TV
సమైక్యతకు మార్గదర్శి సర్దార్‌ పటేల్‌
నిర్మల్‌ చైన్‌గేట్‌: భారతదేశ సమైక్యతకు సర్దార్‌ వల్లాభాయ్‌ పటేల్‌ మార్గదర్శిగా నిలిచారని ఆదిలాబాద్‌ ఎంపీ గోడం నగేష్‌, నిర్మల్‌ ఎమ్మెల్యే, బీజేఎల్పీ నేత ఏలేటి మహేశ్వర్‌రెడ్డి, ముధోల్‌ ఎమ్మెల్యే పవార్‌ రామారావు పటేల్‌ అన్నారు. పటేల్‌ 150వ జయంతి వేడుకల్లో భాగంగా నిర్మల్‌లో సోమవారం యూనిటీ మార్చ్‌ నిర్వహించారు. బస్టాండ్‌ సమీపంలోని అంబేద్కర్‌ విగ్రహానికి పూలమాలలు వేసి ర్యాలీని ప్రారంభించారు. మార్గమధ్యంలో వివేకానంద చిత్రపటానికి నివాళులర్పించారు. ఎన్టీఆర్‌ మినీ స్టేడియం వరకు ర్యాలీ సాగింది. ఈ సందర్భంగా జ్యోతిప్రజ్వలన చేసి పటేల్‌ సేవలను స్మరించారు. సర్దార్‌ పటేల్‌ కారణంగానే దేశం దృఢమైన ఐక్యతను సాధించిందని ఎంపీ నగేష్‌ అన్నారు. దేశ ఐక్యత కోసం పోరాడిన మహనీయుడు పటేల్‌ అని ఎమ్మెల్యే మహేశ్వర్‌రెడ్డి పేర్కొన్నారు. పటేల్‌ ఐక్యతామార్గం నేటి యువతకు స్ఫూర్తిదాయకమని ముధోల్‌ ఎమ్మెల్యే రామారావు పటేల్‌ అన్నారు. అదనపు కలెక్టర్‌ ఫైజాన్‌ అహ్మద్‌, ఆర్డీవో రత్నకళ్యాణి, జిల్లా యూత్‌ ఆఫీసర్‌ శైలి బెల్లాల్‌, డీవైఎస్‌వో శ్రీకాంత్‌రెడ్డి, మున్సిపల్‌ కమిషనర్‌ జగదీశ్వర్‌గౌడ్‌, విద్యార్థులు, ఉపాధ్యాయులు పాల్గొన్నారు.
