కొనుగోళ్లు వేగవంతం చేయాలి

కొనుగోళ్లు వేగవంతం చేయాలి

నిర్మల్‌చైన్‌గేట్‌: అన్ని పంటల కొనుగోళ్లు వేగవంతం చేయాలని రాష్ట్ర పౌర సరఫరాల శాఖ మంత్రి ఉత్తమ్‌కుమార్‌రెడ్డి అధికారులను ఆదేశించారు. వ్యవసాయ, మార్కెటింగ్‌ శాఖ మంత్రి తుమ్మల నాగేశ్వరరావు, ప్రభుత్వ ప్రధాన కార్యదర్శి రామకృష్ణారావుతో కలిసి హైదరాబాదు నుంచి అన్ని జిల్లాల కలెక్టర్లు, అధికారులతో పంటల కొనుగోలుపై సోమవారం సమీక్ష నిర్వహించారు. ఉత్తమ్‌కుమార్‌రెడ్డి మాట్లాడుతూ వరి, పత్తి, సోయా, మొక్కజొన్న పంటల కొనుగోళ్లు నిర్ణీత గడువులోగా పూర్తి చేయాలన్నారు. వరి ధాన్యం కొనుగోలు కేంద్రాల్లో సరిపడా గన్నీ సంచులు, తూకపు, తేమ యంత్రాలు, టార్పాలిన్‌లు అందుబాటులో ఉంచుకోవాలన్నారు. వ్యవసాయ మంత్రి తుమ్మల నాగేశ్వరరావు మాట్లాడుతూ, సకాలంలో వరి ధాన్యం కొనుగోలు ప్రక్రియను పూర్తి చేసేలా అధికారులు చర్యలు తీసుకోవాలన్నారు. ధాన్యం డబ్బులు వెంట వెంటనే రైతుల ఖాతాల్లోకి జమ చేయాలని సూచించారు. వీడియో కాన్ఫరెన్స్‌ అనంతరం కలెక్టర్‌ అభిలాష అభినవ్‌, అధికారులతో మాట్లాడారు. పంటల కొనుగోళ్లు ఎటువంటి లోటుపాట్లు లేకుండా నిర్వహిస్తున్నామన్నారు. ధాన్యం కొనుగోలు కేంద్రాల్లో సౌకర్యాలు కల్పించాలని సూచించారు. రోజువారీగా కొనుగోలు చేసిన పంటల వివరాలు అందించాలని తెలిపారు. పొరుగు రాష్ట్రాల నుంచి ధాన్యం జిల్లాలోకి రాకుండా అడ్డుకోవాలని ఆదేశించారు. ఆర్డీవో రత్నకళ్యాణి, పౌర సరఫరాల అధికారి రాజేందర్‌, పౌర సరఫరాల జిల్లా మేనేజరు సుధాకర్‌, డీఆర్డీవో విజయలక్ష్మి, వ్యవసాయ శాఖ అధికారి అంజిప్రసాద్‌, డీసీవో నర్సయ్య తదితరులు పాల్గొన్నారు.