ముంబయి: ప్రముఖ నటి, నటుడు ఐశ్వర్యరాయ్, అభిషేక్‌ బచ్చన్‌ను పలువురు బాలీవుడ్‌ ప్రముఖులు పరామర్శించారు. గత కొన్ని రోజులుగా ఆనారోగ్యంతో బాధపడుతున్న ఐశ్వర్య తండ్రి క్రిష్ణరాజ్ రాయ్ శనివారం ముంబైలోని ఓ ఆస్పత్రిలో కన్నుమూయడంతో తీవ్ర విషాదంలో మునిగిపోయిన వారిని పలువురు కలిసి ధైర్యం చెప్పారు. సూపర్‌స్టార్‌ షారుక్‌ఖాన్‌, దర్శకుడు సంజయ్‌ లీలా బన్సాలీ, అశుతోష్‌ గౌరీకర్‌, సోనాలీ బింద్రే తదితరులు ఐశ్వర్య తండ్రి క్రిష్ణరాజ్‌కు పూలతో శ్రద్ధాంజలి ఘటించారు.
 
 ఈ ఏడాది జనవరి నుంచి క్రిష్ణరాజ్ రాయ్ కేన్సర్ సమస్యలతో సతమతమయ్యారు. ఇటీవల తీవ్ర అస్వస్థతకు లోను కావడంతో ఆయనను ముంబైలోని లీలావతి ఆస్పత్రికి తరలించి చికిత్స అందించినా ఆయన శరీరం సహకరించక చనిపోయారు. శనివారం రాత్రి 8.30గంటల ప్రాంతంలో ముంబయిలోని విలే పర్లే సేవా సంస్థాన్‌ స్మశాన్‌ భూమిలో ఆయన అంత్యక్రియలు జరిగాయి. ఈ అంత్యక్రియలకు దాదాపు సగానికి పైగా బాలీవుడ్‌ తరలి వచ్చింది.
 (నటి ఐశ్వర్యరాయ్ తండ్రి మృతి)


 ముంబై: బాలీవుడ్ ప్రముఖ నటి ఐశ్వర్యరాయ్ కుటుంబంలో విషాదం నెలకొంది. గత కొన్ని రోజులుగా ఆనారోగ్యంతో బాధపడుతున్న ఆమె తండ్రి క్రిష్ణరాజ్ రాయ్ శనివారం ముంబైలోని ఓ ఆస్పత్రిలో కన్నుమూశారు. ఈ విషయాన్ని ఐశ్వర్య సన్నిహితులు జాతీయ మీడియాకు వెల్లడించారు. ఈ ఏడాది జనవరి నుంచి క్రిష్ణరాజ్ రాయ్ కేన్సర్ సమస్యలతో సతమతవుతున్నారు. ఇటీవల తీవ్ర అస్వస్థతకు లోను కావడంతో ఆయనను ముంబైలోని లీలావతి ఆస్పత్రికి తరలించి చికిత్స అందిస్తున్నారు. అనారోగ్యం నుంచి కొద్దిగా కోలుకున్నట్లు కనిపించినా పూర్తిస్థాయిలో చికిత్సకు ఆయన శరీరం సహకరించలేదు. ఈ క్రమంలో ఆయన తుదిశ్వాస విడిచారు.
 
 కొన్ని రోజుల కిందట తండ్రి అనారోగ్యం విషయాన్ని తెలుసుకున్న ఐశ్వర్యరాయ్ తన దుబాయ్ పర్యటనను రద్దు చేసుకుని.. ముంబైకి వచ్చి అక్కడే ఆస్పత్రిలో ఉంటూ తండ్రికి సేవలు చేశారు. న్యూయార్క్ లో ఉన్న ఐశ్వర్య భర్త, నటుడు అభిషేక్ బచ‍్చన్ కూడా ముంబైకి తిరిగొచ్చేసిన విషయం తెలిసిందే. క్రిష్ణరాజ్ రాయ్ ఆస్పత్రిలో ఉన్న సమయంలో అమితాబ్ బచ్చన్ దంపతులు పలుమార్లు ఆస్పత్రికి వెళ్లి ఐశ్వర్య తల్లి వృందారాయ్, సోదరుడు ఆదిత్యా రాయ్ ని కలిసొచ్చారు. అమితాబ్ శనివారం మరోసారి ఆస్పత్రికి వెళ్లి కోడలు ఐశ్వర్యను పరామర్శించినట్లు సమాచారం.