మిర్చి సాగు.. సంక్షోభం!

మిర్చి సాగు.. సంక్షోభం!

తానూరు: మిర్చి పంటకు గతంలో లాభాలు దక్కకపోవడం, సమీప మార్కెట్ల లోపం, దళారుల చేతిలో తక్కువ ధరలు వంటివి జిల్లా రైతులను పత్తి, సోయాబీన్‌, మొక్కజొన్న వైపు మళ్లించాయి. అధికారుల సలహాలు, సాంకేతిక మార్గదర్శకత్వం లేకపోవడం సమస్యను తీవ్రతరం చేసింది. ఈ ఏడాది భారీ వర్షాలు, తెగుళ్ల ప్రభావంతో పెట్టుబడులు కూడా ఆశించిన ఫలితం ఇవ్వకపోవడంతో రైతులు పత్తి సాగుపై ఆసక్తి చూపడం లేదు.

జిల్లా వివరాలు..

జిల్లాలో ఈ ఏడాది 500 ఎకరాల్లో పచ్చిమిర్చి, 200 ఎకరాల్లో ఎండుమిర్చి సాగు చేస్తున్నారు. తానూరు, ముధోల్‌, కుభీర్‌, సారంగాపూర్‌, కుంటాల, లోకేశ్వ రం, సోన్‌, లక్ష్మణ్‌చాంద, భైంసా మండలాల్లో ఒక్కో రైతు 1–2 ఎకరాల్లో మాత్రమే పంట వేశారు. గతేడాది ఎకరానికి 6–8 క్వింటాళ్ల దిగుబడి వచ్చింది. ఈసారి ఎకరాకు 5–6 క్వింటాళ్లు కూడా రాకపోవచ్చని అంచనా.

వాతావరణ ప్రభావం..

వానాకాలం ప్రారంభం నుంచి కురిసిన అధిక వర్షాలు తెగుళ్లను పెంచి, పంటలు ఎండిపోయేలా చేశా యి. మందులు పనిచేయకపోవడంతో రైతులు నిరాశలో మునిగారు. ఈ పరిస్థితి పెట్టుబడులను వృథా చేస్తోంది.

మార్కెట్‌, రవాణా ఇబ్బందులు

భైంసా మార్కెట్‌ కొనుగోళ్లు ఆగిపోవడంతో రైతులు మహారాష్ట్ర (ధర్మాబాద్‌, పర్భణి, పుణే, నాగపూర్‌), తెలంగాణ (ఖమ్మం) వరకు పంట తీసుకెళ్తున్నారు. క్వింటాల్‌కు రూ.1500 వరకు రవాణా, హమాలీ ఖర్చులు అవుతాయి. స్థానిక కొనుగోళ్లు, మార్కెట్ల ఏర్పాటు లేకపోవడం కూడా సాగు విస్తీర్ణం తగ్గడానికి కారణంగా తెలుస్తోంది. ప్రభుత్వం భైంసా, నిర్మల్‌ మార్కెట్లలో కొనుగోళ్లు ప్రారంభించి, గిట్టుబాటు ధర కల్పించాలని, అధికారుల సలహాలు ఇస్తే మిర్చి సాగు మళ్లీ పుంజుకుంటుందని రైతులు పేర్కొంటున్నారు.