పిల్లలు బడిబాట పట్టేలా..

పిల్లలు బడిబాట పట్టేలా..

లక్ష్మణచాంద: రాష్ట్ర ప్రభుత్వం బడీడు పిల్లలంతా విద్యలో భాగస్వామి కావాలనే లక్ష్యంతో పెద్దస్థాయిలో సర్వే నిర్వహించనుంది. ఈ కార్యక్రమం పాఠశాలలకు దూరమైన పిల్లలకు విద్యా అవకాశాలు కల్పించేందుకు కీలక మలుపుగా మారనుంది. 6 నుంచి 14 ఏళ్లలోపు పిల్లలు, అలాగే 15 నుంచి 19 ఏళ్ల వయసు ఉన్న టీనేజర్లపై ప్రత్యేక దృష్టి సారించనుంది. ఇప్పటికే బడి మానేసినవారు లేదా ఇప్పటివరకు చదువుకి అడుగుపెట్టని వారందరి వివరాలు ఈ సర్వేలో సేకరిస్తారు.

గ్రామాల వారీగా వివరాల సేకరణ..

ఈ నెల 20 నుంచి డిసెంబర్‌ 31 వరకు సర్వే కొనసాగుతుంది. అంతకుముందుగా ఈ నెల 17లోపు సీఆర్పీలు తమ పరిధిలోని ప్రతి పాఠశాల వద్ద డ్రాపౌట్‌ విద్యార్థుల ప్రాథమిక వివరాలను సేకరించనున్నారు. అనంతరం ఆ పిల్ల ల ఇళ్లకు వెళ్లి పూర్తి సమాచారం నమోదు చేయనున్నారు. సర్వేలో విద్యా శాఖతోపాటు పోలీస్‌, చైల్డ్‌ వెల్ఫేర్‌, లేబర్‌ డిపార్ట్‌మెంట్‌ కూడా భాగస్వామ్యం అవుతాయి. బడి బయట ఉన్న ప్రతీ బాలుడిని గుర్తించి, ప్రభుత్వ పాఠశాలలు, వసతి గృహాలు, గురుకుల సంస్థలలో చేర్పించే చర్యలు చేపడతారు.

డేటా డిజిటలైజేషన్‌..

సీఆర్పీలు ప్రతీరోజు సేకరించిన సమాచారం వెంటనే ప్రబంధ్‌ పోర్టల్‌, చైల్డ్‌ ఇన్‌ఫోలో అప్‌డేట్‌ చేయాలి. సర్వే పూర్తయిన అనంతరం వివరాలు జనవరి 2న డీఈవో కార్యాలయానికి పంపించి, జిల్లా పరీక్ష అనంతరం జనవరి 12న రాష్ట్ర స్థాయికి అందజేయనున్నారు.

ఈనెల 20 నుంచి సర్వే...

పలు కారణాలతో బడి మధ్యలో మానేసిన, బడి వయసు ఉండి ఇప్పటి వరకు పాఠశాలకు వెళ్లని పిల్లల వివరాలను సేకరించే సర్వే ఈ నెల 20న ప్రారంభమై వచ్చే నెల 31 వరకు కొనసాగుంది.

పకడ్బందీగా సర్వే

ప్రభుత్వం ఆదేశాల మేరకు బడి బయట పిల్ల ల కోసం ఈనెల 20 నుంచి వచ్చే నెల 31 వరకు సర్వేను జిల్లాలో పకడ్బందీగా చేపడుతాం. దీనిని సీఆర్పీలు, క్లస్టర్‌ ప్రధానోపాధ్యాయుల ఆధ్వర్యంలో చేపడుతారు.

– భోజన్న, డీఈవో