ప్రజా‘వాణి’ వినాలి.. పరిష్కారం చూపాలి

నిర్మల్‌చైన్‌గేట్‌: వివిధ రకాల సమస్యలతో.. జిల్లాలోని వివిధ ప్రాంతాల నుంచి కలెక్టరేట్‌లో నిర్వహించే ప్రజావాణికి వచ్చేవారి సమస్యలు వినాలని, పరిష్కార మార్గం చూపాలని అదనపు కలెక్టర్‌ (రెవెన్యూ) కిశోర్‌కుమార్‌ అధికారులను ఆదేశించారు. కలెక్టరేట్‌ సమావేశ మందిరంలో సోమవారం నిర్వహించిన ప్రజావాణిలో బాధితుల నుంచి అర్జీలు స్వీకరించారు. సమస్యలను ఓపికగా విన్నారు. సంబంధిత అధికారులకు రెఫర్‌ చేశారు. ఆలస్యం చేయకుండా త్వరగా పరిష్కరించాలని సూచించారు. ప్రజలు విద్య, వైద్యం, ఇందిరమ్మ ఇళ్లు, పింఛన్లు, భూ సమస్యలకు సంబంధించి దరఖాస్తులు సమర్పించారు. ప్రజావాణి అనంతరం, అంతర్జాతీయ వయోవృద్ధుల దినోత్సవం సందర్భంగా అదనపు కలెక్టర్‌, అధికారులు ప్రతిజ్ఞ చేశారు. ఆర్డీవో రత్నకళ్యాణి, జెడ్పీ సీఈవో గోవింద్‌, అధికారులు పాల్గొన్నారు.

ప్రభుత్వ భూమిని కాపాడండి

మా గ్రామంలోని సర్వే నంబర్‌ 238లో ఉన్న 31 గుంటల భూమిని 1979–80 లో ప్రభుత్వం గణపతి పట్టేదార్‌ వద్ద నుంచి కొనుగోలు చేసి, నిరుపేదలకు కేటాయించింది. ఆ స్థలం ఇప్పటికీ గణపతి పట్టేదార్‌ వారసుడు మాస్కరి శివరాం పాస్‌ బుక్‌ మీద ఉంది. రైతుభరోసా పొందుతున్నాడు. 11 నెలలుగా తహసీల్దార్‌, ఆర్డీవో, కలెక్టర్‌, సర్వేయర్లకు పలుమార్లు ఫిర్యాదులు చేసినా చర్యలు తీసుకోలేదు. – బీరొళ్ల భోజన్న,

వాలేగాన్‌ గ్రామం, భైంసా మండలం

పెండింగ్‌ బిల్లులు చెల్లించాలి..

నాకు దివ్యాంగశక్తి ఎంటర్‌ప్రైజెస్‌ క్లీనింగ్‌ ప్రాడక్ట్‌ తయారీ యూనిట్‌ ఉంది. గ్రామపంచాయతీలకు బ్లీచింగ్‌ పౌడర్‌ సరఫరా చేశారు. కానీ రెండేళ్ల నుంచి బిల్లులు రావడం లేదు. గ్రామపంచాయతీలకు డబ్బులు విడుదలైనా బిల్లులు ఇవ్వడంలేదు. కొందరు గ్రామ కార్యదర్శులు బెదిరిస్తున్నారు. బిల్లులు ఇప్పించి సహకరించండి.

– పంచగుడి మహేశ్‌,

దివ్యాంగశక్తి ఎంటర్పైజ్రేస్‌ అధ్యక్షుడు

ఇందిరమ్మ ఇల్లు మంజూరు చేయాలి

మేము ప్రస్తుతం ఉంటున్న ఇల్లు పూర్తిగా శిథిలావస్థకు చేరింది. మాకు దివ్యాంగుడైన కుమారుడు ఉన్నాడు. ఇందిరమ్మ ఇల్లు కట్టుకోవడానికి జాగా ఉంది. అధికారులు స్పందించి ఇందిరమ్మ ఇల్లు మంజూరు చేయాలి.

– గణనోల సాయినాథ్‌, రాంటెక్‌, ముధోల్‌

చెరువు కట్టపై బారికేడ్లు ఏర్పాటు చేయాలి..

మేము నాగనాయిపేట్‌ టు బిహెచ్‌కే కాలనీకి చెందిన వారం. మా కాలనీకి వెళ్లే మార్గంలో బంగల్‌ చెరువు ఉంది. చెరువు కట్టమీదుగా ఉన్న రోడ్డు మర్గంలో చాలా గ్రామాలు ఉన్నాయి. వందల వాహనాలు రాకపోకలు సాగిస్తాయి. చెరువు రక్షణ కోసం బారికేడ్లు ఏర్పాటు చేయాలి – నాగనాయిపేట్‌

టు బీహెచ్‌కే, అభివృద్ధి కమిటీ

ప్రజా‘వాణి’ వినాలి.. పరిష్కారం చూపాలి

ప్రజా‘వాణి’ వినాలి.. పరిష్కారం చూపాలి

ప్రజా‘వాణి’ వినాలి.. పరిష్కారం చూపాలి