TV
అభివృద్ధి పనుల్లో వేగం పెంచాలి
ఖానాపూర్‌: ఖానాపూర్‌ డివిజన్‌లో చేపట్టిన అభివృద్ధి పనుల్లో వేగం పెంచాలని కలెక్టర్‌ అభిలాష అభినవ్‌, ఎమ్మెల్యే వెడ్మ బొజ్జు పటేల్‌ సూచించారు. వివిధ శాఖల అభివృద్ధి పనులు, ప్రభుత్వ పథకాల అమలు పురోగతిపై గురువారం సమీక్ష చేశారు. పనుల్లో అలసత్వం వహించే కాంట్రాక్టర్లపై చర్యలు తప్పవని హెచ్చరించారు. నిరుపేదలకు ఇళ్లు, తాగునీరు, వైద్యం, విద్య, వంతెనలు, రహదారులు వంటి మౌలిక సదుపాయాలు అందేలా చర్యలు కొనసాగుతున్నాయని తెలిపారు. ఇందిరమ్మ ఇళ్ల పనులను వేగవంతం చేయాలని సూచించారు. ప్రభుత్వ లక్ష్యం పేదల అభ్యుదయమని, అర్హులందరికీ పథకాలు చేరేలా అధికారులు కృషి చేయాలని చెప్పారు. ఎంమ్మెల్యే బొజ్జు పటేల్‌ మాట్లాడుతూ, పథకాల అమలులో నిర్లక్ష్యం చేయొద్దన్నారు. అటవీ శాఖ కారణంగా ఇబ్బందులు ఎదురైతే ప్రత్యేక చొరవతో పరిష్కరించాలని కోరారు. అవసరమైన నిధులను తీసుకురావడానికి కృషిచేస్తానని హామీ ఇచ్చారు. అదనపు కలెక్టర్లు ఫైజాన్‌ అహ్మద్‌, కిశోర్‌కుమార్‌, డీఎఫ్‌వో నాగినిభాను, ఆర్డీవో రత్నకళ్యాణి, ఏఎంసీ చైర్మన్‌, వైస్‌ చైర్మన్‌ భూషణ్‌, మాజిద్‌, ఆత్మ చైర్మన్‌ తోట సత్యం, మండల ప్రత్యేక అధికారి జీవరత్నం, వివిధ శాఖల అధికారులు పాల్గొన్నారు.
పునరావాస సమస్యలపై వినతి..
కడం మండలం మైసంపేట్‌, రాంపూర్‌ గిరిజనులు కలెక్టర్‌, ఎమ్మెల్యే, డీఎఫ్‌వోలను కలిశారు. పునరావాస సమస్యలపై వినతిపత్రాలు సమర్పించారు. కవ్వాల్‌ టైగర్‌ రిజర్వ్‌ ప్రాజెక్ట్‌లో భాగంగా కొత్త మద్దిపడగలోకి తరలించి 18 నెలలు గడిచినా భూమి పట్టాలు, సాగునీటి సదుపాయాలు అందలేదని తెలిపారు. అంతర్గత రహదారులు నిర్మించాలని విజ్ఞప్తి చేశారు. ఎమ్మెల్యే, కలెక్టర్‌ సమస్యల పరిష్కారానికి సానుకూలంగా స్పందించారు.
