కమీషన్‌ రాలే..!

కమీషన్‌ రాలే..!

లక్ష్మణచాంద: రైతులు తమ శ్రమ ఫలితమైన ధాన్యాన్ని దళారులకు విక్రయించి నష్టపోవద్దన్న ఉద్దేశంతో ప్రభుత్వమే ప్రతీ సీజన్‌లో పీఏసీఎస్‌, డీసీఎంఎస్‌, ఐకేపీ, జీసీసీ ఆధ్వర్యంలో కొనుగోలు కేంద్రాలు ఏర్పాటు చేస్తోంది. ఈ కేంద్రాల్లో ధాన్యం విక్రయించిన రైతులకు మద్దతు ధర దక్కుతుంది. ఈ కేంద్రాలను నడిపించే నిర్వాహకులు మాత్రం ఆర్థికంగా ఇబ్బందులు ఎదుర్కొంటున్నారు. ప్రభుత్వం చెల్లించాల్సిన కమీషన్‌ ఏ సీజన్‌కు సంబంధించినది ఆ సీజన్‌లో చెల్లించడం లేదు. రెండు సీజన్లకు సంబంధించిన కమీషన్‌ డబ్బులు బకాయి ఉన్నాయి.

రూ.9.40 కోట్ల బకాయిలు..

జిల్లాలో గత వానాకాలంలో 264 ధాన్యం కొనుగోలు కేంద్రాలు ఏర్పాటు చేశారు. సుమారు 1.14 లక్షల మెట్రిక్‌ టన్నుల ధాన్యం సేకరించారు. దీనికి రూ.3.65 కోట్ల కమీషన్‌ రావాల్సి ఉంది. గత యాసంగిలో 261 కేంద్రాలు ఏర్పాటు చేసి 1.81 లక్షల మెట్రిక్‌ టన్నుల ధాన్యం కొనుగోలు చేశారు. ఈ సీజన్‌కు రూ.5.75 కోట్ల కమీషన్‌ బకాయి ఉంది. ఈ రెండు సీజన్లను కలిపి జిల్లాకు మొత్తం రూ.9.40 కోట్లు రావాల్సి ఉందని పౌరసరఫరాల శాఖ అధికారులు తెలిపారు.

కేంద్రాల నిర్వాహకుల ఆందోళన..

ప్రభుత్వ మార్గదర్శకాల ప్రకారం రైతులకు ఎ టువంటి ఇబ్బంది లేకుండా ధాన్య సేకరణ చేపడుతున్నామని కేంద్ర నిర్వాహకులు పేర్కొంటున్నారు. అయినా ఏ సీజన్‌ కమీషన్‌ ఆ సీజన్‌లో చెల్లించడం లేదని ఆవేదన వ్యక్తం చేస్తున్నారు. వానాకాలం, యాసంగి రెండింటికీ బకాయిలు ఉన్న కారణంగా సిబ్బంది వ్యయాలు, రవాణా ఖర్చులు భారం అవుతున్నాయని పేర్కొంటున్నారు. ప్రస్తుతం కొత్త సీజన్‌ ప్రారంభమైనా పాత బకాయిలు ఇంకా లేదని తెలిపారు. బకాయిలు చెల్లించకుంటే ఈ ఖరీఫ్‌ ధాన్యం సేకరణ ఆలస్యమవుతుందని అంటున్నారు.

జిల్లా సమాచారం....

పంట కాలం కేంద్రాలు కొనుగోలు చేసిన ధాన్యం రావాల్సిన కమీషన్‌

గత వానాకాలం 264 1.14,185 మెట్రిక్‌ టన్నులు రూ.3.65 కోట్లు

గత యాసంగి 261 1.81,231 మెట్రిక్‌ టన్నులు రూ.5.75 కోట్లు