ఆర్థిక వనరులు సృష్టించుకోవాలి

ఆర్థిక వనరులు సృష్టించుకోవాలి

కై లాస్‌నగర్‌: కేంద్ర, రాష్ట్ర ప్రభుత్వ నిధులతో పాటు సొంతంగా ఆర్థిక వనరులు సృష్టించుకోవడంతోనే స్థానిక సంస్థల్లో అభివృద్ధి సాధ్యపడుతుందని రాష్ట్ర ఫైనాన్స్‌ కమిషన్‌ చైర్మన్‌ సిరిసిల్ల రాజయ్య అన్నారు. కలెక్టరేట్‌ సమావేశ మందిరంలో కమిషన్‌ సభ్యుడు రమేశ్‌, కార్యదర్శి కాత్యాయినిదేవితో కలిసి బుధవారం ఉమ్మడి ఆదిలాబాద్‌ జిల్లాస్థాయి సమీక్ష నిర్వహించారు. ఆయా జిల్లాల్లోని పంచాయతీలు, మున్సిపాలిటీలకు సంబంధించిన ఐదేళ్ల ఆదాయ, వ్యయాలపై సమగ్రంగా సమీక్షించారు. జనరల్‌ ఫండ్‌, ట్యాక్స్‌లు, వారసంతలు, తైబజార్‌ల ద్వారా సమకూరుతున్న ఆదాయం, వాటి ఖర్చుల వివరాలపై ఆరా తీశారు. ఈ సందర్భంగా ఆయన మాట్లాడుతూ, స్థానిక సంస్థల బలోపేతంతోనే గ్రామీణాభివృద్ధి సాధ్యపడుతుందన్నారు. ప్రతీ పంచాయతీ, మున్సిపాలిటీ సొంత ఆర్థిక వనరుల సమీకరణపై దృష్టి సారించాలన్నారు. ప్రజల అవసరాలకు అనుగుణంగా ప్రత్యేక దృష్టి సారించి అభివృద్ధి కార్యక్రమాలు చేపట్టాలన్నారు. నిధుల వినియోగం పారదర్శకంగా, సమర్థవంతంగా జరగాలని సూచించారు. కేంద్ర, రాష్ట్ర నిధుల ద్వారా గ్రామ పంచాయతీలను బలోపేతం చేయాలన్నారు. ప్రతీ రూపాయి ప్రజా ప్రయోజనానికి వినియోగించాలని తెలిపారు. ఆయా శాఖలు సమన్వయంతో పాటు సమగ్ర ప్రణాళికతో పనిచేయాలని సూచించారు. రాష్ట్ర ఫైనాన్స్‌ కమిషన్‌ మార్గదర్శకాల ప్రకారం స్థానిక సంస్థల ఆర్థిక స్థితిగతులను బలోపేతం చేసేందుకు అవసరమైన చర్యలు తీసుకోవాలన్నారు. అనంతరం ఆయా జిల్లాల్లో నిధుల వినియోగం, పేదరిక నిర్మూలన, గ్రామీణ గృహనిర్మాణం, విద్యుత్‌, తాగునీటి సరఫరా, రహదారులు, పారిశుద్ధ్యం వంటి అంశాలపై కలెక్టర్లు పవర్‌పాయింట్‌ ప్రజెంటేషన్‌ ద్వారా సమగ్ర వివరాలు వెల్లడించారు. ఇందులో ఉమ్మడి జిల్లా కలెక్టర్లు రాజర్షి షా, అభిలాష అభినవ్‌, కుమార్‌ దీపక్‌, వెంకటేశ్‌దోత్రే, స్థానిక సంస్థల అదనపు కలెక్టర్లు సోమ రాజేశ్వర్‌, ఫైజాన్‌ అహ్మద్‌, దీపక్‌ తివారి, ఆర్డీవో స్రవంతి, జెడ్పీ సీఈవోలు, డీపీవోలు, డీఎల్‌పీవోలు తదితరులు పాల్గొన్నారు.

ఆదిలాబాద్‌ అంటే ఎంతో ఇష్టం..

ఆదిలాబాద్‌ జిల్లా అంటే తనకెంతో ఇష్టమని రాజయ్య అన్నారు. తనకు ఈ జిల్లాతో ఉన్న అనుబంధాన్ని గుర్తు చేసుకున్నారు. గతంలో ఖమ్మం జిల్లాకు పోస్టింగ్‌ వస్తే దాన్ని మార్చుకుని నాలుగున్నరేళ్ల పాటు ఉమ్మడి ఆదిలాబాద్‌ జెడ్పీ సీఈ వోగా పనిచేశానని చెప్పారు. ఇక్కడ ప్రజల అభిమానం మరువలేనిదని పేర్కొన్నారు. కరీంనగర్‌ తాను పుట్టిన జిల్లా అయితే రెండో జన్మభూమి ఆదిలాబాద్‌ అని ఈ జిల్లాతో ఉన్న అనుబంధాన్ని వివరించారు.