అనారోగ్యంతో మాజీ మావోయిస్టు మృతి
పలువురు మాజీ మావోయిస్టుల నివాళులు
కొండపాక(గజ్వేల్): కొండపాక గ్రామానికి చెందిన మాజీ మావోయిస్టు పంబాల బాలనర్సయ్య (48) అనారోగ్యంతో శనివారం మృతి చెందాడు. పలువురు మాజీ మావోయిస్టులు ఆయన భౌతిక కాయానికి పూలమాల వేసి నివాళులు అర్పించి, కుటుంబీకులను ఓదార్చారు. 2002 సంవత్సరంలో మావోయిస్టు పార్టీకి ఆకర్షితుడయ్యాడు. 2004లో ఉమ్మడి ఆంధ్రప్రదేశ్ ప్రభుత్వం నక్సలైట్లతో జరిపిన చర్చల్లో బాలనర్సయ్య పాల్గొన్నారు. 20 సంవత్సరాల పాటు మావోయిస్టుగా పని చేస్తున్న క్రమంలో పార్టీ సీనియర్ నాయకుడు ఆర్కే(రామకృష్ణ)కు సెక్యూరిటీ ఇన్చార్జిగా పని చేశాడు. అన్ని వర్గాల ప్రజలతో కలుపుగోలుగా ఉంటూ పేదల సమస్యల పరిష్కారం కోసం శ్రద్ధ చూపేవారు. 2010లో లొంగిపోయి ఇంటి వద్దే ఉంటూ కుల వృత్తి చేసుకుంటూ కుటుంబాన్ని పోషించుకుంటున్నాడు. ఇటీవల అనారోగ్యానికి గురి కాగా చికిత్స తీసుకుంటున్న క్రమంలోనే మృతి చెందాడు. ఆయన అంత్యక్రియల్లో మాజీ మావోయిస్టు పార్టీ నేతలు విమలక్క, నర్సింలు, షకీల్, రామకృష్ణ, కాంగ్రెస్ నాయకులు మల్లేశం, భాను, చందు, రమేశ్ తదితరులు పాల్గొన్నారు.
అనారోగ్యంతో మాజీ మావోయిస్టు మృతి


