పాఠశాలలకు నిర్వహణ నిధులు

పాఠశాలలకు నిర్వహణ నిధులు

లక్ష్మణచాంద:ఎన్నో నెలలుగా ఎదురు చూస్తున్న పాఠశాలల నిర్వహణ నిధులు ఎట్టకేలకు ప్రభుత్వం విడుదల చేసింది. పాఠశాలలు ప్రారంభమయ్యే సమయంలోనే నిధులు విడుదల కావాల్సి ఉండగా ప్రారంభమైన ఏడు నెలల తర్వాత విడుదలయ్యాయి. వచ్చిన నిధులను జిల్లా విద్యాశాఖ అధికారి కార్యాలయం నుంచి ఆయా పాఠశాలల ప్రధానోపాధ్యాయులు, అమ్మ ఆదర్శ కమిటీల ఉమ్మడి ఖాతాలలో జమ చేసినట్లు జిల్లా విద్యాశాఖ అధికారులు పేర్కొన్నారు. జిల్లాలోని ప్రభుత్వ పాఠశాలలకు ఏడాదికి రూ.2,28,11,000 రావాల్సి ఉండగా, మొదటి విడతగా 50% నిధులు రూ.1,14,05,500 విడుదలయ్యాయని జిల్లా విద్యాశాఖ అధికారులు తెలిపారు.

ప్రాధాన్యత వీటికి...

ప్రభుత్వం విడుదల చేసిన నిర్వహణ నిధులతో ప్రధానంగా విద్యార్థులకు మౌలిక వసతులు కల్పిస్తారు. పాఠశాలల్లోని అమ్మ ఆదర్శ కమిటీల తీర్మానం మేరకు నిధులు ఖర్చు చేయాల్సి ఉంటుంది. ప్రధానంగా పాఠశాలల్లో చిన్నచిన్న మరమ్మతులు, పరిసరాల పరిశుభ్రత, ప్రయోగశాలలకు అవసరమైన పలురకాల రసాయనాలు, పరికరాల కొనుగోలు, స్టేషనరీ వస్తువుల కొనుగోలు, జాతీయ పండుగల నిర్వహణ, కంప్యూటర్లు, ప్రొజెక్టర్ల మరమ్మతులు, డిజిటల్‌ తరగతుల కోసం, క్రీడా పరికరాలు కొనుగోలు కోసం అమ్మ ఆదర్శ కమిటీల తీర్మానం తీసుకొని ఖర్చు చేయాలి.

విడుదలైన నిధులు..

పాఠశాల గ్రాంటు నిధుల కింద 493 లోకల్‌ బాడీ పాఠశాలలకు రూ.48,52,500, ఎలిమెంటరీ స్కూల్‌కు రూ.లక్ష, 109 సెకండరీ స్కూళ్లకు రూ.23,50,000, కేజీబీవీలు 16కు రూ.5,62,500 ఇలా మొత్తం రూ,78,15000 నిధులు వచ్చాయి. బడిబాట నిధులు మొత్తం 696 పాఠశాలకు రూ.8,18,000 వచ్చాయి. స్పోర్ట్స్‌ గ్రాంటు నిధులు 548 పాఠశాలలకు గాను రూ.27,72,500 మంజూరయ్యాయి.