పైసా మే పరమాత్మ అంటారు. ఒక్క చిన్న మార్పు. ఇప్పుడు ‘పైసా మే సినిమా’ అనాలి. ఎందుకంటే రిలీజ్‌ తర్వాత సాధించే పైసా వసూల్‌ కోసం పైసల చుట్టూ కథలు అల్లి కొన్ని సినిమాలు తీస్తున్నారు. ‘పైసా మే సినిమా’... అంటూ పైసల మీద తీస్తున్న ఆ చిత్రాల గురించి తెలుసుకుందాం. వినోదం.. సందేశం వెంకటేశ్, వరుణ్‌ తేజ్‌ హీరోలుగా అనిల్‌ రావిపూడి దర్శకత్వంలో రూపొందిన చిత్రాలు ‘ఎఫ్‌ 2’, ‘ఎఫ్‌ 3’. భార్యాభర్తల అనుబంధాలతో అల్లుకున్న ‘ఎఫ్‌ 2’ అయినా.. వారసత్వం నేపథ్యంతో సాగిన ‘ఎఫ్‌ 3’ అయినా.. ఈ రెండు సినిమాల్లో అంతర్లీనంగా ఉన్న ప్రధానాంశం డబ్బుతో కూడుకున్న అవసరాలేనని ప్రేక్షకులకు అనిపిస్తుంది. ‘ఎఫ్‌ 3’లో అయితే జీవితంలో డబ్బు చాలా ముఖ్యమంటూ ‘లబ్‌ డబ్‌.. లబ్‌ డబ్‌.. డబ్బూ..’ అనే పాట కూడా ఉంది. ఈ చిత్రం ఎండింగ్‌లో ‘ఎఫ్‌ 4’ ఉంటుందన్నట్లుగా పేర్కొన్నారు. వచ్చే ఏడాది ‘ఎఫ్‌ 4’ సినిమా ఆరంభం కానుందట. ‘ఎఫ్‌ 2’, ‘ఎఫ్‌ 3’ల మాదిరిగానే ‘ఎఫ్‌ 4’ ప్రధాన కథాంశం డబ్బే అయ్యుంటుందని ఊహించవచ్చు.   ఖరీదైన భవనాలు.. నోట్ల కట్టలు దర్శకుడు శేఖర్‌ కమ్ముల తెరకెక్కించే చిత్రాలు వినోదంతో పాటు సందేశాత్మకంగానూ ఉంటాయి. ఇక శేఖర్‌ కమ్ముల దర్శకత్వంలో రూపొందనున్న తాజా సినిమాలో ధనుష్‌ హీరోగా నటించనున్న సంగతి తెలిసిందే. ఇందులో రష్మికా మందన్నా హీరోయిన్‌. నాగార్జున ఓ కీలక పాత్రలో నటిస్తారనే ప్రచారం సాగుతోంది. ఇటీవలే ఈ సినిమా కాన్సెప్ట్‌ పోస్టర్‌ను విడుదల చేశారు మేకర్స్‌. ఈ పోస్టర్‌లో ఒకవైపు అత్యంత ఖరీదైన భవనాలు, మరోవైపు మురికి వాడలు.. మధ్యలో నోట్ల కట్టలు కనిపిస్తుంటాయి. సో.. ఈ సినిమా ప్రధాన కథాంశం డబ్బు నేపథ్యంలో ఉంటుందని, సమాజంలో నెలకొన్న అసమానతల కోణంలో కథనం సాగుతుందని ఊహింవచ్చు. వచ్చే ఏడాది ఈ సినిమా రెగ్యులర్‌ షూటింగ్‌ ప్రారంభం కానుందని ఫిల్మ్‌నగర్‌ సమాచారం. జూదం వరుణ్‌ తేజ్‌ హీరోగా నటిస్తున్న తాజా పీరియాడికల్‌ ఫిల్మ్‌ ‘మట్కా’. ఈ పాన్‌ ఇండియన్‌ సినిమాకు ‘పలాస’ ఫేమ్‌ కరుణ కుమార్‌ దర్శకత్వం వహిస్తున్నారు. ఈ సినిమా కాన్సెప్ట్‌ పోస్టర్, టైటిల్‌ని బట్టి ‘మట్కా’ కథ అంతా డబ్బు చుట్టే తిరుగుతుందని తెలుస్తోంది. దేశవ్యాప్తంగా సంచలనం సృష్టించిన కొన్ని వాస్తవ ఘటనల ఆధారంగా ‘మట్కా’ను తెరకెక్కిస్తున్నట్లు, వైజాగ్‌ నేపథ్యంలో 1958 – 1982 టైమ్‌ పీరియడ్‌లో ఈ సినిమా కథనం ఉంటుందన్నట్లు చిత్ర యూనిట్‌ వెల్లడించిన సంగతి తెలిసిందే. ఈ చిత్రంలో మీనాక్షీ చౌదరి, నోరా ఫతేహీ హీరోయిన్లుగా నటిస్తున్నారు. సామాన్యుడి కథ నమ్మశక్యం కాని విధంగా ఉన్నత శిఖరాలకు చేరిన ఒక సాధారణ మనిషి కథగా రూపొందనున్న సినిమా ‘లక్కీ భాస్కర్‌’. దుల్కర్‌ సల్మాన్‌ టైటిల్‌ రోల్‌లో నటించనున్న సినిమా ఇది. ‘లక్కీ భాస్కర్‌’ టైటిల్‌ను గమనిస్తే టైటిల్‌లో డాలర్‌ సింబల్‌ స్పష్టంగా కనిపిస్తుంది. నమ్మశక్యం కాని విధంగా ఉన్నత శిఖరాలకు చేరిన వ్యక్తి కథ అంటూ చిత్ర యూనిట్‌ పేర్కొంది. సో..‘లక్కీ భాస్కర్‌’ కథలోని ప్రధానాంశం డబ్బే అని తెలుస్తోంది. వెంకీ అట్లూరి దర్శకత్వంలో సూర్యదేవర నాగవంశీ, సాయి సౌజన్య ఈ చిత్రాన్ని నిర్మించనున్నారు. డాలర్‌ కుమార్‌ ‘బిగ్‌ బాస్‌’ షో ఫేమ్‌ వీజే సన్నీ హీరోగా నటిస్తున్న తాజా చిత్రం ‘సౌండ్‌ పార్టీ’. ఏ ట్విస్టెడ్‌ ఫ్యామిలీ స్టోరీ అనేది ఉపశీర్షిక. హ్రితికా శ్రీనివాస్‌ హీరోయిన్‌గా నటిస్తున్న ఈ సినిమాకు సంజయ్‌ శేరి దర్శకత్వం వహిస్తున్నారు. ఈ సినిమాలో డాలర్‌ కుమార్‌ అనే పాత్రలో నటిస్తున్నారు వీజే సన్నీ. ఇప్పటికే విడుదలైన ఈ సినిమా పోస్టర్స్‌లో డబ్బు కనిపిస్తుండటం ‘సౌండ్‌ పార్టీ’ ప్రధాన కథాంశం డబ్బేఅని స్పష్టం చేస్తోంది. డబ్బే ప్రధానాంశంగా సాగే మరికొన్ని సినిమాలు ఉన్నాయి. 

ఎవరు అవునన్నా, కాదన్నా సినిమా అనేది గ్లామర్‌ ప్రపంచమే. సినిమాల్లో గ్లామర్‌ అనేది సింహభాగాన్నే పోషిస్తోంది. ఇటీవల ఒక దర్శకుడు హీరోయిన్లున్నది అందాలారబోత కోసమేనని, ప్రేక్షకులు వారిని అలానే కోరుకుంటారని బహిరంగంగానే అన్నారు. ఆ తరువాత హీరోయిన్ల ఆగ్రహానికి గురైయ్యారనుకోండి. అది వేరే విషయం. వాస్తవం ఏమిటంటే ఈ తరం హీరోయిన్లు వ్యాంప్‌ పాత్రల నటీమణులను మరిపిస్తున్నారని చెప్పకతప్పదు. అదే మంటే పాత్రల డిమాండ్‌ మేరకే, దర్శక నిర్మాతల కోరిక కారణంగానే అంటూ సాకులు వెతుక్కునే ప్రయత్నాలు చేస్తుంటారు. నటి శ్రియ తాజాగా ఫొటో సెషన్‌ చేసి మరీ తీయించుకున్న స్టిల్స్‌ను చూసిన వారెవరైనా అలానే అనుకుంటారు.  ఈ ఉత్తరాది భామ మంచి నటే. కాదనే సాహసం ఎవరూ చేయరు. బహుభాషా నటి కూడా తెలుగు, తమిళం, హిందీ అంటూ పలు భాషల్లో ప్రముఖ హీరోలతో జతకట్టి మెప్పించారు. ముఖ్యంగా కోలీవుడ్‌లో సూపర్‌స్టార్‌ రజనీకాంత్‌ నుంచి, విజయ్, ధనుష్‌ అంటూ పలువురు స్టార్‌లతో నటించారు.  నాలుగు దశాబ్దాల (37) వయసు దగ్గర పడుతున్న ఈ ప్రౌఢ ఇప్పటికీ హీరోయిన్‌గా బిజీగానే ఉన్నారు. ఇటీవల తెలుగులో పైసా వసూల్‌ అంటూ బాలకృష్ణతో చిందులేసిన శ్రియ తాజాగా రెండు తెలుగు, ఒక తమిళం, ఒక హిందీ అంటూ నాలుగు చిత్రాల్లో నటిసున్నారు. అయినా ఇంకొంత కాలం అగ్రనాయకిగానే రాణించాలన్న కోరికో, లేక తనలో అందాలింకా తగ్గలేదనిపించుకోవాలన్న ఆశనో గానీ, నా అందం చూడండయ్యా అన్నట్లుగా టాప్‌లెస్‌గా అర్ధనగ్న ఫోజులతో ఫొటో తీయించుకుని వాటిని సోషల్‌ మీడియాలకు అందే లా చేసుకున్నారు. ఆ ఫొటోలను నెటిజన్లు తమ వెబ్‌సైట్లలో దుమ్మురేపుతున్నారు. వీటిని చూసిన కొందరు అభిమానులు ముఖం చిట్లించుకుంటున్నారు.  ఆ ఫొటోలను మస్త్‌గా ఎంజాయ్‌ చేసే వారూ లేకపోలేదు. మొత్తం మీద శ్రియ ఈ విధంగా కలకలం రేపుతున్నారన్నమాట.


 ఇటీవల వరుస ఫెయిల్యూర్స్ తో కష్టాల్లో పడ్డ దర్శకుడు పూరి జగన్నాథ్, పైసా వసూల్ సినిమాతో పరవాలేదనిపించాడు. మరోసారి రోటీన్ కథతో నిరాశపరిచినా నందమూరి బాలకృష్ణను సరికొత్తగా చూపించి అభిమానులను మెప్పించాడు. పైసా వసూల్ తరువాత ఇంత వరకు తన నెక్ట్స్ సినిమాను ఎనౌన్స్ చేయని పూరి, త్వరలోనే తన కొడుకు ఆకాష్ హీరోగా ఓ సినిమాను స్టార్ట్ చేసే పనిలో ఉన్నాడట.
 
 అయితే మాస్ యాక్షన్ సినిమాలతో బోర్ కొట్టించిన పూరి కొడుకు రీలాంచ్ కోసం రూట్ మారుస్తున్నాడన్న టాక్ వినిపిస్తుంది. ఒకప్పుడు ఇట్లు శ్రావణీ సుబ్రమణ్యం, ఇడియట్, శివమణి లాంటి హార్ట్ టచింగ్ లవ్ స్టోరీలతో అలరించిన పూరి మరోసారి అదే తరహా సినిమాకు రెడీ అవుతున్నాడు. ఇండియా అబ్బాయి, పాకిస్తాన్ అమ్మాయిల మధ్య ప్రేమ కథతో తన ఆకాష్ ను రీలాంచ్ చేసేందుకు ప్లాన్ చేస్తున్నారు. ప్రస్తుతం హీరోయిన్ ను సెలెక్ట్ చేసే పనిలో ఉన్నారని తెలుస్తోంది. త్వరలోనే ఈ మూవీపై అధికారిక ప్రకటన వచ్చే అవకాశం ఉంది.


 ‘‘బాలయ్యకు నేను బాగా నచ్చేశాను. మళ్లీ మనం మరో సినిమా చేద్దామన్నారు. బాలయ్య 103వ సినిమా ప్లాన్‌ చేస్తున్నా’’ అన్నారు పూరి జగన్నాథ్‌. బాలకృష్ణ హీరోగా ఆయన దర్శకత్వంలో వి. ఆనందప్రసాద్‌ నిర్మించిన ‘పైసా వసూల్‌’ గత శుక్రవారం విడుదలైంది. సిన్మాకు ప్రేక్షకుల నుంచి మంచి స్పందన లభిస్తోందంటూ పూరి చెప్పిన విశేషాలు...
 
 ► బాలయ్యను దృష్టిలో పెట్టుకునే ‘తేడా సింగ్‌’ క్యారెక్టర్‌ డిజైన్‌ చేశా. నాకు ఆయన నవ్వంటే చాలా ఇష్టం. నవ్వును హైలైట్‌ చేస్తూ సీన్లు రాశా. అభిమానులతోపాటు ప్రేక్షకులు కూడా సిన్మాను ఎంజాయ్‌ చేస్తున్నారు. బ్యాంకాక్‌కు వీడియోకాల్‌ చేశా. ‘జై బాలయ్య’ అన్నప్పుడల్లా అరుపులే.
 
 ► బాపుగారి సినిమాలు ఓ స్టైల్‌లో, వర్మగారి సినిమాలు మరో స్టైల్‌లో ఉంటాయి. ఒక్కొక్కరిదీ ఒక్కో స్టైల్‌. నా స్టైల్‌ నాది. నా గత సినిమాల్లో డాన్స్, గన్స్‌ ఉన్నాయి కనుక కొందరు వాటితో పోలుస్తున్నారు
 
 ► బాలయ్యకు క్రమశిక్షణ ఎక్కువ. లోపల ఒకటి, బయటకు ఇంకొకటి మాట్లాడే వ్యక్తి కాదు. సెట్‌లోకి వచ్చినప్పుడు, సెట్‌ నుంచి వెళ్లేటప్పుడు అందర్నీ పలకరిస్తారు. బాలయ్యను దగ్గర్నుంచి చూస్తే ఎవరైనా లవ్‌లో పడతారు. ఆయనలో మంచి లక్షణాలెన్నో ఉన్నాయి. ఇవన్నీ ఎవరూ రాయరు. ఎవర్నో కొట్టారని మాత్రం రాస్తారు
 
 ► నెక్ట్స్‌ ఆకాశ్‌ హీరోగా ఓ ప్రేమకథ ప్లాన్‌ చేస్తున్నా. తమ్ముడైనా, కొడుకైనా... నా కథేంటి? క్యారెక్టర్‌ ఏంటి? అనడుగుతారు కదా! చెప్పాలి.
 
 ‘‘డ్రగ్స్‌ ఇష్యూలో ఎంక్వయిరీ కోసం పిలిస్తే... నాపై చాలా స్టోరీలు చేశారు. బాధపడ్డా. అది అసలు కేసే కాదు. ఇవాళ గడవడం కోసం ఏదొకటి చేయడం తప్పు అని నా అభిప్రాయం’’


 నందమూరి బాలకృష్ణ హీరోగా తెరకెక్కిన లేటెస్ట్ మాస్ యాక్షన్ ఎంటర్టైనర్ పైసా వసూల్. పూరి జగన్నాథ్ దర్శకత్వంలో తెరకెక్కిన ఈ సినిమాకు తొలి రోజు డివైడ్ టాక్ వచ్చినా.. కలెక్షన్లు మాత్రం భారీ స్థాయిలో వచ్చాయి. పూరి, బాలయ్యల కాంబినేషన్ పై భారీ హైప్ క్రియేట్ అవ్వటంతో పాటు టీజర్, ట్రైలర్ కు మంచి రెస్పాన్స్ రావటంతో బాలయ్య కెరీర్ లోనే అత్యధిక ఓపెనింగ్స్ సాధించిన సినిమాగా రికార్డ్ సృష్టించింది పైసా వసూల్.
 
 తొలి రోజు రెండు తెలుగు రాష్ట్రాల్లో కలిపి ఏకంగా 12 కోట్లకు పైగా గ్రాస్ సాధించింది పైసా వసూల్. బాలయ్య సరసన అందాల భామలు శ్రియ, ముస్కాన్, కైరా దత్ లు నటించిన ఈ సినిమాలో విక్రమ్ జీత్ ప్రతినాయకుడిగా కనిపించాడు. అనూప్ రుబెన్స్ సంగీతమందించాడు. శనివారం కూడా మంచి వసూళ్లు నమోదవుతుండటంతో తొలి వారాంతానికి పైసా వసూల్ భారీ వసూళ్లు నమోదు చేస్తుందని భావిస్తున్నారు.

టైటిల్ : పైసా వసూల్ జానర్ : మాస్ యాక్షన్ డ్రామా తారాగణం : బాలకృష్ణ, శ్రియ, ముస్కాన్ సేథి, కైరా దత్, విక్రమ్ జీత్, కబీర్ బేడీ సంగీతం : అనూప్ రుబెన్స్ దర్శకత్వం : పూరి జగన్నాథ్ నిర్మాత : వి. ఆనంద్ ప్రసాద్ తన వందో సినిమాగా తెరకెక్కిన గౌతమిపుత్ర శాతకర్ణి సినిమాతో ఘనవిజయం సాధించిన నందమూరి బాలకృష్ణ, తన 101 చిత్రాన్ని పూరి జగన్నాథ్ దర్శకత్వంలో చేస్తున్నానంటూ ఎనౌన్స్ చేసి అందరికి షాక్ ఇచ్చాడు. కొద్ది రోజులుగా సక్సెస్ కు దూరమై ఇబ్బందుల్లో ఉన్న పూరి బాలయ్యతో అయినా సక్సెస్ సాధించాడా..? పూరి స్టైల్ హీరోయిజంలో బాలకృష్ణ సూట్ అయ్యాడా..? పైసా వసూల్... పైసలు వసూల్ చేసే సినిమా అనిపించుకుంటుందా..? కథ : పోర్చుగల్ లో ఉండే అంతర్జాతీయ డాన్ బాబ్ మార్లే (విక్రమ్ జీత్) ఇండియాలో తన నెట్ వర్క్ ద్వారా ఎన్నో క్రైమ్స్ చేస్తుంటాడు. గవర్నమెంట్ లోని కొందరు వ్యక్తులు బాబ్ మార్లేకు సపోర్ట్ చేస్తుండటంతో పోలీస్ డిపార్ట్ మెంట్ కూడా ఏం చేయలేకపోతుంది. దీంతో రా ఆఫీసర్ (కబీర్ బేడీ) బాబ్ మార్లేను అంతం చేయడానికి ఓ ప్రవేట్ వ్యక్తిని నియమించాలనుకుంటాడు. అదే సమయంలో తీహార్ జైలు నుంచి రిలీజ్ అయి వచ్చిర తేడాసింగ్ (నందమూరి బాలకృష్ణ) ఏసీపీ కిరణ్మయి(కైరా దత్) కి కనబడతాడు. తేడా సింగ్ క్రిమినల్ రికార్డ్ విని, అతడి యాటిట్యూడ్ చూసిన ఏసీపీ తమ ఆపరేషన్ కు ఇతడే కరెక్ట్ అని ఫిక్స్ అవుతుంది. రా ఆఫీసర్స్ డీల్ నచ్చిన తేడా సింగ్ బాబ్ మార్లేను చంపేందుకు ఒప్పుకుంటాడు. పోర్చుగల్ లో ఉంటున్న బాబ్ మార్లేను తేడా సింగ్ ఎలా అంతం చేశాడు..? అసలు తేడా సింగ్ ఎవరు..? ఓ అంతర్జాతీయ డాన్ ను అంతం చేసే డీల్ ఎందుకు అంగీకరించాడు.? అన్నదే మిగతా కథ. నటీనటులు : మొదటి నుంచి చిత్రయూనిట్ చెపుతున్నట్టుగా ఇది పూర్తిగా బాలయ్య వన్ మేన్ షో. ఇన్నాళ్లు మాస్, సీరియస్ పాత్రలో చూసిన బాలయ్య, పైసా వసూల్ సినిమాలో చాలా కొత్తగా కనిపించాడు. కామెడీ, యాక్షన్ లో అభిమానులతో విజిల్స్ వేయించాడు. పూరి మార్క్ హీరోయిజంలో ఒదిగిపోయిన బాలకృష్ణ, తన స్టైల్ మాస్ ఎలిమెంట్స్ మిస్ అవ్వకుండా జాగ్రత్తపడ్డాడు. పేరుకు ముగ్గురు హీరోయిన్స్ ఉన్నా.. ఎక్కువగా శ్రియ పాత్రే గుర్తుండిపోతుంది. శ్రియ నటనతో పాటు గ్లామర్ తోనూ ఆకట్టుకుంది. ముస్కాన్, కైరా దత్ లకు పెద్దగా నటనకు అవకాశం లేదు. విలన్ రోల్ లో విక్రమ్ జీత్ పర్ఫెక్ట్ గా సూట్ అయ్యాడు. రా ఆఫీసర్ గా కబీర్ బేడి చిన్న పాత్రలో కనిపించినా ఉన్నంతలో ఆకట్టుకున్నాడు. తొలి భాగంలో 30 ఇయర్స్ పృధ్వీ, సెకండ్ హాఫ్ లో ఆలీ కామెడీతో ఆకట్టుకునే ప్రయత్నం చేశారు. సాంకేతిక నిపుణులు : బాలయ్య అభిమానుల కోసం పైసా వసూల్ అంటూ ముందే ప్రకటించిన పూరి జగన్నాథ్, అభిమానులను దృష్టిలో పెట్టుకొని కథా కథనాలు రెడీ చేశాడు. ముఖ్యంగా ఫ్యాన్స్ ను ఉర్రూతలూగించే డైలాగ్స్ తో ఆకట్టుకున్నాడు. హీరో క్యారెక్టరైజేషన్, లుక్  లో పూరి గత చిత్రాల హీరోల ఛాయలు కనిపించినా.. డైలాగ్స్ లో మాత్రం చాలా  కొత్త దనం చూపించాడు. అయితే కథ పాతదే కావటం కాస్త నిరాశపరిచినా పూరి టేకింగ్, రిచ్ విజువల్స్ ఆకట్టుకుంటాయి. సినిమాకు మరో ప్రధాన ఎసెట్ ముఖేష్ జి సినిమాటోగ్రఫి బాలయ్యను చాలా స్టైలిష్ గా చూపించిన సినిమాటోగ్రాఫర్, యాక్షన్స్ సీన్స్ తో ఆకట్టుకున్నాడు. పోర్చుగల్ లో తీసిన చేజ్ సీన్స్ సూపర్బ్ అనిపిస్తాయి. అనూప్ రుబెన్స్ సంగీతం పరవాలేదు. ఎడిటింగ్, నిర్మాణ విలువలు సినిమా స్థాయికి తగ్గట్టుగా ఉన్నాయి. ప్లస్ పాయింట్స్ : బాలకృష్ణ నటన డైలాగ్స్ యాక్షన్ సీన్స్ మైనస్ పాయింట్స్ : మెయిన్ స్టోరి పూరి గత చిత్రాల ఛాయలు కనిపించటం పైసా వసూల్..  తేడాసింగ్ అభిమానులను అలరిస్తాడు.. - సతీష్ రెడ్డి జడ్డా, ఇంటర్నెట్ డెస్క్


 హైదరాబాద్‌: నగరంలోని కూకట్‌పల్లి భ్రమరాంబ థియేటర్‌లో సినీ హీరో నందమూరి బాలకృష్ట సందడి చేశారు. పూరి జగన్నాథ్‌ దర్శకత్వంలో బాలకృష్ణ నటించిన పైసా వసూల్‌ చిత్రం ఈ రోజు విడుదలైంది. చిత్రయూనిట్‌తో కలిసి బాలయ్య ప్రేక్షకుల మధ్యలో కూర్చొని సినిమా చూస్తున్నారు. తమ హీరో వస్తున్నాడని తెలుసుకున్న అభిమానులు  పెద్ద సంఖ్యలో థియేటర్‌ వద్దకు చేరుకున్నారు.
 
 
 భవ్య క్రియేషన్స్‌ పతాకంపై వి. ఆనందప్రసాద్‌ పైసా వసూల్‌ సినిమాను నిర్మించారు. ఈ సినిమాలో శ్రియ, ముస్కాన్‌, కైరా దత్‌ హీరోయిన్లుగా నటించారు. ఈ చిత్రానికి అనూప్‌ రూబెన్స్‌ సంగీతం అందించారు.


 12 ఏళ్లుగా హీరోయిన్గా కొనసాగుతున్న సీనియర్ బ్యూటీ శ్రియ, ఇన్నేళ్ల తరువాత తనకు నచ్చిన కథ దొరికిందని చెపుతున్నారు. కెరీర్లో ఎక్కువగా గ్లామర్ రోల్స్ మాత్రమే చేసిన ఈ బ్యూటీ, పవిత్ర లాంటి ప్రయోగాలు చేసిన పెద్దగా వర్క్ అవుట్ కాలేదు. ప్రస్తుతం సీనియర్ హీరోలతో జతకడుతూ బిజీగా ఉన్న శ్రియ త్వరలో ఓ ఆసక్తికరమైన సినిమాలో కనిపించనుందట.
 
 ప్రస్తుతం బాలకృష్ణ సరసన నటించిన పైసా వసూల్ రిలీజ్ కోసం వెయిట్ చేస్తున్న శ్రియ, సైకో థ్రిల్లర్గా తెరకెక్కుతున్న సినిమాలో లీడ్ రోల్ లో నటించనున్నారు. ఈ సినిమాతో ఏ 23 ఏళ్ల కుర్రాడు దర్శకుడిగా పరిచయం కానున్నాడని హింట్ ఇచ్చిన శ్రియ త్వరలోనే మరిన్ని వివరాలు ప్రకటించనున్నారని తెలిపారు. లేడీ ఓరియంటెడ్ సినిమాగా తెరకెక్కుతున్న ఈ సినిమాతో తొలిసారిగా అభిమానులను భయపెట్టేందుకు రెడీ అవుతున్నారు శ్రియ.


 చెన్నై: పంతొమ్మిదేళ్ల వయసులోనే ‘ఇష్టం’ సినిమాతో హీరోయిన్‌గా వెండితెరకు పరిచయమైన శ్రియా శరణ్‌.. మరికొద్ది రోజుల్లో 35వ పడిలోకి అడుగుపెట్టనున్నారు. తన 16 ఏళ్ల సినీ కెరీర్‌లో ఎన్నో ఉత్థానపతనాలు చవిచూసిన ఆమె.. తాజాగా బాలకృష్ణ సరసన ‘పైసా వసూల్‌’ లో నటించారు. కాగా, తాను త్వరలోనే పెళ్లి చేసుకోబోతున్నట్లు ఆమె చెప్పుకొచ్చారు.
 
 తెలుగులో ‘ఇష్టం’, తమిళంలో ‘ఎనక్కు 20 ఉనక్కు18’ లతో ఎంట్రీ ఇంచ్చి, అనతి కాలంలోనే స్టార్‌ డైరెక్టర్‌ శంకర్‌ రూపొందించిన ‘శివాజీ’లో సూపర్‌స్టార్‌ రజనీకాంత్‌తో జత కట్టే లక్కీఛాన్స్‌ దక్కించుకున్నారు శ్రియా. తెలుగులోనూ చిరంజీవి, నాగార్జున, బాలకృష్ణ, వెంకటేశ్‌, మహేశ్‌బాబు, ప్రభాస్‌, రవితేజ, ఎన్టీఆర్‌ లాంటి స్టార్‌లు అందరితోనూ తెరపంచుకున్నారు. అటు బాలీవుడ్‌లోనూ అప్పుడప్పుడూ అదృష్టాన్ని పరీక్షించుకున్నారు. కెరీర్‌ మొత్తంలో మర్చిపోలేని అనుభవం ఏదైనా ఉందంటే.. సూపర్‌స్టార్‌ రజనీతో కలిసి నటించడమేనని శ్రియా అన్నారు.  
 
 ‘‘చాలా మంది పెళ్లి ఎప్పుడు? అని అడుగుతుంటారు. అవును.. పెళ్లికి సిద్ధంగా ఉన్నా. నచ్చినవాడు తారాసపడిన వెంటనే వివాహం చేసుకుంటా. స్త్రీ జీవితంలో పెళ్లి, పిల్లలు చాలా ముఖ్యం కదా. నాకు కాబోయే భర్త మంచి స్నేహితుడై ఉండాలి’’ అని శ్రియా చెప్పారు.
 
 రహస్యం ఇదే: అందంలోని రహస్యం ఏమిటని అడుగుతుంటారనీ, తన అందానికి ప్రధాన కారణం యోగానేననీ చెప్పింది. యోగా తన జీవితంలో చాలా మార్చు తీసుకొచ్చిందనీ, ఉద్రేకాలను అదుపు చేసుకోవడానికి యోగా ఎంతగానో ద్రోహదపడుతుందని తెలిపారు.
 
 డ్రగ్స్‌పై: ఈ తరం యువత మాదక ద్రవ్యాల బారిన పడి జీవితాలను నాశనం చేసుకోవడం బాధగా ఉందనీ, ఎలాంటి చెడు అలవాట్లకు అలవాటు పడకుండా యువత చక్కగా చదువుపైనే దృష్టి సారించాలని శ్రియ హితవు పలికారు. కుటుంబంలో ఒక్కరు డ్రగ్స్‌కు అలవాటు పడితే ఆ కుటుంబం అంతా బాధింపుకు గురౌతుందన్నది తెలుసుకోవాలని ఆమె పేర్కొన్నారు.
 
 ఐ లవ్‌ ఇట్‌: ఇండస్ట్రీలోకి వచ్చి ఎంతోకాలమైనా తానిప్పటికీ నటనను ప్రేమిస్తున్నాననీ, వృత్తిని గౌరవించేవాళ్లకు అది ఎప్పటికీ బోర్‌ కొట్టదని శ్రియ అన్నారు. తానిక్కడ ఒంటరిగానే జయించానని, ఏనాడూ చేదు అనుభవాలు చవిచూడలేదని, నటిగా నిలదొక్కుకోవడంలో సహ నటీనటులు, దర్శక నిర్మాతలు సహకరించారని చెప్పుకొచ్చారు.


  – మోహన్‌బాబు
 ‘‘బాలయ్య ఒక చరిత్ర సృష్టించాడు. సిల్వర్‌జూబ్లీ, గోల్డెన్‌జూబ్లీ రికార్డులు క్రియేట్‌ చేశాడు. ఇది నిజం... డబ్బులు ఇచ్చి సినిమాలు ఆడించలేదు’’ అని మంచు మోహన్‌బాబు అన్నారు. బాలకృష్ణ హీరోగా పూరి జగన్నాథ్‌ దర్శకత్వంలో వి. ఆనందప్రసాద్‌ నిర్మించిన సినిమా ‘పైసా వసూల్‌’. అనూప్‌ రూబెన్స్‌ స్వరకర్త. ఆదివారం రాత్రి హైదరాబాద్‌లో ఆడియో సెలబ్రేషన్స్‌ జరిగాయి.
 
 మోహన్‌బాబు మాట్లాడుతూ– ‘‘ప్రపంచం గర్వించదగ్గ మహానటుడు మా అన్నయ్య ఎన్టీఆర్‌. ఆయన కుమారుడు బాలయ్య ఎంతో ప్రేమగా, ఆప్యాయంగా నన్ను పిలవడంతో చెన్నై వెళ్లాల్సి ఉన్నా... ఇది నా ఇంటి ఫంక్షన్‌ కాబట్టి వచ్చా. ‘పైసా వసూల్‌’ 101కోట్ల కంటే ఎక్కువ వసూలు చేయాలి’’ అన్నారు. బాలకృష్ణ మాట్లాడుతూ– ‘‘నాకు మోహన్‌బాబుగారితో చనువు ఎక్కువ. ఆయన్ను తరచూ కలుస్తుంటా. నేనెక్కువగా కథలు, సినిమాల గురించి ఆలోచించను. నాకు, పూరీకి  మధ్య ఈ కథ గురించి ఎక్కువ డిస్కషన్‌ జరగలేదు. చేసేద్దామనుకుని మొదలుపెట్టాం. మా ఇద్దరికీ పని తప్ప వేరే ఆలోచన లేదు.
 
 నిర్మాత బాగుండాలన్నదే మా తపన. అభిమానులు, ప్రేక్షకులు నా నుంచి ఆశించే అన్ని హంగులూ ఉన్న చిత్రమిది’’ అన్నారు.  ‘‘బాలయ్య బాబుతో సినిమా చేయాలనే కోరిక ఈ ‘పైసా వసూల్‌’తో తీరింది. ఆయనతో మరెన్నో సినిమాలు చేసే ఛాన్స్‌ ఇస్తారని ఆశిస్తున్నా. చెన్నైలో స్టంట్‌ మాస్టర్‌ అసోసియేషన్‌ 50 వసంతాల సభకు బాలయ్య బాబు, మంచు విష్ణుగారు హాజరయ్యారు. వాళ్ల నాన్నగారి బయోపిక్‌ గురించి అక్కడి వారితో కొంత డిస్కస్‌ చేశారు. బాలయ్యబాబు 101వ సినిమా సందర్భంగా ఆయన అభిమానుల్లో 101మంది మెరిట్‌ స్టూడెంట్స్‌కు రూ. పదివేల చొప్పున అందజేయాలని అనుకుంటున్నాం.
 
 సెప్టెంబర్‌ 1న పూరీగారు పండగ తీసుకొస్తున్నారు’’ అన్నారు నిర్మాత. ‘‘నా లైఫ్‌లో... ‘లైట్‌ పోతుంది, త్వరగా షాట్‌ తీద్దాం రండి’ అని అందర్నీ పిలిచి కెమెరా ముందుకెళ్లి నిలబడిన ఏకైక హీరో బాలకృష్ణగారు.‘నిర్మాతల డబ్బు వృథా కాకూడదు’ అని ఫీలయ్యే వ్యక్తి. ఇలాంటి హీరోను నేనిప్పటివరకు చూడలేదు. ఆయన క్రమశిక్షణ, అంకితభావం అమేజింగ్‌. సేమ్‌ డెడికేషన్‌ ఇంతకు ముందు మోహన్‌బాబు గారిలో చూశా’’ అన్నారు పూరి. దర్శకుడు ఎ. కోదండరామిరెడ్డి,  నాయికలు శ్రియ, కైరా దత్, ముస్కాన్, నటుడు అలీ, ఎగ్జిక్యూటివ్‌ నిర్మాత అన్నే రవి, లైన్‌ ప్రొడ్యూసర్‌ చార్మీ కౌర్, పాటల రచయితలు భాస్కరభట్ల, పులగం చిన్నారాయణ తదితరులు పాల్గొన్నారు.


 నందమూరి బాలకృష్ణ హీరోగా పూరి జగన్నాథ్ దర్శకత్వంలో తెరకెక్కుతున్న సినిమా పైసా వసూల్. ఈ కాంబినేషన్ లో సినిమా ప్రకటించిన దగ్గర నుంచే భారీ హైప్ క్రియేట్ అయ్యింది. షూటింగ్ మొదలైన రోజే రిలీజ్ డేట్ ను ప్రకటించిన దర్శకుడు అంతకన్న నెల రోజుల ముందే సినిమాను రిలీజ్ చేస్తున్నట్టుగా ప్రకటించి అందరికీ షాక్ ఇచ్చాడు. టీజర్ తో బాలయ్య అభిమానులను ఫుల్ ఖుషీ చేశాడు.
 
 గురువారం జరిగిన ఆడియో వేడుకలో విడుదల చేసిన ట్రైలర్ వెంటనే హిట్ అయిపోయింది. బాలయ్య చెప్పిన డైలాగ్స్ మాస్ జనానికి పూనకాలు తెప్పిస్తున్నాయి. సినిమాలో బాలయ్య చెప్పే డైలాగ్స్ రిలీజ్ చేయాలంటే ఓ సీడీ సరిపోదంటూ హింట్ ఇచ్చిన దర్శకుడు, ట్రైలర్లోనే బాలయ్యతో పేజీల కొద్ది డైలాగ్స్ చెప్పించాడు. టీజర్ తోనే రికార్డ్ ల వేట మొదలు పెట్టిన బాలకృష్ణ, తాజాగా ట్రైలర్ తో దండయాత్ర చేస్తున్నాడు.
 
 ఆన్‌లైన్‌లో రిలీజ్ అయిన 75 నిమిషాల్లోనే 5 లక్షలకు పైగా వ్యూస్ సాధించిన పైసా వసూల్ ట్రైలర్, కేవలం 4 గంటల్లోనే 10 లక్షల వ్యూస్ ను సాధించింది. బాలకృష్ణ సరసన శ్రియ, ముస్కాన్, కైరా దత్ లు హీరోయిన్లుగా నటిస్తున్న ఈ సినిమా సెప్టెంబర్ 1న రిలీజ్ కు రెడీ అవుతోంది.


 – నందమూరి బాలకృష్ణ
 సినిమా అనేది పార్టీలకు, ఫ్యాన్స్‌కు అతీతం. మనకున్న మంచి సంగీత దర్శకుల్లో అనూప్‌ రూబెన్స్‌ ఒకరు. మంచి పాటలిచ్చారు. నేనెప్పుడూ నా ప్రేక్షకులను, నా అభిమానులను దృష్టిలో పెట్టుకుని సినిమాలు చేస్తాను’’ అని నందమూరి బాలకృష్ణ అన్నారు. ఆయన హీరోగా పూరి జగన్నాథ్‌ దర్వకత్వంలో వి.ఆనందప్రసాద్‌ నిర్మించిన చిత్రం ‘పైసా వసూల్‌’. సెప్టెంబర్‌ 1న విడుదల కానున్న ఈ చిత్రం ఆడియో వేడుక ఖమ్మంలో జరిగింది.
 
 ఆడియో సీడీని దర్శకుడు బోయపాటి శ్రీను ఆవిష్కరించి, మాజీ ఎంపీ నామా నాగేశ్వరరావుకు అందజేశారు. బాలకృష్ణ మాట్లాడుతూ – ‘‘నువ్వు ఎవరు? అని అడిగితే భారతీయుణ్ణి అంటాను. ఇంకోసారి ఎవరు? అనడిగితే ‘తెలుగువాణ్ణి’ అని, మళ్లీ నువ్వు ఎవరు? అని అడిగితే నందమూరి తారకరామారావుగారి కొడుకుని అని చెబుతాను. మళ్లీ మళ్లీ నువ్వు ఎవరు? అనడిగితే అన్న (నందమూరి తారకరామారావు) అభిమానిని అని చెబుతాను.
 
 ఆయన బిడ్డగా, కళాతమతల్లి బిడ్డగా రావడం ఆనందంగా ఉంది. నటీనటుల నుంచి మంచి హావభావాలు రాబట్టుకోగల సమర్థుడు పూరి. ఈ 101వ సినిమా నాకు ఒకటో సినిమాతో సమానం. ఈ సినిమా  ‘రీ–లాంచింగ్‌ ఆఫ్‌ బాలకృష్ణ’ అవుతుంది. నటుడు నిత్యావసర సరుకులాంటి వాడు. ఎప్పుడూ విజ్ఞానాన్ని, వినోదాన్ని ఇస్తుండాలి. సెట్‌లో నిర్మాత మంచి వాతావరణాన్ని సృష్టించారు’’ అన్నారు. నిర్మాత మాట్లాడుతూ– ‘‘అందరూ బాలయ్యకు కోపం అంటుంటారు.
 
 అవును.. కోపమే. దానికి కారణం ఉంటుంది. ఆయన మాటిస్తే హరిశ్చంద్రుడు. ఎదుటివారు మాట తప్పితే విశ్వామిత్రుడు. ఆ నిజం తెలిసినవారు ఆయనతో పని చేస్తే అద్భుతాలు చూడగలరు’’ అన్నారు. పూరి జగన్నాథ్‌ మాట్లాడుతూ– ‘‘ఇన్నేళ్లుగా బాలయ్యతో ఎందుకు పని చేయలేదని బాధపడ్డాను. అంత మంచి మనిషి. కోపం వచ్చినా ముఖం మీదే. ప్రేమ వచ్చినా ముఖం మీదే. ముక్కుసూటి మనిషి. ఇది ఆయనకు 101వ సినిమా. కానీ, దూకుడు చూస్తుంటే ఫస్ట్‌ సినిమా అనిపించింది.
 
 వేరే హీరోలు బయటకు వెళితే బౌన్సర్లు కావాలేమో! బాలయ్యకు అవసరం లేదు. ఫ్యాన్స్‌ను ఆయనే కంట్రోల్‌ చేసుకోగలరు. మీద పడుతుంటే కొడుతుంటారు. కామన్‌సెన్స్‌ ఏరియాలో తేడా వచ్చినప్పుడు మాత్రమే కొడతారు. ఫ్యాన్స్‌ కూడా ఎంజాయ్‌ చేస్తారు. బాలయ్యకు, ఫ్యాన్స్‌కు ఉన్న రిలేషన్‌ అది. భవిష్యత్‌లో బాలయ్య ఎవరినన్నా కొడితే అది లవ్‌స్టోరి. సీరియస్‌గా తీసుకోవద్దు. కోకోకోలా పెప్సీ.. బాలయ్య బాబు సెక్సీ. సినిమా హిట్టవ్వాలని కోరుకుంటున్నా’’ అన్నారు.


 నందమూరి బాలకృష్ణ హీరోగా డాషింగ్ డైరెక్టర్ పూరి జగన్నాథ్ దర్శకత్వంలో తెరకెక్కుతున్న సినిమా పైసా వసూల్. అనుకున్న సమయం కన్నా నెల రోజులు ముందుగా రిలీజ్ అవుతున్న ఈ సినిమా ప్రమోషన్ కార్యక్రమాలు కూడా మొదలయ్యాయి. ఔట్ అండ్ ఔట్ మాస్ మాసాలా ఎంటర్ టైనర్ గా తెరకెక్కిన ఈ సినిమాలో శ్రేయా, ముస్కాన్ లు హీరోయిన్లుగా నటిస్తుండగా  కైరా దత్ ఐటెం సాంగ్ తో అలరించనుంది.
 
 అనూప్ రూబెన్స్ సంగీతం అందించిన ఈ సినిమా స్టంపర్ కు సూపర్బ్ రెస్పాన్స్ వచ్చింది. తాజాగా టైటిల్ సాంగ్ ప్రోమో విడుదల చేశారు. 'నే అడుగెడితే.. షో మొదలెడితే.. అరె గుండీలు తీసి కాలరు ఎగరేస్తే..' అంటూ సాగే ఈ పాట నందమూరి అభిమానులను ఉర్రూతలూగిస్తోంది. ఆగస్టు 17న ఈ సినిమా ఆడియో వేడుక ఖమ్మంలో అభిమానుల సమక్షంలో నిర్వహించనున్నారు.
  


 హీరో బాలకృష్ణ, దర్శకుడు పూరి జగన్నాథ్, భవ్య క్రియేషన్స్‌ అధినేత వి. ఆనందప్రసాద్‌లు ఈ నెల 17న హైలికాఫ్టర్‌లో హైదరాబాద్‌ టు ఖమ్మం వెళ్లనున్నారు. ఎందుకంటే... ఈ ముగ్గురి కలయికలో రూపొందిన ‘పైసా వసూల్‌’ పాటల్ని ఖమ్మంలోనే విడుదల చేయనున్నారు. అంటే... ఈ హెలికాఫ్టర్‌ జర్నీ ఆడియో జర్నీ అన్నమాట.
 
 ఈ సందర్భంగా వి. ఆనందప్రసాద్‌ మాట్లాడుతూ– ‘‘బాలకృష్ణగారి ఇమేజ్, పూరిగారి స్టోరీ స్టైల్‌కి తగ్గట్టు అనూప్‌ రూబెన్స్‌ అద్భుతమైన పాటల్ని స్వరపరిచారు. ఖమ్మంలో నందమూరి అభిమానులు, ప్రేక్షకుల సమక్షంలో జరగనున్న భారీ వేడుకలో ఈ నెల 17న పాటల్ని విడుదల చేస్తాం. అదే రోజున ట్రైలర్‌ కూడా విడుదలవుతుంది. ఇటీవల విడుదలైన స్టంపర్‌కు అద్భుత స్పందన లభిస్తోంది. 68 గంటల పాటు యూట్యూబ్‌లో ట్రెండింగ్‌గా నిలిచిన స్టంపర్‌ను, 70 లక్షలమందికి పైగా చూశారు. ప్రేక్షకుల్లో సినిమాపై అంచనాలను స్టంపర్‌ మరింత పెంచేసింది. ఆ అంచనాలకు తగ్గట్టుగానే సినిమా ఉంటుంది’’ అన్నారు.  ఈ సినిమాను సెప్టెంబర్‌ 1న విడుదల చేయడానికి సన్నాహాలు చేస్తున్నారు.


 సీనియర్ హీరో నందమూరి బాలకృష్ణ, ప్రస్తుతం పూరి జగన్నాథ్ దర్శకత్వంలో పైసా వసూల్ సినిమాలో నటిస్తున్న సంగతి తెలిసిందే. ఇప్పటికే షూటింగ్ పూర్తిచేసుకున్న ఈ సినిమాలో బాలయ్య సరసన శ్రియ, ముస్కాన్ సేథిలు హీరోయిన్లు గా నటిస్తున్నారు. యాక్షన్ డ్రామాగా తెరకెక్కుతున్న ఈ సినిమా కోసం బాలయ్య కొన్ని రిస్కీ స్టంట్స్ ను స్వయంగా చేశాడు.
 
 షూటింగ్ పూర్తి చేసుకున్న పైసా వసూల్ టీం ప్రస్తుతం నిర్మాణాంతర కార్యక్రమాల్లో బిజీగా ఉంది. ప్రమోషన్ కార్యక్రమాలను కూడా మొదలు పెట్టిన యూనిట్ ఇప్పటికే స్టంపర్ తో సరికొత్తగా అలరించింది. తాజాగా బాలయ్య స్వయంగా చేసిన కార్ స్టంట్ కు సంబంధించిన వీడియో టీజర్ ను రిలీజ్ చేశారు. శ్రియతో పాటు కారులో వెళ్తున్న బాలయ్య జీరో కట్ స్వయంగా జీర్ కట్ చేసి యూనిట్ సభ్యులను ఆశ్చర్యపరిచాడు. అందుకే స్టంట్ ను చూపిస్తూ స్పెషల్ టీజర్ రిలీజ్ చేసిన యూనిట్ 'హీ నీడ్స్ నో స్టంట్ డ్రైవర్' (ఇతనికి స్టంట్ డ్రైవర్ అవసరం లేదు) అంటూ టీజర్ ను ముగించారు.


 
 సీనియర్ హీరో నందమూరి బాలకృష్ణ మరోసారి సహనం కోల్పోయారు. తన కొత్త సినిమా ప్రారంభోత్సవ కార్యక్రమంలో అసిస్టెంట్ ను కొడుతూ కెమెరాల కంటపడ్డారు. రామోజీ ఫిలిం సిటీలో జరిగిన ప్రారంభోత్స కార్యక్రమంలో షాట్ కోసం రెడీ అవుతున్న బాలయ్య అసిస్టెంట్ ను తల మీద కొట్టి షూ విప్పాల్సిందిగా ఆదేశించాడు. బాలకృష్ణ దర్శకుడు కేయస్ రవికుమార్ తో మాట్లాడుతుండగా అసిస్టెంట్ షూ విప్పటం వీడియోల్లో ఉంది. ఈ వీడియో ప్రస్తుతం సోషల్ మీడియాలో వైరల్ అయ్యింది.
 
 పైసా వసూల్ షూటింగ్ పూర్తి చేసిన బాలయ్య తన 102వ సినిమాగా కేయస్ రవికుమార్ దర్శకత్వంలో సినిమా ప్రారంభించాడు. సీ కళ్యాణ్ నిర్మిస్తున్న ఈ సినిమాలో నయనతార హీరోయిన్ గా నటిస్తోంది. గౌతమిపుత్ర శాతకర్ణి ఫేం చిరంతన్ భట్ సంగీతం అందిస్తున్నాడు.


 ‘‘తమ్ముడూ... నేను ‘జంగిల్‌ బుక్‌’ సినిమా చూడలేదు. కానీ, అందులో పులి నాలాగే ఉంటుందని చాలామంది చెప్పారు. అది నిజమో? కాదో? మీరే చెప్పాలి’’ అంటున్నారు బాలకృష్ణ. పూరి జగన్నాథ్‌ దర్శకత్వంలో ఆయన హీరోగా నటిస్తున్న ‘పైసా వసూల్‌’లో డైలాగ్‌ ఇది. నిజమో.. కాదో.. చెప్పాలంటే ముందు పులిని చూడాలి కదా! మరి, పులిని ఎప్పుడు చూపిస్తారు? అంటే... ‘సెప్టెంబర్‌ 1న’ అన్నారు నిర్మాత వి. ఆనందప్రసాద్‌.
 
 భవ్య క్రియేషన్స్‌ పతాకంపై ఆయన నిర్మిస్తున్న ఈ సినిమా చిత్రీకరణ, డబ్బింగ్‌ వర్క్స్‌ పూర్తయ్యాయి. పోస్ట్‌ ప్రొడక్షన్‌ వర్క్స్‌ తుది దశకు చేరుకున్నాయి. త్వరలో అనూప్‌ రూబెన్స్‌ సంగీతమందించిన పాటల్ని, సెప్టెంబర్‌ 1న సినిమాను విడుదల చేయడానికి సన్నాహాలు చేస్తున్నట్టు వి. ఆనందప్రసాద్‌ ప్రకటించారు. ‘‘ఇందులో కొత్త బాలకృష్ణను చూస్తారు.
 
 ఇటీవల విడుదలైన స్టంపర్‌కు, అందులో బాలకృష్ణగారి డైలాగులకు అద్భుత స్పందన లభిస్తోంది. సినిమా కూడా స్టంపర్‌ తరహాలో ప్రేక్షకుల్ని అలరిస్తుందనే నమ్మకముంది’’ అన్నారు పూరి. శ్రియ, ముస్కాన్, కైరా దత్‌ హీరోయిన్లుగా నటించిన ఈ సినిమాలో కబీర్‌ బేడి, అలీ, పృథ్వీ, పవిత్రా లోకేష్‌ కీలక పాత్రధారులు.


 నందమూరి బాలకృష్ణ హీరోగా పూరి జగన్నాథ్‌ దర్శకత్వంలో భవ్య క్రియేషన్స్‌ పతాకంపై వి. ఆనందప్రసాద్‌ నిర్మిస్తున్న సినిమా పైసా వసూల్‌. ఇటీవల విడుదలైన ఈ సినిమా స్టంపర్‌కు ప్రేక్షకుల నుంచి మంచి స్పందన వస్తోంది. అభిమానులు ఫుల్‌ ఖుషీగా ఉన్నారు. ఇప్పుడు పూరి టీం బాలయ్య అభిమానులకు మరో శుభవార్త చెప్పింది. పైసా వసూల్ ను సెప్టెంబర్‌ 1న విడుదల చేస్తున్నట్టు నిర్మాత వి. ఆనందప్రసాద్‌ ప్రకటించారు. ఈ సినిమా చిత్రీకరణ, డబ్బింగ్‌ కార్యక్రమాలు పూర్తయ్యాయి. ప్రస్తుతం నిర్మాణానంతర కార్యక్రమాలు తుదిదశకు చేరుకున్నాయి. అనూప్‌ రూబెన్స్‌ సంగీతమందించిన పాటల్ని అతి త్వరలో విడుదల చేయడానికి సన్నాహాలు చేస్తున్నారు.
 
 ఈ సందర్భంగా దర్శకుడు పూరి జగన్నాథ్‌ మాట్లాడుతూ 'నందమూరి అభిమానులు కోరుకునే అంశాలన్నీ సినిమాలో పుష్కలంగా ఉన్నాయి. బాలకృష్ణగారు ఫుల్‌ ఎనర్జిటిక్‌ పాత్రలో ఇరగదీసి నటించారు. ముఖ్యంగా యాక్షన్‌ సీక్వెన్స్‌లను ఆయన డూప్‌ లేకుండా చేశారు. ఇప్పటివరకు ఆయన్ను చూడని విధంగా, ఓ కొత్త పాత్రలో ఇందులో చూస్తారు. తొలిసారి బాలకృష్ణగారితో పని చేస్తున్నందుకు గర్వంగానూ, ఆనందంగానూ ఉంది. మా నిర్మాత ఆనందప్రసాద్‌గారు ఎక్కడా ఖర్చుకు వెనుకాడకుండా సినిమా బాగా రావడానికి కృషి చేశారు' అన్నారు.
 
 నిర్మాత వి. ఆనందప్రసాద్‌ మాట్లాడుతూ 'ఇటీవల విడుదలైన పైసా వసూల్ స్టంపర్‌కు అద్భుత స్పందన లభిస్తోంది. తమ్ముడూ... నేను జంగిల్‌ బుక్‌ సినిమా చూడల. కాని అందులో పులి నాలాగే ఉంటుందని చాలామంది చెప్పారు. అది నిజమో కాదో మీరే చెప్పాలి, మందేసిన మదపుటేనుగునిరా! క్రష్‌ ఎవ్రీవన్‌' డైలాగులు అభిమానులను అలరిస్తున్నాయి. సినిమా కూడా ఇదే రేంజ్‌లో ఉంటుంది. సెప్టెంబర్‌ 1న సినిమా విడుదల చేయడానికి సన్నాహాలు చేస్తున్నాం. బాలకృష్ణగారి ఇమేజ్‌కి, కథకు తగ్గ పాటలను అందించారు. త్వరలో ఆడియో విడుదల చేయడానికి సన్నాహాలు చేస్తున్నాం', అన్నారు.
  
 
 #PaisaVasool Grand worldwide release on 1st September#PVonSept1 #NBK101 @purijagan @PuriConnects @BhavyaCreations @shriya1109 @anuprubens pic.twitter.com/RWJPXVmpQm
 — Bhavya Creations (@BhavyaCreations) 30 July 2017


 నందమూరి బాలకృష్ణ, పూరి జగన్నాథ్ల కాంబినేషన్లో తెరకెక్కుతున్న యాక్షన్ ఎంటర్టైనర్ పైసా వసూల్. బాలయ్య డిఫరెంట్ మేకోవర్లో కనిపిస్తున్న పైసా వసూల్ ఇప్పటికే షూటింగ్ పూర్తి చేసుకొని నిర్మాణాంతర కార్యక్రమాలు జరుపుకుంటుంది. షూటింగ్ మొదలైన రోజునే రిలీజ్ డేట్ కూడా ప్రకటించేసిన పూరి.. ఇప్పుడు సినిమాను అనుకున్న సమయం కన్నాముందే రిలీజ్ చేసేందుకు ప్లాన్ చేస్తున్నాడట.
 
 ఆగస్టు రెండో వారాని కల్లా పైసా వసూల్ ఫస్ట్ కాపీ రెడీ అవుతుందని భావిస్తున్నారు. అదే జరిగితే సినిమాను ముందుగా అనుకున్నట్టుగా సెప్టెంబర్ 29న కాకుండా మూడు వారాలు ముందుగానే రిలీజ్ చేసేందుకు రెడీ అవుతున్నారు. ఫస్ట్ కాపీ రెడీ అయిన తరువాత ఎక్కువ లేట్ చేయడం కరెక్ట్ కాదని బాలయ్య సలహా ఇవ్వటంతోనే ఈ నిర్ణయం తీసుకున్నారని ప్రచారం జరుగుతోంది. ప్రస్తుతానికి పైసా వసూల్ ప్రీ పోన్ పై ఎలాంటి అధికారిక ప్రకటన లేకపోయినా.. ముందే రిలీజ్ అవుతుందన్న ప్రచారం మాత్రం గట్టిగానే జరుగుతుంది.


 సీనియర్ హీరో నందమూరి బాలకృష్ణ పూరి జగన్నాథ్ దర్శకత్వంలో పైసా వసూల్ సినిమాలో నటిస్తున్న సంగతి తెలిసిందే. పూరి మార్క్ యాక్షన్ డ్రామాగా తెరకెక్కుతున్న ఈ సినిమాను సెప్టెంబర్ లో రిలీజ్ చేసేందుకు ప్లాన్ చేస్తున్నారు. అయితే ఇప్పటి నుంచే ప్రమోషన్ కార్యక్రమాలు ప్రారంభిస్తున్నారు. బాలకృష్ణ పుట్టిన రోజు సందర్భంగా రిలీజ్ చేసిన ఫస్ట్ లుక్ పోస్టర్లకు మంచి రెస్పాన్స్ రావటంతో ఇప్పుడు స్టంపర్ వీడియోను రిలీజ్ చేసేందుకు రెడీ అవుతున్నారు.
 
 ఇన్నాళ్లు టీజర్,  ట్రైలర్లు మాత్రమే తెలిసిన తెలుగు ప్రేక్షకులు స్టంపర్ అంటే ఏంటో తెలుసుకునేందుకు ఆసక్తిగా ఎదురుచూస్తున్నారు. అయితే టీజర్ కే టీజర్ అన్నట్టుగా స్టంపర్ అంటే ఏంటో క్లూ ఇస్తూ ఓ వీడియోను రిలీజ్ చేశారు చిత్రయూనిట్. స్టంపర్ అంటే ట్రైలర్ కా బాప్ టీజర్ కా బేటా అని తేల్చేశారు. అంటే టీజర్ కాన్న ఎక్కువ నిడివితో.. ట్రైలర్ కన్నా తక్కువ నిడివితో కట్ చేసిన ప్రోమోనే స్టంపర్ అంటారని భావిస్తున్నారు. ఈ శుక్రవారం (28-07-2017) ఉదయం 10 గంటల 12 నిమిషాలకు పైసా వసూల్ స్టంపర్ రిలీజ్ కానుంది.
  
 
 What is Stumper101 ?? Check this out! #NBK101Fever #PaisaVasool #NBK101 #Stumper101on28th @purijagan @BhavyaCreations pic.twitter.com/cri2vE7VPU
 — Paisa Vasool (@PaisaVasool_NBK) 26 July 2017


 నందమూరి నటసింహం బాలకృష్ణ హీరోగా డాషింగ్ డైరెక్టర్ పూరి జగన్నాథ్ దర్శకత్వంలో తెరకెక్కిన మూవీ పైసా వసూల్. ఇప్పటికే షూటింగ్ కార్యక్రమాలు పూర్తి చేసుకున్న ఈ సినిమా పోస్ట్ ప్రొడక్షన్ కార్యక్రమాలు  జరుపుకుంటోంది. బాలకృష్ణకు జోడిగా సీనియర్ హీరోయిన్ శ్రియ నటిస్తుండగా, ముస్కాన్ సేతి, కైరా దత్లు కీలక పాత్రల్లో నటిస్తున్నారు. అనూప్ రుబెన్స్ సంగీతం అందిస్తున్న ఈ సినిమాను బాలకృష్ణ మార్కెట్ రేంజ్ను మించి భారీ బడ్జెట్తో రూపొందిస్తున్నట్టుగా వార్తలు వస్తున్నాయి.
 
 ఎక్కువ భాగం ఫారిన్ లోకేషన్స్లో షూట్ చేయటంతో పాటు కాస్టింగ్ కూడా భారీగా ఉండటంతో బడ్జెట్ 47 కోట్లకు చేరిందన్న ప్రచారం జరుగుతుంది. అయితే బాహుబలి తరువాత తెలుగు సినిమాలకు ఇతర రాష్ట్రాల్లో కూడా మంచిమార్కెట్ ఏర్పడటంతో ఈ బడ్జెట్ పెద్ద రిస్క్ కాదని భావిస్తున్నారు. భవ్య క్రియేషన్స్ సంస్థ నిర్మిస్తున్న ఈసినిమాను సెప్టెంబర్ 29న రిలీజ్ చేసేందుకు నిర్ణయించారు.


 ప్రస్తుతం పూరి జగన్నాథ్ దర్శకత్వంలో పైసా వసూల్ సినిమాలో నటిస్తున్న బాలకృష్ణ ఆ తరువాత కేయస్ రవికుమార్ దర్శకత్వంలో మరో సినిమా చేసేందుకు రెడీ అవుతున్నాడు. కమర్షియల్ యాక్షన్ ఎంటర్టైనర్గా తెరకెక్కనున్న ఈ సినిమాకు సంబంధించిన అప్ డేట్ ఇప్పుడు టాలీవుడ్ సర్కిల్లో వైరల్ అవుతున్నాయి. సినిమా ఎనౌన్స్ చేసిన దగ్గర నుంచి హీరోయిన్ ఎవరు టైటిల్ ఏంటి అన్న చర్చ పెద్ద ఎత్తున జరుగుతోంది.
 
 ఇప్పటికే హీరోయిన్గా నయనతారను కన్ఫామ్ చేశారు చిత్రయూనిట్. చిత్ర నిర్మాణ సంస్థ ఇటీవల ఛాంబర్లో రూలర్ అనే టైటిల్ రిజిస్టర్ చేయటంతో అదే బాలయ్య సినిమా టైటిల్ అన్న ప్రచారం మొదలైంది. ఈ ప్రచారాన్ని చిత్ర  యూనిట్ ఖండించారు. ప్రస్తుతానికి సినిమాకు ఏ టైటిల్ నిర్ణయించలేదని తెలిపారు. రూలర్తో పాటు జయసింహా, రెడ్డి గారు లాంటి టైటిల్స్ బాలయ్య సినిమాకు పరిశీలనలో ఉన్నాయి.


 బాలకృష్ణకు స్వీట్‌ సర్‌ప్రైజ్‌. పూరి జగన్నాథ్‌ దర్శకత్వంలో నటిస్తున్న ‘పైసా వసూల్‌’ చిత్రీకరణ నిమిత్తం గత నెల 13 నుంచి ఆయన పోర్చుగల్‌లో ఉండడంతో ఈ ఏడాది బర్త్‌డేను అక్కడే సెలబ్రేట్‌ చేసుకున్నారు.
 ఈ సెలబ్రేషన్స్‌కి ఇండియా నుంచి బాలకృష్ణ సతీమణి వసుంధర, ఇద్దరు కుమార్తెలు బ్రాహ్మణి, తేజస్విని, అల్లుళ్లు నారా లోకేష్, శ్రీభరత్‌ పోర్చుగల్‌ వెళ్లారు. ఆయనకు సర్‌ప్రైజ్‌ ఏంటంటే... కుమార్తెలు ఇద్దరూ ఖరీదైన బెంట్లీ కారును గిఫ్ట్‌గా ఇచ్చారు. ఈ సెలబ్రేషన్స్‌లో ‘పైసా వసూల్‌’ చిత్రనిర్మాత ‘భవ్య’ ఆనంద్‌ప్రసాద్, దర్శకుడు పూరి, చిత్రబృందం పాల్గొన్నారు.


 
 స్పైడర్‌కు పోటీగా పైసా వసూల్‌
 
 ఒక్క రోజు తేడాతో విడుదల
 
  
 హైదరాబాద్‌: వయస్సు మీద పడుతున్నా నందమూరి బాలకృష్ణ ఏమాత్రం జోరు తగ్గించడం లేదు. యువ హీరోలతో పోటీపడి మరి బాక్సాఫీస్‌ వద్ద ఇప్పటికీ విజయాలు సాధిస్తూనే ఉన్నారు. గత సంక్రాంతి బరిలో జూనియర్‌ ఎన్టీఆర్‌ ’నాన్నకు ప్రేమతో’, నాగార్జున ‘సోగ్గాడే చిన్నినాయన’ సినిమాలతో పోటీపడి ’లెజండ్‌’ సినిమాను తీసుకొచ్చారు బాలయ్య. ఈ సినిమా మంచి వసూళ్లు రాబట్టింది. ఈసారి కూడా బాలయ్య అలాంటి ప్రయోగమే చేయబోతున్నారని తెలుస్తోంది. దర్శకుడు పూరీ జగన్నాథ్‌ తెరకెక్కిస్తున్న బాలయ్య తాజా సినిమా ‘పైసా వసూల్‌’... బాలయ్య పుట్టినరోజు సందర్భంగా ఆయనతో కలిసి ఈ చిత్ర బృందం శనివారం ఫేస్‌బుక్‌ లైవ్‌లో ముచ్చటించింది. పోర్చుగీస్‌ నుంచి సాగిన లైవ్‌ చిట్‌చాట్‌లో ‘పైసావసూల్‌’ విడుదల తేదీని చిత్రబృందం ప్రకటించింది. సెప్టెంబర్‌ 29న ఈ చిత్రాన్ని విడుదల చేయనున్నట్టు ప్రకటించింది.
  
 అంటే మహేశ్‌బాబు సినిమా ‘స్పైడర్‌’కు గట్టిపోటీగా బాలయ్య ‘పైసా వసూల్‌’ బాక్సాఫీస్‌ బరిలో దూకబోతున్నది. మురగదాస్‌ దర్శకత్వంలో ఎంతో ప్రతిష్టాత్మకంగా మహేష్‌ సినిమా ‘స్పైడర్‌’  తెరకెక్కుతున్న సంగతి. విడుదల అప్పుడు-ఇప్పుడు అంటూ ఊరిస్తున్న ఈ సినిమాపై ప్రేక్షకుల్లో చాలా  అంచనాలు ఉన్నాయి. అన్ని కుదిరితే ఈ సినిమా సెప్టెంబర్‌ 27న ప్రేక్షకుల ముందుకు రానున్నట్టు తెలుస్తోంది. ఈ సినిమా విడుదలైన రెండోనాడే బాలయ్య ‘పైసా వసూల్‌’  వస్తుండటంతో ఒక్క రోజు తేడాలో రెండు భారీ సినిమాలు బాక్సాఫీస్‌ వద్ద తలపడుతున్నాయి. ఈ రెండు భారీ సినిమాలు ఒకే సమయంలో వస్తున్నాయంటే ఇద్దరు హీరోల అభిమానులకు పండుగేనని సినీ జనాలు అంటున్నారు.