కొండెక్కిన కొబ్బరికాయ

కొండెక్కిన కొబ్బరికాయ

బాసర:పూజల్లో కొబ్బరికాయకు ఎంతో ప్రాధాన్యం ఉంటుంది. ఏ గుడికి వెళ్లినా భక్తులు కొబ్బరికాయ లేకుండా వెళ్లరు. కొన్నేళ్లుగా స్థిరంగా ఉన్న ఈ కొబ్బరికాయ ధర.. కొన్ని నెలలుగా పెరుగుతోంది. ఏడాది క్రితం రూ.20 ఉన్న ఒక్క కొబ్బరికాయ ధర.. ఇప్పుడు రూ.50కి చేరింది. చిన్నసైజు కొబ్బరికాయలను రూ.30, కాస్త పెద్దగా ఉంటే రూ.35, ఇంకా పెద్దగా ఉంటే రూ.50 చొప్పున విక్రయిస్తున్నారు. ఇక బాసర, అడెల్లి లాంటి ప్రసిద్ధ క్షేత్రాల్లో అయితే చిన్న మీడియం సైజు కొబ్బరికాయలనే రూ.35 చొప్పున విక్రయిస్తున్నారు. రూ.20 ఉన్న కొబ్బరికాయ ధరను రూ.35కు పెంచేశారు. కార్తిక మాసం సందర్భంగా ఆలయాల్లో భక్తుల రద్దీ కొనసాగుతోంది. బాసరకు భారీగా భక్తులు వస్తున్నారు. ఇక్కడ ఒక కొబ్బరికాయను రూ.45 నుంచి రూ.50 వరకు విక్రయిస్తున్నారు. రూ.20కే లభించే కొబ్బరికాయ ధర ఒకేసారి రూ.15 పెరగడంతో భక్తులు ఇబ్బంది పడుతున్నారు.

పవిత్ర మాసం..

కార్తికమాసం ఆధ్యాత్మికతకు ప్రతీక. ఈ మాసంలో అయ్యప్ప, ఆంజనేయ, శివ భక్తులు దీక్షలు, ఉపవాసాలు ఆచరిస్తూ తరచూ ఆలయాలను సందర్శిస్తారు. వేకువజామునే జరిగే దేవతారాధనలు, గృహ పూజల్లో ప్రాధాన్యత కలిగిన కొబ్బరికాయకు ఈకాలంలో సహజంగానే అధిక డిమాండ్‌ ఏర్పడింది. పూజల ప్రధాన వస్తువు కొబ్బరికాయలకు విపరీతమైన డిమాండ్‌ పెరగడంతో కొంతమంది వ్యాపారులు అధిక ధరలు వసూలు చేస్తున్నారని భక్తులు ఆరోపిస్తున్నారు. ఆలయం పరిసర ప్రాంతాల్లో సరఫరా సమృద్ధిగా ఉండేలా చర్యలు తీసుకోవాలని అధికారులను కోరుతున్నారు.