TV
సమష్టి కృషి ఫలితంగానే అవార్డులు
నిర్మల్‌ రూరల్‌: జిల్లా అధికారుల సమష్టి కృషి ఫలితంగానే అవార్డులు, రివార్డులు వరిస్తాయని కలెక్టర్‌ అభిలాష అభినవ్‌ అన్నారు. ఇటీవల జిల్లాకు లభించిన ‘జల సంచాయ్‌ – జన భాగిదారి’ అవార్డు సందర్భంగా శుక్రవారం అభినందన సభ నిర్వహించారు. ఈ సందర్భంగా కలెక్టర్‌ మాట్లాడుతూ, జల సంరక్షణలో అధికారులు, క్షేత్రస్థాయి సిబ్బంది, ప్రజల భాగస్వామ్యమే ఈ అవార్డుకు కారణమన్నారు. లక్ష్యాలను సమయానికి చేరుకోవడమే కాకుండా, అమలు విధానంలో పారదర్శకత చూపడంతోనే రాష్ట్రస్థాయిలో జిల్లా ముందంజలో నిలిచిందని తెలిపారు. జిల్లాలో భూగర్భ జలాల సంరక్షణ, చెరువుల పునరుద్ధరణ, వర్షపు నీటి నిల్వ ప్రాజెక్టులు, ప్రజాభాగస్వామ్య కార్యక్రమాలలో అధికారులు అద్భుతంగా పని చేశారని కొనియాడారు. ఇదే ఉత్సాహం కొనసాగించాలని సూచించారు. పలువురు ఉద్యోగులు మాట్లాడుతూ, అత్యల్ప సమయంలో సమర్థవంతంగా కార్యక్రమాలు పూర్తి చేయడానికి కలెక్టర్‌ మార్గనిర్దేశం చేశారని తెలిపారు. అనంతరం కలెక్టర్‌ కేక్‌ కట్‌ చేసి, అవార్డు సాధనలో సేవలందించిన అధికారులను సత్కరించి జ్ఞాపికలు అందజేశారు. అనంతరం 18 ఫాగింగ్‌ యంత్రాలను మండల స్థాయిలో ఎంపీవోలకు పంపిణీ చేశారు. వర్షాకాలంలో దోమల నిర్మూలనకు వీటిని సమర్థవంతంగా వినియోగించాలని సూచించారు. కార్యక్రమంలో అదనపు కలెక్టర్‌ ఫైజాన్‌ అహ్మద్‌, డీఆర్డీవో విజయలక్ష్మి, జెడ్పీ సీఈవో గోవింద్‌, డీపీవో శ్రీనివాస్‌, ఎంపీడీవోలు, గ్రామీణాభివృద్ధి శాఖ అధికారులు పాల్గొన్నారు.
