అస్వస్థతకు గురైన విద్యార్థులకు వైద్య పరీక్షలు

ప్రొద్దుటూరు కల్చరల్‌: స్థానిక వసంతపేట మున్సిపల్‌ హైస్కూల్‌లో మధ్యాహ్న భోజనం తిని అస్వస్థతకు గురైన విద్యార్థులను శనివారం కడప రిమ్స్‌ వైద్యులు పరిశీలించారు. డీఎంహెచ్‌ఓ నాగరాజు ఆదేశాల మేరకు జిల్లా సర్వైలెన్స్‌ ఆఫీసర్‌ డాక్టర్‌ వెంకటచంద్రారెడ్డి, రిమ్స్‌ వైద్యులు అనిల్‌కిరణ్‌, శివజ్యోతి అస్వస్థతకు గురైన విద్యార్థులకు వైద్య పరీక్షలు నిర్వహించి అవసరమైన వారికి మందులు అందించారు. విద్యార్థులు ఆరోగ్యంగా ఉన్నారని వారు పేర్కొన్నారు. అనంతరం వంట గదిని తనిఖీ చేసి, వంట గదిని పరిశుభ్రంగా ఉంచుకోవాలని పాఠశాల హెడ్మాస్టర్‌ గుర్రప్పను ఆదేశించారు. ప్రతి రోజు విద్యార్థులు భోజనం చేయడానికి ముందు వండిన ఆహార పదార్థాలను టేస్ట్‌ చేయాలని సూచించారు. కందిపప్పును పాఠశాలలో రెండు మూడు రోజులు నిల్వ ఉంచి ఆ తర్వాత వండటానికి ఉపయోగించాలని పేర్కొన్నారు. పాఠశాలలో జరిగిన ఫుడ్‌ పాయిజన్‌పై వైద్య ఆరోగ్యశాఖ కమిషనర్‌కు నివేదికను పంపుతామని వైద్యులు పేర్కొన్నారు. విద్యార్థుల అస్వస్థతకు కారణమైన పప్పును పారవేసి ఆధారాలు లేకుండా చేసిన వంట ఏజెన్సీ నిర్వాహకులపై క్రిమినల్‌ కేసులు నమోదు చేయాలని డీఈఓ షంషుద్దీన్‌ తహసీల్దార్‌ గంగయ్యను కోరారు. ఈ సంఘటనపై పూర్తి స్థాయిలో విచారించడానికి తహసీల్దార్‌ గంగయ్య, కడప డిప్యూటీ ఈఓ రాజగోపాల్‌రెడ్డి, ఫుడ్‌ సేఫ్టీ అధికారితో ప్రభుత్వం ఒక కమిటీని నియమించింది. కాగా శనివారం మధ్యాహ్నం విద్యార్థులకు వైవీఎస్‌ మున్సిపల్‌ హైస్కూల్‌ నుంచి భోజనాన్ని సరఫరా చేశారు. కొద్ది రోజులలో పాఠశాలలో నూతన వంట ఏజెన్సీని ఏర్పాటు చేయనున్నట్లు ఎంఈఓ శోభారాణి తెలిపారు.