TV
ఆన్‌లైన్‌ మోసంలో మరో ఇద్దరి అరెస్ట్‌
కాగజ్‌నగర్‌టౌన్‌: ట్రేడింగ్‌లో పెట్టుబడి పెట్టించి మోసగించిన ఇద్దరిని పట్టణ పోలీసులు అరెస్టు చేశారు. కాగజ్‌నగర్‌ పోలీసుస్టేషన్‌లో ఆదివారం ఈమేరకు డీఎస్పీ వహీదుద్దీన్‌ వివరాలు వెల్లడించారు. పట్టణానికి చెందిన ఓ మహిళ వాట్సాప్‌ ద్వారా ట్రేడింగ్‌లో రూ.76,50,000 పెట్టుబడి పెట్టి మోసపోయినట్లు గుర్తించి పోలీసులను ఆశ్రయించింది. ఫేక్‌ స్క్రీన్‌షాట్‌లు, తప్పుడు హామీలతో బాధితురాలిని మోసం చేసిన ముఠా సభ్యులు తర్వాత వాట్సాప్‌ గ్రూప్‌లను డిలీట్‌ చేశారు. ఈ కేసులో గతంలో ఇద్దరు నిందితులను పట్టుకున్నాం. మహారాష్ట్రలోని పుణెకు చెందిన సంతోష్‌కుశాల్‌చంద్‌ తౌవర్‌ బ్యాంకుకు వచ్చే పరిచయాలు ఉపయోగించి మోసాల్లో మధ్యవర్తిత్వం చేశాడు. మేథాదేశ్‌పాండే పేరుతో యాక్సిస్‌ బ్యాంక్‌లో ఖాతా తెరిపించి ట్రేడింగ్‌ లావాదేవీలతో ఉపయోగించాడు. మరో నిందితుడు గుజరాత్‌లోని అహ్మదాబాద్‌కు చెందిన పటేల్‌ ధవల్‌ కుమార్‌ గండాలాల్‌ను పట్టుకుని విచారించగా జై పటేల్‌ తదితరులతో కలిసి సోమనాథ్‌ ఎంటర్‌ప్రైజెస్‌ పేరిట నకిలీపత్రాలు సృష్టించి యాక్సిస్‌ బ్యాంక్‌లో సేవింగ్‌ ఖాతా, బంధన్‌ బ్యాంక్‌లో కరెంట్‌ ఖాతా తెరిపించి మోసాలకు పాల్పడినట్లు అంగీకరించారని డీఎస్పీ తెలిపారు. ఈ కేసులో ప్రమేయం ఉన్నవారిని త్వరలో పట్టుకుంటామన్నారు. నిందితులను పటుకునేందుకు కృషిచేసిన ఎస్సైలు సుధాకర్‌, ప్రశాంత్‌, యాదగిరి, సిబ్బంది సంపత్‌, రవిచంద్ర, పఠాన్‌ సబీనబీలను అభినందించారు. సమావేశంలో సీఐ ప్రేం కుమార్‌, ఎస్సై సుధాకర్‌ పాల్గొన్నారు.
