కొంటారా.. కొనరా..?

కొంటారా.. కొనరా..?

కుంటాల: నైరుతిలో రుతుపవనాలు మురిపించడంతో జిల్లాలో సోయా రైతులు విత్తనాలు వేశారు. ఆపైన వర్షాల జాడ లేకపోవడంతో రెండోసారి విత్తారు. పూత, కాత దశకు చేరుకోగానే అధిక వర్షాలతో పంట దెబ్బతిని దిగుబడి తగ్గింది. ప్రస్తుతం చేతికి వచ్చిన పంట అమ్ముకునేందుకు రైతులు కష్టాలు పడుతున్నారు. జిల్లా వ్యాప్తంగా వానాకాలంలో 1.05 లక్షల ఎకరాల్లో రైతులు సోయా సాగు చేశారు.

నాణ్యత లేదని వాపస్‌..

జిల్లాలో రైతులు పండించిన పంట కొనేందుకు నాఫెడ్‌ , మార్క్‌ ఫేడ్‌, పీఏసీఎస్‌ ఆధ్వర్యంలో కొనుగోలు కేంద్రాలు ఏర్పాటు చేశారు. చన్నీ ప ట్టి, నాణ్యతను పరిశీలించి అధికారులు తూకం వేశారు. వీటిని నిజామాబాద్‌ జిల్లాలోని బోధన్‌ సీడబ్ల్యూసీ గోదాంకు తరలించారు. అక్కడ అధికారులు నాణ్యతలేమి పేరుతో లోకేశ్వరం మండలానికి చెందిన 195, కుంటాల మండలానికి చెందిన 2 వేలు, ముధోల్‌ మండలానికి చెందిన 850, తానూరు మండలానికి చెందిన 700 సోయా బస్తాలను తిప్పి పంపించారు.

ప్రైవేటు వ్యాపారులకు అమ్మకం..

జిల్లా వ్యాప్తంగా 8,42,653 క్వింటాళ్ల సోయా దిగుబడి వస్తుందని అంచనా వేసిన అధికారులు ఇప్పటివరకు 60 వేల క్వింటాళ్లు మాత్రమే కొనుగోలు చేశారు. బోధన్‌ నుంచి బస్తాలు తిరిగి రావడంతో పది రోజులుగా కొనుగోళ్లు నిలిచిపోయాయి. దీంతో రైతులు ప్రైవేట్‌ వ్యాపారులకు అమ్ముకోవాల్సి వస్తోంది. ప్రభుత్వం కొనుగోలు కేంద్రాల్లో క్వింటాల్‌ కు రూ.5,328 మద్దత ధర కల్పించగా, ప్రైవేట్‌ వ్యాపారులకు క్వింటాల్‌ కు రూ.4,500 విక్రయించాల్సిన పరిస్థితి వచ్చింది. దీంతో క్వింటాల్‌కు సుమారు రూ.వెయ్యి నష్టపోతున్నారు.

మంచి దిగుబడి వచ్చింది..

పది ఎకరాల్లో సోయా సాగు చేశా. 60 క్వింటాళ్ల దిగుబడి వచ్చింది. ప్రభుత్వం కొనుగోళ్లను నిలిపివేయడంతో ప్రైవేట్‌గా అమ్ముకున్న. క్వింటాల్‌ కు రూ.800 చొప్పున రూ.48 వేలు నష్టపోయా. – బల్లి హరీశ్‌, రైతు

రెండు నెలలుగా నిరీక్షణ..

వర్షాలతో పంట దిగుబడి తగ్గింది. తోటి రైతుల తూకం వేసిన బస్తాలు తిరిగివచ్చాయి. అప్పటి నుంచి కొనుగోళ్లు లేవు. పంట చేతికి వచ్చి రెండు నెలలైంది. ఇప్పటికీ అమ్ముకోవడానికి నిరీక్షిస్తున్నాం. – సీపతి ముత్యం, రైతు

త్వరలో కొనుగోళ్లు..

రైతులు పండించిన పంటకు ప్రభుత్వం మద్దతు ధర కల్పిస్తుంది. నాణ్యత పరిశీలించేందుకు ఇటీవల సర్వేయర్లు వచ్చారు. వారి నిర్ణయం తర్వాత రెండు, మూడు రోజుల్లో సోయా కొనుగోళ్లను చేపడతాం.

– మహేశ్‌కుమార్‌, మార్క్‌ఫెడ్‌ డీఎం