పల్లెల్లో ఎన్నికల సందడి

పల్లెల్లో ఎన్నికల సందడి

నిర్మల్‌చైన్‌గేట్‌: గ్రామపంచాయతీ ఎన్నికల రిజర్వేషన్ల కోసం రాష్ట్ర ప్రభుత్వం జీవో 46 శనివారం విడుదల చేసింది. ఎన్నికల్లో సర్పంచ్‌, వార్డు సభ్యుల రిజర్వేషన్ల విధివిధానాలు ఖరారు చేయగా, రిజర్వేషన్లు 50 శాతానికి మించకూడదని స్పష్టం చేసింది. ఎస్సీ, ఎస్టీ, బీసీ, మహిళ రిజర్వేషన్లను రొటేషన్‌ విధానంలో అమలు చేసేందుకు మార్గదర్శకాలు వెల్లడించింది. వందశాతం ఎస్టీలున్న గ్రామాల్లో అన్నిస్థానాలు ఎస్టీలకే ప్రత్యేకంగా కేటాయిస్తారు. వార్డు సభ్యులకు 2024 కుల సర్వే, సర్పంచ్‌ స్థానాలకు 2011 జనాభా లెక్క లేదా 2024 కుల గణన ఆధారంగా రిజర్వేషన్లు ఖరారు చేశారు.

సిద్ధమవుతున్న

యంత్రాంగం

హైకోర్టు అభ్యంతరాల నేపథ్యంలో రిజర్వేషన్ల ప్రక్రియను మొదటి నుంచి పునఃప్రారంభించారు. ఓటరు జాబితా సవరణ, పోలింగ్‌ కేంద్రాల గుర్తింపు, ఎన్నికల సామగ్రి మీద అధికార యంత్రాంగం కసరత్తు ప్రారంభించింది. సెప్టెంబర్‌ 2న విడుదల చేసిన ఓటరు జాబితా ప్రకారం జిల్లాలో 4,49,302 ఓటర్లు, 892 పోలింగ్‌ స్టేషన్లు ఉన్నాయి. వచ్చిన అభ్యంతరాలు, ఫిర్యాదులను పరిష్కరించిన తర్వాత ఓటర్ల జాబితా, పోలింగ్‌ కేంద్రాల వివరాలు వెల్లడించారు.

సిద్ధమవుతున్న తుది జాబితా

మండలాలు, గ్రామపంచాయతీలు, వార్డుల వారీగా ఓటరు జాబితా తుది రూపు దిద్దుకుంది. కలెక్టర్లు, డీపీవోలు ఎన్నికల ఏర్పాట్లపై కార్యాచరణ రూపొందిస్తున్నారు. రెండు మూ డు రోజుల్లో పంచాయతీ ఎన్నికల షెడ్యూల్‌ వచ్చే అవకాశం ఉంది. దీంతో గ్రామాల్లో ఎన్నికల సందడి మొదలైంది. పోటీకి ఆశావహులు ఏర్పాట్లు చేసుకుంటున్నారు. ఎన్నికలు ఎలా ఎదుర్కోవాలో మంతనాలు సాగిస్తున్నారు.

పంచాయతీ డివిజన్లు 02

జెడ్పీటీసీ స్థానాలు 18

ఎంపీటీసీ స్థానాలు 157

పోలింగ్‌ కేంద్రాలు 892

వార్డులు 3,368

పురుష ఓటర్లు 2,13,805

మహిళా ఓటర్లు 2,35,485

ఇతరులు: 12

మారిన రిజర్వేషన్లు..

జనరల్‌ 222

ఎస్సీ 63

ఎస్టీ 43

బీసీ 72

100% ఎస్టీ రిజర్వేషన్‌ 36

సిబ్బంది కేటాయింపు ఇలా..

నోడల్‌ అధికారులు 12

ఆర్‌వోలు(నామినేషన్‌) 135

ఆర్వోలు (పోలింగ్‌) 420

పీవోలు 2,025

ఏపీవోలు 2,757