‘స్థానిక’ ఎన్నికలకు ఏర్పాట్లు చేయాలి

‘స్థానిక’ ఎన్నికలకు ఏర్పాట్లు చేయాలి

నిర్మల్‌ఖిల్లా: స్థానిక సంస్థల ఎన్నికల నిర్వహణకు అధికారులు ఏర్పాట్లు పూర్తిచేయాలని రాష్ట్ర ఎన్నికల అధికారి రాణి కుముదిని ఆదేశించారు. గ్రామపంచాయతీ ఎన్నికల సన్నద్ధతపై హైదరాబాద్‌లోని తన కార్యాలయం నుంచి అన్ని జిల్లాల కలెక్టర్లు, పోలీసు ఉన్నతాధికారులు, అదనపు కలెక్టర్లు, పంచాయతీ అధికారులతో గురువారం వీడియో కాన్ఫరెన్స్‌ నిర్వహించారు. స్థానిక సంస్థల ఎన్నికలు పారదర్శకంగా, ప్రశాంత వాతావరణంలో నిర్వహించేందుకు ప్రతీ శాఖ క్రియాశీలకంగా వ్యవహరించాలన్నారు. సర్పంచ్‌, వార్డు సభ్యుల ఎన్నికలకు సంబంధించిన ఓటరు జాబితా అభ్యంతరాలు, పోలింగ్‌ కేంద్రాల ఏర్పాటు, రిజర్వేషన్ల కేటాయింపు, శాంతిభద్రతల బందోబస్తు వంటి అంశాలపై సూచనలు చేశారు. ఎన్నికలు మూడు విడతలలో నిర్వహించేలా కార్యాచరణ ప్రణాళిక సిద్ధం చేయాలని సూచించారు. ఎన్నికల పరిశీలకులకు శిక్షణ కార్యక్రమాలు నిర్వహించనున్నట్లు వెల్లడించారు. జిల్లాస్థాయిలో ఏర్పాటు చేసే ఎన్నికల నిర్వహణ కమిటీ జాబితాను వెంటనే పంపించాలని ఆదేశించారు. వీడియో కాన్ఫరెన్స్‌ అనంతరం కలెక్టర్‌ అభిలాష అభినవ్‌ మాట్లాడుతూ.. జిల్లాలో గ్రామపంచాయతీ ఎన్నికల నిర్వహణకు సంబంధించిన అన్ని ఏర్పాట్లు జరుగుతున్నాయని తెలిపారు. అధికారులు ఎటువంటి లోపాలు తలెత్తకుండా చర్యలు తీసుకుంటున్నారన్నారు. సమావేశంలో ఎస్పీ జానకీషర్మిల, అదనపు కలెక్టర్లు ఫైజాన్‌అహ్మద్‌, కిశోర్‌కుమార్‌, జెడ్పీ సీఈవో గోవింద్‌, డీపీవో శ్రీనివాస్‌, పంచాయతీరాజ్‌, పోలీసు, రెవెన్యూ శాఖలకు చెందిన అధికారులు పాల్గొన్నారు.