ఉపాధ్యాయ అర్హత.. ‘గురు’తర బాధ్యత

ఉపాధ్యాయ అర్హత.. ‘గురు’తర బాధ్యత

నిర్మల్‌ఖిల్లా: తెలంగాణ ప్రభుత్వం ఉపాధ్యాయ అర్హత పరీక్ష(టెట్‌) నోటిఫికేషన్‌ విడుదల చేసింది. ఉపాధ్యాయ నియామకాలకు టెట్‌ అర్హత తప్పనిసరి. ఇన్‌సర్వీస్‌ ఉపాధ్యాయులకు కూడా టెట్‌ అర్హత ఉండాలని సుప్రీంకోర్టు ఇటీవల కీలక ఆదేశాలు జారీ చేసింది. ఈమేరకు ఎన్‌సీటీఈ మార్గదర్శకాలు విడుదల చేసింది. విద్యాశాఖ తాజా ఉత్తర్వుల్లో ఈ అంశాన్ని ముద్రించింది. దీంతో బీఈడీ, డీఈడీ చేసి ప్రభుత్వ, ప్రైవేట్‌ పాఠశాలల్లో ఎస్జీటీ, స్కూల్‌ అసిస్టెంట్‌, పీజీ హెచ్‌ఎంలుగా విధులు నిర్వహిస్తున్నవారు టెట్‌ అర్హత సాధించాల్సి ఉంటుంది. ఈమేరకు పాఠశాల విద్యాశాఖ డైరెక్టర్‌ నవీన్‌ నికోలస్‌ ఉత్తర్వులు జారీ చేశారు.

కొత్త మార్గదర్శకాలు

ఎన్‌సీటీఈ, సుప్రీంకోర్టు మార్గదర్శకాల ప్రకారం ప్రతీ ఉపాధ్యాయుడు టెట్‌లో అర్హత ఉండాలి. టెట్‌ను తప్పించుకోవడానికి చేసిన ప్రయత్నాలు ఫలించలేదు. దీంతో టెట్‌ హాజరు తప్పనిసరి అవుతోంది. డీఈడీ, బీఈడీ పూర్తి చేసి ఉద్యోగం కోసం ఎదురుచూస్తున్న నిరుద్యోగులు కూడా టెట్‌ అర్హత సాధించేందుకు సిద్ధమవుతున్నారు.

ఉపాధ్యాయుల్లో గుబులు

పాఠశాల విద్యాశాఖ పరిధిలో ఉమ్మడి ఆదిలాబాద్‌ జిల్లాలో 9,791 మంది ఉపాధ్యాయులు ప్రభుత్వ పాఠశాలల్లో విధులు నిర్వహిస్తున్నారు. వీరిలో 2012, 2017, 2024 డీఎస్సీ ద్వారా వచ్చినవారు టెట్‌ అర్హత సాధించి ఉన్నారు. ఇందుకు ముందు నియామకమైన 5,590 మంది ఉపాధ్యాయులకు టెట్‌ అర్హత లేదు. వీరంతా పరీక్షకు సిద్ధం కావాల్సిన పరిస్థితి ఏర్పడింది. తాజా ప్రమోషన్లలో వీరంతా టెట్‌ అర్హత లేకుండానే పదోన్నతి పొందారు. వీరంతా ఇప్పుడు తప్పనిసరిగా టెట్‌ అర్హత సాధించాల్సిన అవసరముంది.

జిల్లాల వారీగా వివరాలు..

జిల్లా ఉపాధ్యాయులు టెట్‌ అర్హత లేనివారు

మంచిర్యాల 2.525 1,230

ఆదిలాబాద్‌ 2,636 1,845

నిర్మల్‌ 2,600 1,500

ఆసిఫాబాద్‌ 2,030 1,015

నోటిఫికేషన్‌ విడుదల

ప్రస్తుతం టెట్‌ నోటిఫికేషన్‌ విడుదలైంది. దరఖాస్తుల ప్రక్రియ ప్రారంభమైంది. డీఈడీ, బీఈడీ పూర్తిచేసిన నిరుద్యోగులు, ఇన్‌సర్వీసులో ఉన్న ఉపాధ్యాయులు ఆన్‌లైన్‌లో దరఖాస్తు చేసుకుంటున్నారు. ఈనెల 29వ తేదీ వరకు దరఖాస్తులకు గడువు ఉంది. జనవరిలో కంప్యూటర్‌ ఆధారిత పరీక్ష నిర్వహిస్తారు.