ముగిసిన తొలివిడత నామినేషన్ల పర్వం

● అర్ధరాత్రి వరకు కొనసాగిన ప్రక్రియ

● మూడు గ్రామాల్లో సర్పంచ్‌,

వార్డు స్థానాలకు సింగిల్‌ నామినేషన్లు

వనపర్తి: గ్రామపంచాయతీ ఎన్నికల తొలివిడత నామినేషన్ల పర్వం శనివారం అర్ధరాత్రి వరకు కొనసాగింది. అర్ధరాత్రి 12 వరకు ఖిల్లాఘనపురం, గోపాల్‌పేట, రేవల్లి, పెద్దమందడి మండలాలకు చెందిన నామినేషన్ల వివరాలు అందినట్లు ఇన్‌చార్జ్‌ డీపీఓ రఘునాథ్‌రెడ్డి ప్రకటించారు. రేవల్లి మండలంలో 9 సర్పంచ్‌ స్థానాలకు 76 నామినేషన్లు, 82 వార్డు స్థానాలకు 220 నామినేషన్లు.. గోపాల్‌పేట మండలంలో 15 సర్పంచ్‌ స్థానాలకు 104, 136 వార్డు స్థానాలకు 362.. పెద్దమందడి మండలంలో 23 సర్పంచ్‌ స్థానాలకు 188, 212 వార్డు స్థానాలకు 526.. ఖిల్లాఘనపురం మండలంలో 29 సర్పంచ్‌ స్థానాలకు 222 నామినేషన్లు, 248 వార్డు స్థానాలకు 614 నామినేషన్లు దాఖలైనట్లు వివరించారు. అధికారిక సమాచారం వెల్లడించేందుకు మరికొంత సమయం పడుతుందని చెప్పారు. సాయంత్రం ఐదు వరకు క్లస్టర్‌లో వేచి ఉన్న వారందరితో నామినేషన్లు స్వీకరించాల్సి ఉండటంతో రాత్రి పొద్దుపోయే వరకు దాఖలు ప్రక్రియ కొనసాగింది.

● పెద్దమందడి మండలం నాగులకుంటతండా, గోపాల్‌పేట మండలం అనంతపూర్‌ గ్రామపంచాయతీల్లో సర్పంచ్‌, వార్డుస్థానాలకు సింగిల్‌ నామినేషన్లు దాఖలైనట్లు తెలుస్తోంది.

గోపాల్‌పేట: గ్రామపంచాయతీ ఎన్నికల మొదటి విడత నామినేషన్ల స్వీకరణ శనివారం చివరిరోజు కొనసాగింది. మండలంలోని లక్ష్మీదేవిపల్లిలో మొత్తం 224 ఓట్లు, నాలుగు వార్డులు ఉండగా.. సర్పంచ్‌, ఆయా వార్డులకు ఒక్కో నామినేషన్‌ దాఖలైంది. దీంతో సర్పంచ్‌గా బంగారయ్య, వార్డుసభ్యులుగా మండ్ల కృష్ణమ్మ, గౌరి వెంకటయ్య, అయోధ్య రాములు, గుంటి లక్ష్మయ్య ఏకగ్రీవంగా ఎన్నికై నట్లు అధికారిక సమాచారం.