తుపానును ఎదుర్కొనేందుకు సిద్ధం

కడప అర్బన్‌: జిల్లాకు ’దిత్వా’ తుఫాను హెచ్చరికల నేపథ్యంలో జిల్లా పోలీసు శాఖ ఎలాంటి పరిస్థితినైనా ఎదుర్కొనేందుకు సర్వసన్నద్ధమైంది. ఎస్పీ షెల్కే నచికేత్‌ విశ్వనాథ్‌ ప్రత్యేక బలగాలతో బృందాలను ఏర్పాటు చేశారు. జిల్లా పోలీసు హెడ్‌ క్వార్టర్స్‌ లో మూడు ప్రత్యేక బృందాలతో పాటు ప్రతి పోలీసు సబ్‌ డివిజన్‌లో ఒక రెస్క్యూ టీమ్‌ సిద్ధం చేశారు. సహాయక చర్యల్లో పాల్గొనే బృందాలకు అవసరమైన లైటింగ్‌ సామగ్రి, లైఫ్‌ జాకెట్లు, టార్చ్‌ లైట్లు, సహాయచర్యలు నిమిత్తం తాళ్లు, బాటన్‌ లతో సంసిద్ధంగా ఉంచారు. నదులు, వాగులు, వంకల పరివాహక ప్రాంతాల్లో ప్రధానంగా లోతట్టు ప్రాంతాల ప్రజలను అప్రమత్తం చేయాలని ఎస్పీ పోలీసు అధికారులను ఆదేశించారు. అవసరమైన ప్రాంతాల్లో సహాయక శిబిరాలు, పునరావాస కేంద్రాలు గుర్తించి చర్యలు చేపట్టాలన్నారు. చెరువులు, కాలువలకు గండ్లు పడే అవకాశం ఉన్న ప్రాంతాల్లో పోలీసు అధికారులు పరిస్థితులను ఎప్పటికప్పుడు అంచనా వేస్తూ తగిన చర్యలు తీసుకోవాలని సూచించారు. ప్రయాణించేందుకు అనువుకాని మార్గాల్లో, నీట మునిగిన రహదారుల వద్ద బందోబస్తు ఏర్పాటు చేసి రహదారులను మూసివేయాలని, ఇతర మార్గాల ద్వారా వాహనాలు వెళ్లేలా చర్యలు తీసుకోవాలని ఆదేశించారు.

ఎస్పీ షెల్కే నచికేత్‌ విశ్వనాథ్‌

తుపానును ఎదుర్కొనేందుకు సిద్ధం