TV
వాగులో దూకిన తల్లీ కొడుకు..
బాసర: కొడుకు మద్యం వ్యసనం.. ఫైనాన్స్‌ సంస్థల వేధింపులు.. ఆర్థిక ఇబ్బందులు.. తల్లీ కొడుకును ఆత్మహత్యకు పురిగొల్పాయి. ఆస్పత్రికి వెళ్లొస్తూ.. వాగులో దూకి ఆత్మహత్య చేసుకున్నారు. ఈ ఘటన నిర్మల్‌ జిల్లా బాసర మండలం టాక్లిలో శనివారం జరిగింది. బాసర ఎస్సై శ్రీనివాస్‌, బాధితుల బంధువుల కథనం ప్రకారం.. టాక్లి గ్రామానికి చెందిన లింగాపురి స్వరూప(55), శ్రీనివా స్‌(35) తల్లీ కొడుకులు. స్వరూప భర్త, పెద్ద కొడు కు గతంలో మృతిచెందారు. చిన్న కొడుకు శ్రీని వాస్‌తో కలిసి కూలీ పనులు చేసుకుంటూ జీవనం సాగిస్తోంది. శ్రీనివాస్‌కు భార్య లక్ష్మి, ఏడేళ్ల కూతు రు ఉన్నారు. శ్రీనివాస్‌ మద్యానికి బానిస కావడంతో ఆర్థిక ఇబ్బందులు మొదలయ్యాయి. దీంతో వివిధ ఫైనాన్స్‌ సంస్థల నుంచి అప్పులు తీసుకున్నారు. అవి తీర్చకపోవడంతో ఫైనాన్స్‌ సంస్థల ప్రతినిధులు తరచూ ఇంటికి వచ్చి వేధిస్తున్నారు. ఈ క్రమంలో ఇంట్లో గొడవలు జరుగుతున్నాయి.
ఆస్పత్రికి వెళ్లి వస్తూ..
తల్లి స్వరూపకు జ్వరం రావడంతో పొరుగున ఉన్న మహారాష్ట్రలోని ధర్మాబాద్‌ ఆస్పత్రికి కొడుకుతో కలిసి వెళ్లింది. ఆస్పత్రిలో చూపించుకుని మధ్యాహ్నం గ్రామానికి బయల్దేరారు. టాక్లి బస్టాండ్‌ వద్ద దిగిన తర్వాత తల్లి కొడుకుల మధ్య డబ్బుల విషయమై గొడవ జరిగినట్లు తెలిసింది. దీంతో మనస్థాపం చెందిన స్వరూప పక్కనే ఉన్న వాగులో దూకింది. వెంటనే శ్రీనివాస్‌ కూడా వాగులో దూకాడు. స్థానికులు గమనించి పోలీసులకు సమాచారం ఇచ్చారు. ఎస్సై శ్రీనివాస్‌ ఘటన స్థలికి చేరుకుని ఈతగాళ్లతో గాలింపు చేపట్టారు. స్వరూప మృతదేహం దొరికింది. శ్రీనివాస్‌ గల్లంతయ్యాడు. స్వరూప మృతదేహాన్ని పోస్టుమార్టం నిమిత్తం భైంసా ఆస్పత్రికి తరలించారు. కుటుంబ సభ్యుడు సాయినాథ్‌ ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్లు ఎస్సై తెలిపారు.
