TV
పులొచ్చింది
పెంబి: మండలంలోని తాటిగూడ, పుల్గంపాండ్రి సెక్షన్‌ పరిధిలో పెద్దపులి సంచరిస్తుందని పెంబి ఎఫ్‌ఆర్వో రమేశ్‌రావు తెలిపారు. పెంబి మండల రైతులతోపాటు మారుమూల గ్రామాల గిరిజనులు అప్రమత్తంగా ఉండాలని సూచించారు. ఎక్కడైనా పులి సంచారం, అడుగులు కనిపిస్తే వెంటనే తమకు సమాచారం ఇవ్వాలని కోరారు. రైతులు ఒంటరిగా పొలాల వద్దకు వెళ్లొద్దని తెలిపారు.
ఘనంగా రేణుకా ఎల్లమ్మ విగ్రహ ప్రతిష్ఠ
సారంగపూర్‌: మండలకేంద్రంలో స్థానిక గౌడ సంఘం ఆధ్వర్యంలో గురువారం వేదపండితులు గురుమంచి చంద్రశేఖరశర్మ ఆధ్వర్యంలో రేణుకా ఎల్లమ్మ విగ్రహ ప్రతిష్ఠాపన కార్యక్రమాలను ఘనంగా నిర్వహించారు. పెద్ద సంఖ్యలో భక్తులు తరలివచ్చి అమ్మవారిని దర్శించుకుని మొక్కులు చెల్లించుకున్నారు. వేద బ్రాహ్మణుల ఆధ్వర్యంలో కలశపూజ, హోమం నిర్వహించారు. కార్యక్రమానికి హంపీ పీఠాధిపతి విద్యారణ్య భారతీ స్వామి హాజరై భక్తులకు ప్రవచనాలు వినిపించారు. అనంతరం రేణుకా ఎల్లమ్మ కథలోని ముఖ్యమైన అంశాలు తెలియజేశారు.
ఎస్పీ పీఆర్వో, సోషల్‌ మీడియా ఇన్‌చార్జికి ప్రశంస
నిర్మల్‌టౌన్‌:నిర్మల్‌ ఎస్పీ డాక్టర్‌ జానకీషర్మిల పీఆర్వో నరిమెట్ల వంశీ, సోష ల్‌ మీడియా ఇన్‌చార్జి రామ్‌ పవన్‌కుమార్‌ హైదరాబాద్‌లో మూడు రోజులపాటు జరిగిన తెలంగాణ రాష్ట్ర పోలీస్‌ ప్రొఫెషనల్‌ శిక్షణ పూర్తి చేసుకున్నారు. శిక్షణ అనంతరం డీజీపీ శివధర్‌రెడ్డి ప్రశంసా పత్రాలను అందజేశారు. ప్రజలతో పోలీసులను కలిపే వంతెనలుగా పీఆర్వోలు వ్యవహరించాలని సూచించారు.
తెలంగాణ ఉద్యమ చరిత్ర పుస్తకాలు పంపిణీ
కుంటాల: ఉద్యమాలతోనే తెలంగాణ ప్రత్యేక రాష్ట్రం సాధ్యమైందని తెలంగాణ ఉద్యమకారుల ఫోరం జిల్లా అధ్యక్షుడు ముష్కం రామకృష్ణగౌడ్‌ అన్నారు. మండలంలోని లింబా(కె) ఉన్నత పాఠశాలలోని విద్యార్థులకు ఉద్యమకారుల చరిత్ర ముధోల్‌ పుస్తకాలను గురువారం పంపిణీ చేశారు. ఉద్యమకారుల త్యాగాలు, నిస్వార్థ సేవ, వీరోచిత పోరాటం ద్వారా తెలంగాణ సాధ్యమైందని వివరించారు. వారి సేవలు ఎన్నటికీ మర్చిపోవద్దని సూచించారు. కార్యక్రమంలో తెలంగాణ ఉద్యమకారుల చరిత్ర ముధోల్‌ పుస్తక రచయిత జాదవ్‌ పుండలీక్‌రావు, ప్రధాన కార్యదర్శి చాకటి లస్మన్న, హెచ్‌ఎం పురుషోత్తం, ఉపాధ్యాయులు సతీశ్‌కుమార్‌, ప్రదీప్‌, రాజేశ్వర్‌రెడ్డి, న్యాయవాది నరేశ్‌, నాయకుడు మల్లారెడ్డి తదితరులు పాల్గొన్నారు.
పులొచ్చింది
