పీఎంశ్రీ పాఠశాలల్లో చెలిమి

పీఎంశ్రీ పాఠశాలల్లో చెలిమి

లక్ష్మణచాంద: నేటి ఆధునిక ప్రపంచంలో విద్యార్థులు సంకుచిత మనస్తత్వంతో ఉంటున్నారు. కంప్యూటర్‌తో పోటీపడుతున్న నేటి యుగంలో విద్యార్థులు సున్నితమైన మనస్తత్వం కలిగి ఉంటున్నారు. చిన్నచిన్న విషయాలకు అనాలోచితంగా నిర్ణయాలు తీసుకుని తల్లిదండ్రులకు దుఃఖం మిగుల్చుతున్నారు. సోషల్‌ మీడియా ప్రభావం, పాఠశాలల్లో విద్యాపరమైన ఒత్తిళ్లు, తల్లిదండ్రులకు ఒకరు ఇద్దరు పిల్లలు కావడంతో వారు అఽతి గారాబం చేయడం వంటి కారణాలతో పిల్లలు సున్నిత మనస్కులుగా మారుతున్నారు. ఇలాంటివారిని గుర్తించి వారికి అవగాహన కల్పించి విద్యార్థుల ప్రవర్తనలో మార్పు తీసుకురావడానికి కేంద్ర ప్రభుత్వం చర్యలు చేపట్టింది. ఇందులో భాగంగా కేంద్ర విద్యా శాఖ ప్రధానమంత్రి స్కూల్స్‌ ఫర్‌ రైసింగ్‌ ఇండియా (పీఎంశ్రీ) పాఠశాలల్లో చెలిమి (సోషియో ఎమోషనల్‌ వెల్‌ బీయింగ్‌ ప్రోగాంకు శ్రీకారం చుడుతోంది.

ప్రతీ పాఠశాల ఉపాధ్యాయుడుకి శిక్షణ....

జిల్లాలోని 20 పీఎంశ్రీ పాఠశాలల్లో ప్రతీ పాఠశాలకు ఒక ఉపాధ్యాయుడిని నోడల్‌ ఉపాధ్యాయుడిగా ఎంపిక చేస్తున్నారు. ఇలా జిల్లాలో మొత్తం 20 మంది ఉపాధ్యాయులను నోడల్‌ ఉపాధ్యాయులుగా ఎంపిక చేస్తారు. వీరికి వచ్చే నెల(డిసెంబర్‌) 10–12 వరకు హైదరాబాద్‌లోని రాజేంద్రనగర్‌లో విద్యార్థుల మనస్తత్వం, ప్రవర్తన, కమ్యూనికేషన్‌ నైపుణ్యాలపై రాష్ట్ర స్థాయిలో ప్రత్యేక శిక్షణ ఇస్తారు. ఈ శిక్షణలో నేర్చుకున్న వివిధ అంశాలపై ఉపాధ్యాయులు పాఠశాలలకు వెళ్లిన తర్వాత మిగిలిన ఉపాధ్యాయులకు నేర్పించాల్సి ఉంటుంది. అనంతరం ఉపాధ్యాయ బృందం అంతా కలిసి విద్యార్థుల్లో భావోద్వేగాల నియంత్రణకు చర్యలు చేపడతారు. విద్యార్థుల్లో వచ్చే సమస్యలను ముందుగానే గుర్తించి వాటిని అర్థం చేసుకుని విద్యార్థుల మనసుకు బాధ కలగకుండా సమస్యలు పరిష్కరించి ఎదురయ్యే ఇబ్బందులు అధిగమించేలా విద్యార్థులను తయారు చేయనున్నారు.

ప్రయోజనాలు ఇవీ..

విద్యార్థులు ప్రధానంగా ఎదుర్కొంటున్న సమస్యల్లో వారి మానసిక పరివర్తన ప్రధానమైనది. ప్రతీ రోజు జరుగుతున్న వివిధ రకాల సంఘటనలతో కేంద్ర విద్యాశాఖ చెలిమి అనే కార్యక్రమం ద్వారా విద్యార్థులకు ఎంతో మేలుచేకూరుతుంది. కార్యక్రమాన్ని పకడ్బందీగా అమలు చేస్తే విద్యార్థులకు ప్రయోజనం చేకూరుతుందని విద్యారంగ నిపుణులు మానసిక వైద్య నిపుణులు పేర్కొంటున్నారు.

విడతల వారీగా శిక్షణ...

పీఎంశ్రీ పాఠశాలల నుంచి ఎంపిక చేసిన ఉపాధ్యాయులకు డిసెంబర్‌ 10–12 వరకు హైదరాబాద్‌లోని రాజేంద్రనగర్‌ తెలంగాణ గ్రామీణాభివృద్ధి సంస్థ (టీజీఐఆర్‌డీ)లో శిక్షణ ఇవ్వనున్నట్లు జిల్లా విద్యా శాఖ అధికారులు తెలిపారు. ఇప్పటికే జిల్లాలోని 20 పీఎంశ్రీ పాఠశాలలకు దీనిపై సమాచారం అందించారు. శిక్షణకు పంపే ఒక్కో ఉపాధ్యాయుడి వివరాలు పంపాలని సూచించినట్లు విద్యాశాఖ అధికారులు పేర్కొన్నారు.