మహిళా అభ్యర్థుల కోసం అన్వేషణ

జహీరాబాద్‌: స్థానిక సంస్థల ఎన్నికల్లో మహిళలకు 50 శాతం సీట్లను కేటాయించడంతో సర్పంచ్‌ పదవులకు సమర్థులైన అభ్యర్థుల కోసం నేతలు అన్వేషిస్తున్నారు. సర్పంచ్‌ పదవులతో పాటు వార్డు పదవులకు పోటీ చేయించేందుకు తగిన అభ్యర్థులను వెతకడం నేతలకు తలనొప్పిగా మారింది. క్రియాశీల రాజకీయాల్లో మహిళలు అంతంత మాత్రమే పాల్గొంటుండడంతో అభ్యర్థుల ఎంపిక ఆయా పార్టీల నేతలకు ఇబ్బందికరంగా మారింది. ప్రధాన పార్టీలయిన కాంగ్రెస్‌, బీఆర్‌ఎస్‌ నాయకులు సర్పంచ్‌, వార్డుల రిజర్వేషన్లను పరిగణలోకి తీసుకుని అందుకు అనుగుణంగా ఆయా పదవులకు అభ్యర్థులను గుర్తించే బాధ్యతను గ్రామ స్థాయి నేతలకు అప్పగించారు. సర్పంచ్‌ పదవులకు మాత్రం సరైన అభ్యర్థి ఎంపికను మాత్రం ముఖ్య నాయకులు బాధ్యతలు తీసుకుంటున్నారు. ఏయే గ్రామాల సర్పంచ్‌ పదవులు మహిళలకు రిజర్వు అయ్యాయి, రిజర్వు అయిన పదవులు ఏయే కేటగిరీల వారికి కేటాయించారనే వివరాలను చార్టుల ద్వారా చూసుకుని అందుకు అనుగుణంగా అభ్యర్థుల ఎంపికలో తలమునకలయ్యారు. సరైన అభ్యర్థులు దొరకని పక్షంలో అయిదారుగురిచే నామినేషన్లు వేయించి, వారిలో ప్రజల్లో తగిన గుర్తింపు ఉన్న వారికి పార్టీ మద్ధతు ప్రకటించేలా కార్యాచరణ సిద్ధం చేస్తున్నారు.

పతుల స్థానంలో సతులు

సర్పంచ్‌ పదవులకు పోటీ చేసేందుకు ముందస్తు నుంచి సిద్ధంగా ఉన్న నేతలకు రిజర్వేషన్లు అనుకూలంగా రాక పోవడంతో వారి సతులను సర్పంచ్‌, వార్డు సభ్యులుగా పోటీ చేయించేందుకు ఆసక్తి చూపుతున్నారు. ఇందు కోసం అన్ని ఏర్పాట్లు చేసుకుంటున్నారు. నామినేషన్లు వేయించేందుకు అవసరమైన ధృవ పత్రాలను సిద్ధం చేసుకుంటున్నారు. ప్రధాన పార్టీల నుంచే కాకుండా పలువురు తమ సతులను స్వతంత్ర అభ్యర్థులుగా పోటీ చేయించేందుకు వీలుగా నామినేషన్లు వేసుకునేందుకు సిద్ధపడుతున్నారు. దీంతో మహిళలకు రిజర్వు అయిన గ్రామాల్లో ఎన్నికలు రసవత్తరంగా, ఆసక్తి కరంగా మారనున్నాయి. సర్పంచ్‌ పదవులకు పలానా వ్యక్తి తల్లి లేదా భార్య పోటీ చేస్తారంటా అనే విషయాలు రచ్చబండ వద్ద చర్చకు వస్తున్నాయి. నామినేషన్ల ఉపసంహరణ అనంతరం ఎన్నికలు మరింత ఆసక్తి కలిగించనున్నాయి.

సతులను పోటీ చేయించేందుకు

పతుల ఆరాటం

50 శాతం సీట్ల కేటాయింపుతో

తగిన వారి కోసం ప్రయత్నాలు

రసవత్తరంగా మారనున్న

పంచాయతీ ఎన్నికలు