ఖాళీ కడుపుతో క్లాసులకు..

ఖాళీ కడుపుతో క్లాసులకు..

లక్ష్మణచాంద: పదోతరగతి విద్యార్థుల విద్యా ప్రమాణాలను పెంచేందుకు ప్రభుత్వం రాష్ట్రవ్యాప్తంగా ప్రత్యేక స్టడీ అవర్స్‌ ప్రారంభించింది. జిల్లాలోని అన్ని ప్రభుత్వ ఉన్నత పాఠశాలల్లో సాయంత్రం 4:15 నుంచి 5.15 గంటల వరకు అదనపు తరగతులు నిర్వహిస్తున్నారు. ఈ ప్రయత్నంతో నేర్చుకునే అవకాశాలు పెరిగినా, విద్యార్థుల ఆరోగ్యంపై ఒత్తిడి పెరుగుతోంది. జిల్లాలో మొత్తం 168 ప్రభు త్వ ఉన్నత పాఠశాలలు ఉన్నాయి. వీటిలో 4,218 మంది విద్యార్థులు పదవ తరగతిలో చదువుతున్నారు. ఈ విద్యార్థులందరికీ సాయంత్రం ప్రత్యేక స్టడీ అవర్స్‌ తప్పనిసరి చేశారు. అయితే చాలా మంది విద్యార్థులు దూరప్రాంతాల నుంచి వచ్చేవారే. ఉదయం 8 గంటలకు పాఠశాలకు బయల్దేరుతున్న విద్యార్థులు సాయంత్రం 5:15 గంటల వరకు బడిలోనే ఉంటున్నారు. మధ్యాహ్న భోజనం మినహా అల్పాహారం, స్నాక్స్‌ ఇవ్వడం లేదు.

భోజనం తర్వాత 6 గంటల గ్యాప్‌

ఉదయం 8 గంటలకు బయలుదేరి పాఠశాలకు చేరుకునే విద్యార్థులు మధ్యాహ్న భోజనం చేసిన తర్వాత మళ్లీ ఇంటికి వెళ్లే సమయానికి సాయంత్రం 6 గంటలు అవుతోంది. ఈ సమయంలో మరోసారి ఆహారం తీసుకునే అవకాశం ఇవ్వకపోవడంతో వారు ఖాళీ కడుపుతోనే ప్రత్యేక తరగతుల్లో పాల్గొంటున్నారు. కొందరు విద్యార్థులు ఈ పరిస్థితి వల్ల దృష్టి కేంద్రీకరించలేకపోతున్నట్లు చెబుతున్నారు.

అల్పాహారం కోసం వినతి..

విద్యార్థులు, ఉపాధ్యాయులు సాయంత్రం స్టడీ అవర్స్‌ సమయంలో అల్పాహారం అందిస్తే మేలు జరుగుతుందని అభిప్రాయపడ్డారు. ఒక చిన్నపాటి వంటకం లేదా పాలు వంటి ఆహారం అందిస్తే విద్యార్థులు ఉత్సాహంగా పాఠాలు చదివే అవకాశం ఉందని తెలిపారు. విద్యా శాఖ ఆధ్వర్యంలో గత సంవత్సరం జనవరి నుంచి మార్చి వరకు ఒక్క విద్యార్థికి రూ.10 చొప్పున అల్పాహారం నిధులు కేటాయించగా, ఈ ఏడాది నవంబర్‌లో ప్రారంభించాలనుకున్నా ఆదేశాలు ఇంకా రాలేదు. రాష్ట్ర ప్రభుత్వం వెంటనే స్పందించి సాయంత్రం స్టడీ అవర్స్‌ సమయంలో స్నాక్స్‌ అందించాలని కోరుతున్నారు.

ఖాళీ కడుపుతోనే

ఉదయం వచ్చేటప్పుడు ఏమీ తినకుండానే వస్తున్నా. మధ్యాహ్న భోజనం చేస్తున్నాం. అనంతరం సాయంత్రం 5:15 గంటల వరకు ఖాళీ కడుపుతోనే ప్రత్యేక స్టడీ అవర్స్‌లో చదువుకుంటున్నా. 4 గంటల నుంచే ఆకలేస్తుంది.

– ఆశిష్‌, పదో తరగతి విద్యార్థి

1/1

ఖాళీ కడుపుతో క్లాసులకు..