సాగుకు ‘ఉపాధి’ హామీ

సాగుకు ‘ఉపాధి’ హామీ

నిర్మల్‌చైన్‌గేట్‌: గ్రామీణులు ఉపాధి కోసం వలస వెళ్లకుండా స్థానికంగానే ఉపాధి కల్పించడమే లక్ష్యంగా కేంద్ర ప్రభుత్వం మహాత్మాగాంధీ జాతీయ గ్రామీణ ఉపాధి హామీ పథకం అమలు చేస్తోంది. రైతులు, కూలీ అవసరాలను దృష్టిలో ఉంచుకుని వచ్చే ఆర్థిక సంవత్సరానికి ఈ పథకంలో కొత్త పనుల గుర్తింపు చర్యలు జిల్లాలో ఇప్పటికే మొదలయ్యాయి. అక్టోబర్‌ 2న ప్రారంభమైన ఈ కార్యక్రమం నవంబర్‌ 30 వరకు కొనసాగనుంది. ప్రతీ గ్రామంలో ఉపాధి హామీ సిబ్బంది, అధికారులు ప్రజల సూచనల మేరకు అభివృద్ధి పనులను గుర్తిస్తున్నారు.

వ్యవసాయ అనుబంధ పనులకే ప్రాధాన్యం

2026–27 సంవత్సరం శాశ్వత, దీర్ఘకాల ప్రయోజనాలు కలిగించే సుమారు 266 పనులను ఎంపిక చేయనున్నారు. వీటిలో వ్యవసాయ అనుబంధ ప్రాజెక్టులు, నీటి సంరక్షణ, భూసంస్కరణ, పచ్చదనం పెంపు వంటి పనులకు ప్రాధాన్యం ఇస్తున్నట్లు అధికారులు తెలిపారు. ఒక్కో గ్రామంలో పనుల గుర్తింపునకు మూడు, నాలుగు రోజులు పట్టే అవకాశం ఉందని పేర్కొంటున్నారు.

గ్రామసభల్లో అభిప్రాయ సేకరణ..

ఉపాధి హామీ పరిధిలో చేపట్టాల్సిన పనులను గ్రామ సభల్లో ప్రజలకు వివరించి, వారి సూచనలతో తీర్మానాలు చేస్తున్నారు. పంచాయతీ అధికారులు, ఉపాధి సిబ్బంది కలిసి ప్రతి ప్రాజెక్టుకు అవసరమైన పనిదినాల సంఖ్య, బడ్జెట్‌, వేతన వ్యయాలను లెక్క వేసి రికార్డుల్లో నమోదు చేస్తున్నారు. అనంతరం మండల వారీగా వివరాలను సమీకరించి డీఆర్డీవో కార్యాలయానికి పంపనున్నారు.

షెడ్ల నిర్మాణానికి ఆర్థికసాయం..

ఉపాధి హామీ పథకం కింద పశుపోషక కుటుంబాలకు ప్రభుత్వం ప్రత్యక్ష ఆర్థికసాయం అందిస్తోంది. పౌల్ట్రీ యూనిట్‌కు రూ.85 వేలు, పశువులపాక యూనిట్‌కు రూ.36 వేలు, గొర్రెలు లేదా మేకల షెడ్లకు రూ.98 వేల సహాయం లభిస్తుంది. జీవనోపాధిని స్థిరంగా నిలబెట్టే లక్ష్యంతో ఈ ప్రోత్సాహం ఇస్తున్నట్లు అధికారులు తెలిపారు.

పనులు గుర్తిస్తున్నాం..

ప్రభుత్వ ఆదేశాల మేరకు గ్రామాల్లో పనుల గుర్తింపు ప్రక్రియ కొనసాగుతోంది. వ్యవసాయ రంగానికి అధిక ప్రాధాన్యం ఇస్తూ పనుల ఎంపిక జరుగుతుంది. నిబంధనల మేరకు ఉపాధి హామీ పనుల గుర్తింపు, పని కల్పన చేపడతాం.

– విజయలక్ష్మి, డీఆర్డీవో

అమలుకానున్న ప్రధాన పనులు..