తెలంగాణ ఉద్యమంలో మునీర్‌ కీలకపాత్ర

నస్పూర్‌: తెలంగాణ రాష్ట్ర సాధనలో సీనియర్‌ జర్నలిస్టు ఎండీ.మునీర్‌ పాత్ర మరువలేనిదని టీజేఎస్‌ రాష్ట్ర అధ్యక్షుడు కోదండరామ్‌ అన్నారు. మునీర్‌ స్మారకార్థం వీ కరాటే అండ్‌ ఫిట్నెస్‌ అకాడమీ ఆధ్వర్యంలో నస్పూర్‌ కాలనీలో ఆదివారం నిర్వహించిన రాష్ట్రస్థాయి ఓపెన్‌ కరాటే అండ్‌ కుంగ్‌ఫూ చాంపియన్‌షిప్‌–2025 పోటీలను బీజేపీ రాష్ట్ర ఉపాధ్యక్షుడు వెరబెల్లి రఘునాథ్‌, మునీర్‌ కుటుంబ సభ్యులతో కలిసి ప్రారంభించారు. అనంతరం మాట్లాడుతూ తెలంగాణ ఉద్యమంలో సింగరేణి జేఏసీ కన్వీనర్‌గా మునీర్‌ కార్మికులందరినీ ఏకతాటిపైకి తీసుకువచ్చారన్నారు. విద్యావంతుల వేదిక ఏర్పాటుకు తోడ్పాటు అందించారని తెలిపారు. సింగరేణిలో కొత్త గనులు ఏర్పాటు చేయకపోతే మనుగడ కష్టమని మునీర్‌ నాడే చెప్పారని గుర్తు చేశారు. రఘునాథ్‌ మాట్లాడుతూ మునీర్‌ నేటి తరానికి ఆదర్శప్రాయుడన్నారు. పోటీలకు రాష్ట్రంలోని 13 జిల్లాల నుంచి సుమారు 1,087 మంది క్రీడాకారులు హాజరయ్యారని నిర్వాహకులు తెలిపారు. కార్యక్రమంలో సీనియర్‌ న్యాయవాది ఎండీ.సంధాని, జైపూర్‌ ఏసీపీ వెంకటేశ్వర్లు, సీఐలు అశోక్‌కుమార్‌, నరేశ్‌, మునీర్‌ కుమారుడు అబ్బాస్‌, పలువురు మాస్టర్లు, క్రీడాకారులు పాల్గొన్నారు.