసాలు చేశారు. కానీ ఏపీకి వెళ్లేసరికి అక్కడ మళ్లీ టీడీపీ, జనసేనల కూటమితో కలిసి ఉండడంతో, ముస్లిం రిజర్వేషన్ల గురించి ప్రసంగాలలో ప్రస్తావించకపోవడం కూడా అందరూ గమనించారు.⇒ 2014 ఎన్నికల సమయంలో గుజరాత్ ముఖ్యమంత్రిగా నరేంద్ర మోదీ ఉన్నారు. ఆయన వ్యూహాత్మకంగా దేశం అంతటా గుజరాత్‌లో జరిగిన అబివృద్ది అంటూ టీవీలలో, పత్రికలలో పెద్ద ఎత్తున ప్రచారం చేసుకున్నారు. తద్వారా ఒక ఇమేజీని తెచ్చుకున్నారు. నిజానికి అప్పటికి ఆయన బీజేపీ ప్రధాని అభ్యర్దిగా కూడా నిర్ణయం కాలేదు. కానీ తన ప్రచార వ్యూహం ద్వారా బీజేపీని కూడా ఆయన ప్రభావితం చేయగలిగారు. దేశ ప్రజలంతా మోదీ అంటే అభివృద్ది అని నమ్మారు. గుజరాత్‌లో ఆయన బాగా చేశారన్న భావన బాగా బలపడింది. ఆ రోజుల్లో టీవీలలో ఎవరైనా వ్యతిరేకంగా మాట్లాడితే వెంటనే జనం నుంచి నిరసన వచ్చేది. నేను లైవ్ షో చేస్తున్నప్పుడు సైతం ఈ అనుభవం చూశాను. ఎక్కడైనా మోదీని ఒక్క మాట అంటే జనం ఊరుకునేవారుకారు. అలాంటిది దశాబ్దం తర్వాత మోదీని లైవ్ షోలలో ఫోన్ చేసి ప్రజలే విమర్శిస్తున్నారు.⇒ అంతమాత్రాన ఆయనపై పూర్తి వ్యతిరేకత ఏర్పడిందని కాదు. కానీ ఒక నేత ఎలా ఉండాలని అనుకుంటారో ఆయన అలా లేరన్న భావన పెరుగుతోందన్నమాట. ప్రత్యేకించి రామాలయంపై బుల్డోజర్‌ నడుపుతారన్న ఆయన ఆరోపణను ఎవరూ జీర్ణించుకోలేదు. ఆయనను సమర్ధించేవారు సైతం మోదీ అలాంటి విమర్శ చేసి ఉండాల్సింది కాదనే అనుకుంటున్నారు. ప్రధాని మోదీ వెయ్యి, ఐదు వందల రూపాయల నోట్లు రద్దు చేసి, రెండువేల రూపాయల నోట్లు తెచ్చినప్పుడు చాలామందికి అంత ఇష్టం లేదు. దానివల్ల సామాన్యులు చాలా కష్టపడ్డారు. అయినా మోదీ చిత్తశుద్దిని జనం శంకించలేదు. దేశం కోసం, నల్లధనం నిర్మూలనకోసమే ఆయన ఇలా చేసి ఉండవచ్చులే అని సర్దుకున్నారు.⇒ జీఎస్‌టీ వంటివాటిపై కూడా భిన్నాభిప్రాయాలు ఏర్పడ్డా ఎవరూ పెద్దగా పట్టించుకోలేదు. కానీ అప్పట్లో బీజేపీ గెలవదన్న అంచనాకు వచ్చిన సీనియర్ నేత చంద్రబాబు నాయుడు వంటివారు బీజేపీ ఆధ్వర్యంలోని ఎన్‌డీఏ కూటమి నుంచి వైదొలిగారు. ఆ తరుణంలో జరిగిన పుల్వమా ఘటనతో దేశం మూడ్ మారిపోయింది. పాక్ ఉగ్రవాదులు మన సైనికులు ఉన్న బస్‌ను పేల్చడంతో, మోదీ ధైర్యంగా పాక్ ఆక్రమిత కాశ్మీర్‌కు వైమానిక దళాన్ని పంపించి ఉగ్రవాద శిబిరాలను ద్వంసం చేయించారు. అప్పుడు ఇండియా పైలట్ ఒకరు పాక్‌కు పట్టుబడగా, జాగ్రత్తగా హాండిల్ చేసి ఆయనను భద్రంగా ఇండియాకు తీసుకు రాగలిగారు. దాంతో మోదీపై విశ్వాసం పెరిగింది. మళ్లీ మోదీ వేవ్ వీచి ఎన్‌డీఏ కేంద్రంలో అధికారంలోకి రాగలిగింది.⇒ 2019 ఎన్నికల సమయంలో టీడీపీ అధినేత చంద్రబాబు నాయుడు ప్రధాని మోదీని టెర్రరిస్తు అని విమర్శించారు. భార్యను ఏలుకోలేని వ్యక్తి దేశాన్ని ఏమి ఏలతారని అన్నారు, ముస్లింలను బతకనివ్వరని, మంచివాడు కాదని.. అవినీతిపరుడని.. ఇలా ఏవేవో పిచ్చి విమర్శలు చేశారు. దానికి ప్రతిగా చంద్రబాబు అవినీతి పరుడని, పోలవరం ప్రాజెక్టును ఏటీఎమ్ మాదిరి వాడుకున్నారని మోదీ ధ్వజమెత్తారు. లోకేష్ తండ్రి అంటూ చాలా వ్యంగ్యంగా చంద్రబాబు సీనియారిటీపై విమర్శనాస్త్రాలు సంధించారు. కానీ 2024 నాటికి చంద్రబాబు ఆధ్వర్యంలోని టీడీపీతో జతకట్టడం ప్రజలందరిని ఆశ్చర్యపరిచింది. మోదీ ఎంతో వ్యక్తిత్వం, ఆత్మ గౌరవం ఉన్న నేత అని భావిస్తున్న సపోర్టర్లకు ఆయన షాక్ ఇచ్చారని చెప్పాలి.⇒ అలాగే టెర్రరిస్టు అన్న నోటితోనే చంద్రబాబు నాయుడు విశ్వగురు అంటూ మోదీని పొగిడారు. మరి వీళ్లిద్దరూ గతంలో దూషించుకున్న విషయాలను నమ్మిన ప్రజలు ఏమైపోవాలి. వీరు మారితే ప్రజలంతా మారిపోవాలా? అన్న చర్చ జరిగింది. దేశ ప్రధాని అయిన తర్వాత రాజకీయ నేతగా కాకుండా రాజనీతిజ్ఞుడుగా మారాలని అంతా ఆశిస్తారు. గతంలో చేసిన పలువురు ప్రధాన మంత్రులు చాలావరకు అలాగే వ్యవహరించారు. ప్రతిదానిలోను రాజకీయం చూడలేదు. రాజకీయ ప్రత్యర్ధులపై విమర్శలు చేసినా చాలా హుందాగా ఉండేవి. వ్యక్తిగత ఆరోపణలకు చాలా తక్కువ ప్రాధాన్యత ఇచ్చేవారు. కానీ మోదీ రాష్ట్రస్థాయి నాయకులతో పోటీపడినట్లుగా, ఏ రాష్ట్రానికి వెళితే అక్కడ వారిపై వ్యక్తిగత ఆరోపణలు చేయడానికి వెనుకాడలేదు.⇒ ఇక్కడ ఇంకో సంగతి చెప్పాలి. అవినీతిపరులను జైలులోనే ఉంచుతామని తాజాగా ఆయన చేసిన ప్రకటనను కూడా జనం సీరియస్‌గా తీసుకోవడం లేదు. డిల్లీ లిక్కర్ స్కామ్ అంటూ ఒకదానిని తీసుకుని ఆప్ ముఖ్యమంత్రి అరవింద్ కేజ్రీవాల్ ను, ఆయన మంత్రులు కొందరిని జైలులో పెట్టి కక్ష తీర్చుకుంటున్నారన్న విమర్శ వచ్చింది. అదే టైమ్‌లో వేల కోట్ల రూపాయల బ్యాంకు రుణాలను ఎగవేసిన వారిని, వందల కోట్ల మోసాలు చేసినవారిని బీజేపీలో చేర్చుకుని వారికి ఏకంగా ఎమ్మెల్యే, ఎంపీ టిక్కెట్లు ఇచ్చి, వారికోసం ప్రచారానికి స్వయంగా వెళుతున్న వైనం తీవ్ర విమర్శలకు గురి అవుతోంది. నిజంగా మోదీకి అవినీతిని అంతం చేయాలన్న చిత్తశుద్ది ఉందా అన్న సందేహం కలుగుతుంది.⇒ గతంలో రఫేల్ యుద్ధ విమానాల కొనుగోళ్లలో పలు ఆరోపణలు వచ్చినా జనం పట్టించుకోలేదు. కానీ మతం పేరుతో బీజేపీ రాజకీయం చేస్తున్నదన్న భావన ప్రజలలో ప్రబలితే అది వారికి తీవ్ర నష్టం కలిగిస్తుంది. అసలు మోదీ బుల్డోజర్ విమర్శలు చేయగానే అందరికి గుర్తుకు వచ్చింది యూపీ ముఖ్యమంత్రి యోగి బుల్డోజర్ తోనే ప్రభుత్వం నడిపారన్న వ్యాఖ్య ఉంది. రౌడీ షీటర్లు, అల్లర్లకు పాల్పడిన వారిని చట్టం ప్రకారం శిక్షించడం కాకుండా బుల్డోజర్‌లతో వారి ఇళ్లు కూల్పించారు. ఇప్పుడు ఆరోపణ మోదీ కాంగ్రెస్ పై చేస్తున్నారు. అంతేకాదు, అయోధ్యలో వివాదాస్పద బాబ్రి మసీదును కూల్చింది కూడా బీజేపీనే అన్న సంగతి తెలిసిందే. అప్పటి నుంచి మత రాజకీయాలు చేయడంలో బీజేపీదే అగ్రస్థానంగా ఉందన్నది వాస్తవం. అయినా మోదీ కాంగ్రెస్‌పై మతపరమైన ఆరోపణలు చేస్తుంటారు. అలా అని కాంగ్రెస్ ఏదో పత్తిత్తు అనడం లేదు.⇒ తెలంగాణలో ఆర్ఆర్‌టాక్స్ అంటూ మోదీ విమర్శలు చేశారు. బాగానే ఉంది. మరి గతంలో ఏపీలో ఎన్నికల ప్రచారంలో చంద్రబాబును అవినీతిపరుడని విమర్శించారు కదా.. ఇప్పుడు ఎలా కలిశారంటే అందుకు జవాబుదొరకదు. చంద్రబాబు పీఎస్ ఇంటిలో సోదాలు జరిపి రెండువేల కోట్ల అక్రమాలు కనుగొన్నట్లు కేంద్రం ప్రకటన చేసింది కదా.. అదేమైంది అని ఎవరైనా అడిగితే బదులు ఉండదు. చంద్రబాబుకు ఆదాయపన్ను శాఖ నోటీసులు ఇచ్చిన విషయంలో ఏమి తేల్చారో ఎవరూ చెప్పరు. మహారాష్ట్రలో మాజీ ముఖ్యమంత్రి అశోక్ చవాన్ కాంగ్రెస్‌లో ఉన్నప్పుడు పలు ఆరోపణలు చేసిన బీజేపీ, ఆయన తమ పార్టీలో చేరగానే రాజ్యసభ సీటు ఇచ్చి మరీ ఆదరించింది. దీనిని ఏ విధంగా చూడాలి. ఇలా అన్నిటిలొను డబుల్ గేమ్ ఆడుతున్న నేతలలో మోదీ చేరడం ఆయనను అభిమానించేవారికి కాస్త బాధ కలిగించే విషయమే కదా!⇒ మరో విషయం మాట్లాడుకోవాలి. ఒకవైపు బీజేపీ ఉచితాలకు వ్యతిరేకం అని ప్రచారం చేస్తారు. ఇంకోవైపు ఆయా రాష్ట్రాలలో రకరకాల ఉచిత వాగ్దానాలు చేస్తుంటారు. ఉదాహరణకు ఒడిషాలో శాసనసభ ఎన్నికలలో ప్రతి మహిళకు ఏభైవేల రూపాయల ఓచర్ ఇస్తామని బీజేపీ ఎన్నికల ప్రణాళికలో పెట్టిందట. ఈశాన్య రాష్ట్రాలలో క్రైస్తవులు అధికంగా ఉంటారు కనుక అక్కడ ఉచితంగా జెరుసలెం యాత్రకు హామీ ఇస్తుంటారు.ఏపీలో టీడీపీ, జనసేనలు ప్రకటించిన మానిఫెస్టోతో తమకు సంబంధం లేదని చెబుతారు. అదే టైమ్ లో వారి మానిఫెస్టోకి మద్దతు ఇస్తున్నామని అంటారు. దీని అర్ధం ఏమిటో ఎవరికి తెలియదు. బీజేపీలో ఇతర పార్టీ అభ్యర్ధులను తీసుకుని టిక్కెట్లు ఇస్తుంటారు. దేశ వ్యాప్తంగా 108 మంది ఫిరాయింపుదారులకు బీజేపీ టిక్కెట్లు ఇచ్చిందని లెక్కలు చెబుతున్నాయి. అంటే మొత్తం అభ్యర్ధులలో నాలుగో వంతు ఇతర పార్టీలకు చెందినవారే అన్నమాట.⇒ అంతదాకా ఎందుకు ఏపీలో ఆరుగురు అభ్యర్ధులలో ఐదుగురు వేరే పార్టీల నుంచి వచ్చి చేరినవారే. వారిలో కొందరు టీడీపీ కోవర్టులుగా ముద్రపడ్డవారు. తెలంగాణలో సైతం పదిమందికి పైగానే ఫిరాయింపుదారులకు బీజేపీ టిక్కెట్లు ఇచ్చింది. ఇలాంటి పరిస‍్థితిలో గతంలో కాంగ్రెస్ పార్టీ తీరుకు, ఇప్పుడు బీజేపీ తీరుకు పెద్ద తేడా ఉన్నట్లు అనిపించదు. ఇందిరాగాంధీ ఎమర్జన్సీ పెట్టి ప్రతిపక్ష నేతలను జైళ్లలో పెట్టారు. ఇప్పుడు ఎమర్జన్సీ లేకుండానే ఏదో కేసులో పెట్టి తమకు గిట్టనివారిని జైలుకు పంపుతున్నారన్న విమర్శలను మోదీ ఎదుర్కుంటున్నారు. అదే టైమ్‌లో బీజేపీలో చేరగానే కేసులు ఏవీ ముందుకు వెళ్లకుండా ఆగిపోతున్నాయన్న బావన ఏర్పడింది. అందుకే ఆయా రాష్ట్రాలలో కొంతమంది తాము ఎన్ని అవినీతి పనులు చేసినా బీజేపీ గొడుగు కిందకు చేరి రక్షణ పొందుతున్నారన్న అబిప్రాయం వ్యాపిస్తోంది.⇒ ఇది మోదీ ప్రభుత్వానికి మంచిది కాదు. ఇలాంటి కారణాల వల్లే ఈసారి బీజేపీకి పూర్తి మెజార్టీ వస్తుందా? రాదా? అన్న చర్చ జరుగుతోంది. ఎన్‌డీఏకి 400 సీట్లు వస్తాయని ప్రధాని మోదీతోపాటు బీజేపీ నేతలు పలువురు చెబుతున్నా, అదంతా మేకపోతు గాంభీర్యంగానే కనిపిస్తుంది. అయినప్పటికీ మోదీ వంటి పెద్ద నేత తన ప్రసంగాలలో సంయమనంగా ఉంటేనే మంచిది. దానివల్ల దేశ రాజకీయాలు కొంత ఆరోగ్యకరంగా సాగడానికి అవకాశం ఉంటుంది. విశేషమేమిటంటే శ్రీరాముడిని సొంతం చేసుకుని రాజకీయాలు సాగించాలన్న వ్యూహంలో ఉన్న బీజేపీ రామాలయం ఉన్న అయోధ్యలోనే తీవ్రమైన పోటీ ఎదుర్కుంటోందట.– కొమ్మినేని శ్రీనివాసరావు, సీనియర్‌ పాత్రికేయలు

నగరంపాలెం(గుంటూరు వెస్ట్‌): జిల్లాలో సార్వత్రిక ఎన్నికల ఈవీఎంలు భద్రపరిచిన ఆచార్య నాగార్జున యూనివర్సిటీ (ఏఎన్‌యూ), పరిసరాల్లో పటిష్ట పోలీస్‌ బందోబస్తు ఏర్పాటు చేసినట్లు ఎస్పీ తుషార్‌ డూడీ ఆదివారం ఒక ప్రకటనలో తెలిపారు. సమస్యాత్మక గ్రామాలు, ప్రధాన కూడళ్లలో పోలీసు పికెట్‌ ఏర్పాటు చేశామని చెప్పారు. అదనపు బలగాలతో పహారా కొనసాగుతోందని వెల్లడించారు. కౌంటింగ్‌ అనంతరం జిల్లాలో ఊరేగింపులు, విజయోత్సవ ర్యాలీలకు అనుమతి లేదని స్పష్టం చేశారు. ఎవరైనా శాంతిభద్రతలకు విఘాతం కలిగిస్తే చట్టపరమైన చర్యలు తప్పవని హెచ్చరించారు. జిల్లాలోని ప్రతి పోలీస్‌స్టేషన్‌ పరిధిలో ఉన్న పెట్రోల్‌ బంక్‌ నిర్వాహకులు పెట్రోల్‌, డీజిల్‌ను బాటిళ్లలో విక్రయించరాదని ఆదేశించారు. ఎవరైనా నిబంధనలు అతిక్రమిస్తే చట్టప్రకారం చర్యలు ఉంటాయని హెచ్చరించారు. బాణసంచా నిల్వ చేసే కేంద్రాల్లోనూ పోలీస్‌, అగ్నిమాపక శాఖ సమన్వయంతో విస్తృత తనిఖీలు చేపట్టాలని ఆదేశించారు. ఎన్నికల కోడ్‌, సెక్షన్‌ 144, 30 పోలీస్‌ చట్టం అమల్లో ఉందని స్పష్టం చేశారు. ఎక్కడా నలుగురు కంటే ఎక్కువ మంది ఉండొద్దని చెప్పారు. బహిరంగ సభలు, సమావేశాలు, ర్యాలీలు నిర్వహించరాదని సూచించారు. ఉద్దేశపూర్వకంగా ప్రత్యర్థి పార్టీల అభ్యర్థులను, కార్యకర్తలను రెచ్చగొట్టేలా మాట్లాడటం, సోషల్‌ మీడియాలో తప్పుడు సమాచారం/వదంతులు ప్రచారం చేయడం చట్ట రీత్యా నేరమని, రెచ్చగొట్టేలా ప్రవర్తించిన వారిపైనా కఠిన చర్యలు ఉంటాయని వెల్లడించారు. బహిరంగ ప్రదేశాల్లో మద్యం తాగితే కేసులు నమోదు చేస్తామని హెచ్చరించారు. యువత బైకులకు సైలెన్సర్లను తొలగించి, ఎక్కువ శబ్దంతో నడిపినా కేసులు తప్పవని స్పష్టం చేశారు. శాంతి భద్రతల పరిరక్షణలో జిల్లా పోలీసులకు సహకరించాలని ఎస్పీ కోరారు. సమస్యాత్మక గ్రామాల్లో పోలీస్‌ పికెట్‌ ఎన్నికల కోడ్‌, 144 సెక్షన్‌, 30 పోలీస్‌ యాక్ట్‌ అమలు అభ్యర్థులు, పార్టీల కార్యకర్తలు రెచ్చగొట్టే వ్యాఖ్యలు చేయరాదు ఎస్పీ తుషార్‌ డూడీ స్పష్టీకరణ

నెహ్రూనగర్‌(గుంటూరు ఈస్ట్‌): నగరపాలక సంస్థలో 2022లో కాంట్రాక్టర్‌కు చెల్లించాల్సిన బిల్లులను తన బినామీ ఖాతాలకు మళ్లించి సస్పెండ్‌ అయిన అకౌంటెంట్‌ సిరిల్‌పాల్‌పై ప్రభుత్వం సమగ్ర విచారణకు ఆదేశించింది. 2020లో ఓ కాంట్రాక్టర్‌ చేసిన అభివృద్ధి పనులకు చెక్కులు తయారు చేసిన అకౌంట్‌ సెక్షన్‌ ఆ చెక్కులను పలు బినామీ ఖాతాలకు మళ్లించింది. ఈ విషయం 2022 నవంబర్‌లో బయటకు పొక్కింది. దీనిపై విచారణ చేపట్టిన కమిషనర్‌ కీర్తి చేకూరి రూ.అర కోటి వరకు దారి మళ్లించారని తేలడంతో అప్పట్లో అకౌంటెంట్‌గా పనిచేసిన సిరిల్‌పాల్‌ను సస్పెండ్‌ చేయడంతో అతనిపై సైబర్‌ క్రైమ్‌ నేరంగా లాలాపేట పోలీస్‌ స్టేషన్‌లో కేసు నమోదు చేయించారు. ఇంకా దీనిపై పూర్తి విచారణ చేసి ఎంత మొత్తంలో అవినీతి జరిగిందో లెక్క తేల్చడానికి స్టేట్‌ ఆడిట్‌ డిపార్ట్‌మెంట్‌ వారికీ అప్పట్లో కమిషనర్‌ కీర్తి చేకూరి లేఖ రాశారు. ఈ నేపథ్యంలో ఇప్పటి వరకు సిరిల్‌పాల్‌పై చర్యలు లేకపోవడంతో ఓ వ్యక్తి ఏప్రిల్‌ 26న ప్రభుత్వానికి అన్ని ఆధారాలతో ఫిర్యాదు చేశాడు. దీంతో సిరిల్‌పాల్‌పై సమగ్ర విచారణ చేపట్టి పూర్తి వివరాలతో నివేదిక అందించాలని ఇటీవల మున్సిపల్‌ అడ్మినిస్ట్రేషన్‌ అండ్‌ అర్బన్‌ డెవలప్‌మెంట్‌ డిపార్ట్‌మెంట్‌ అదనపు కార్యదర్శి ఎం.ప్రతాప్‌రెడ్డి సీడీఎంఏ(కమిషనర్‌ అండ్‌ డైరెక్టర్‌ ఆఫ్‌ మున్సిపల్‌ అడ్మినిస్ట్రేషన్‌)ని ఆదేశించారు. మరి కొద్ది రోజుల్లో ఈ విషయంపై సీడీఎంఏ విచారణ చేపట్టి ప్రభుత్వానికి నివేదిక అందించనున్నారు. నగరపాలక సంస్థలో రూ.అరకోటి దారి మళ్లింపు వ్యవహారంలో కీలకమలుపు గతంలోనే సిరిల్‌ని సస్పెండ్‌ చేసి,కేసు నమోదు చేసిన నగర కమిషనర్‌ తాజాగా ఓ వ్యక్తి ఫిర్యాదుతో ప్రభుత్వం చర్యలు విచారణాధికారిగా సీడీఎంఏ నియమించాలని ఆదేశం

నగరంపాలెం(గుంటూరు వెస్ట్‌): గుంటూరు బ్రాడీపేటలోని జిల్లా జైలును జిల్లా జడ్జి వై.వి.ఎస్‌.జి.పార్థసారథి, జిల్లా న్యాయ సేవాధికార సంస్థ కార్యదర్శి టి.లీలావతి ఆదివారం సందర్శించారు. ఈ క్రమంలో వంటశాల, రేషన్‌ స్టోర్‌, ఖైదీలు భుజించేందుకు సిద్ధమైన ఆహారాన్ని పరిశీలించారు. ప్రతి ఖైదీతోనూ మాట్లాడారు. వారికి అందుతున్న న్యాయ సహాయం, ఇతర మౌలిక సౌకర్యాల గురించి అడిగి తెలుసుకున్నారు. గతంలో చేసిన తప్పును మళ్లీ చేయవద్దని, ప్రతి ఒక్కరూ సత్ప్రవర్తనతో జీవించాలని చెప్పారు. జైలు అధికారులు సరైన ప్రమాణాలను ఆచరిస్తూ ఖైదీల హక్కులను కాపాడుతున్నారని సంతృప్తి వ్యక్తం చేశారు. జైలు నిర్వహణలో అధికార, సిబ్బంది కృషిని ప్రశంసించారు. జిల్లా జైలు సూపరింటెండెంట్‌ కె.రఘు, జైలర్‌ సీహెచ్‌.కిరణ్‌, డిప్యూటీ జైలర్‌ ఎ.కల్యాణ్‌బాబు తదితరులు పాల్గొన్నారు. శతాధిక వృద్ధురాలు మృతి కాకుమాను: పెదనందిపాడు మండలం ఉప్పలపాడు గ్రామానికి చెందిన శతాధిక వృద్ధురాలు బిళ్లా మరియమ్మ(106)ఆదివారం వేకువజామున అనారోగ్య కారణంతో మృతి చెందారు. మృతురాలికి నలుగురు కుమార్తెలు, ఇద్దరు కుమారులు ఉన్నారు. ఆమెకు మనుమలు, మనుమరాళ్లు, ముని మనుమలు కలిపి మొత్తం 40 మంది సంతానం ఉన్నారు. ఆకట్టుకున్న కూచిపూడి నృత్య ప్రదర్శన నగరంపాలెం: స్థానిక బృందావన్‌ గార్డెన్స్‌ వేంకటేశ్వరస్వామి దేవాలయం అన్నమయ్య కళావేదికపై జానకి వల్లభ నృత్య కళాకేంద్రం (వెలగపూడి) నాట్యాచారిణి అలేఖ్య శిష్య బృందం ఆదివారం కూచిపూడి నృత్య ప్రదర్శన చేపట్టింది. ఆలయ సహాయ కార్యదర్శి ఊటుకూరి నాగేశ్వరరరావు, నూతలపాటి తిరుపతయ్య జ్యోతిప్రజ్వలనతో ప్రదర్శనను ప్రారంభించారు. తొలుత మూషిక వాహనతో ప్రారంభమై, ఏకదంతాయా, ముకుంద ముకుంద, కొండలలో నెలకొన్న, బ్రహ్మ మొక్కటే, పలుకే బంగారమాయేరా అంటూ పలు అన్నమయ్య కీర్తనలకు చక్కగా నృత్యప్రదర్శన చేశారు. ప్రేక్షకులను అలరించారు. ఎ.బి.బ్రహ్మాజి కార్యక్రమాన్ని నిర్వహించగా, అనంతరం దేవాలయ పాలకవర్గం నాట్యాచారిణి అలేఖ్య శిష్యబృందాన్ని సత్కరించి, స్వామి వారి తీర్థప్రసాదాలను అందించారు. పెళ్లి కుమారుడిగా రంగనాథుడు యడ్లపాడు: మండలంలోని సోలస గ్రామంలోని భూ సమేత రంగనాయక స్వామి ఆలయంలో కల్యాణ మహోత్సవాలు ఆదివారం ప్రారంభమయ్యాయి. ఈ సందర్భంగా దేవతామూర్తులకు అభిషేకాలు చేసి మహిళలు ఆలయ ప్రాంగణంలో పసుపు కొట్టుడు కార్యక్రమాన్ని నిర్వహించారు అనంతరం వధూవరులకు పసుపు పూసి సుందరంగా తీర్చిదిద్దారు ఆలయ ప్రధాన అర్చకులు పరుచూరి రామకృష్ణచార్యులు నేతృత్వంలో ఆయా కార్యక్రమాలు నిర్వహించగా ధర్మకర్తలు అరవపల్లి మనోహర్‌ నాగలక్ష్మి దంపతులు ఏర్పాట్లను పర్యవేక్షించారు. పెనుగంచిప్రోలులో భక్తజన సందడి పెనుగంచిప్రోలు: గ్రామంలోని శ్రీ గోపయ్య సమేత లక్ష్మీ తిరుపతమ్మ ఆలయానికి ఆదివారం భక్తులు పోటెత్తారు. నల్గొండ, ఖమ్మం, సూర్యాపేట జిల్లాలతో పాటు స్థానికులు పెద్ద సంఖ్యలో దర్శించుకున్నారు. వచ్చే నెలలో పాఠశాలల ప్రారంభం, రైతులు వ్యవసాయ పనులు ప్రారంభమయ్యే అవకాశం ఉండడంతో భక్తులు మొక్కులు తీర్చుకుంటున్నారు. అమ్మవారి దర్శనానికి వచ్చే భక్తులకు ఇబ్బందులు లేకుండా ఆలయ పాలకవర్గ సభ్యులు ప్రత్యేక చర్యలు తీసుకున్నారు.

ఇంద్రకీలాద్రి(విజయవాడపశ్చిమ): ఇంద్రకీలాద్రిపై కొలువై ఉన్న దుర్గమ్మను ఆదివారం పెద్దసంఖ్యలో భక్తులు దర్శించుకున్నారు. తెల్లవారుజాము నుంచి ప్రారంభమైన భక్తుల రద్దీ సాయంత్రం వరకు ఏకరీతిన కొనసాగింది. భక్తుల రద్దీ నేపథ్యంలో సర్వ దర్శనానికి మూడు గంటల సమయం పట్టింది. మరోవైపు ఆది దంపతులకు నిర్వహించిన పలు ఆర్జితసేవల్లో ఉభయదాతలు విశేషంగా పాల్గొనగా, అమ్మవారిని దేవాదాయశాఖ కమిషనర్‌ సత్యనారాయణ దర్శించుకున్నారు. భారీసంఖ్యలో భక్తులు అమ్మవారిని దర్శించుకోగా వారికి ఎటువంటి ఇబ్బందులు కలుగకుండా దేవస్థాన అధికారులు తగుచర్యలు చేపట్టారు. రికార్డుస్థాయిలో ఆదివారం ఒక్కరోజే సుమారు 60 వేల మందికి పైగా భక్తులు అమ్మవారిని దర్శించుకున్నారని అధికారులు అంచనా వేస్తుండగా, దేవస్థానానికి రూ. 41లక్షల ఆదాయం సమకూరింది. కేవలం టికెట్ల విక్రయాల ద్వారానే రూ.21లక్షలకు పైగా ఆదాయం సమకూరింది. రూ.500 విలువగల వీఐపీ టికెట్లు 2,450, రూ.300 టికెట్లు 1,050, రూ.100 టికెట్లు 7050 విక్రయించారు. సర్వదర్శనం క్యూలైన్‌లో అమ్మవారి దర్శనానికి మూడు గంటలకు పైగా సమయం పట్టింది. ఉదయం ఘాట్‌రోడ్డు, మహా మండపం లిప్టు, మెట్లమార్గంలో క్యూలైన్లు కిటకిటలాడాయి. ఓ దశలో ఓం టర్నింగ్‌లోని రూ.300 టికెట్‌ కౌంటర్‌ వరకు సర్వదర్శనం క్యూలైన్‌ చేరింది. భక్తులకు ఇబ్బందులు లేకుండా అధికారులు చర్యలు చేపట్టారు.