జీవితంపై విరక్తి చెంది..

ఆటో డ్రైవర్‌ ఆత్మహత్య

తూప్రాన్‌: జీవితంపై విరక్తి చెందిన ఆటో డ్రైవర్‌ ఆత్మహత్య చేసుకున్నాడు. ఈ సంఘటన పట్టణ కేంద్రంలో శుక్రవారం అర్ధరాత్రి చోటు చేసుకుంది. ఎస్‌ఐ శివానందం వివరాల ప్రకారం... పట్టణంలోని గాంధీనగర్‌లోని హనుమాన్‌ దేవాలయం సమీపంలో నివాసం ఉంటున్న సాహజీ సుధీర్‌(38) ఆటో డ్రైవర్‌. 12 ఏళ్ల క్రితం మహరాష్ట్రకు చెందిన పూజతో వివాహం జరిగింది. కాగా కుటుంబ తగాదాలతో భార్య పుట్టింటికి వెళ్లిపోయింది. అప్పటి నుంచి సుధీర్‌ ఒంటరిగా ఆటో నడుపుతూ జీవిస్తున్నాడు. ఈ క్రమంలోనే శుక్రవారం అర్ధరాత్రి పట్టణంలో నివాసం ఉంటున్న బంధువులకు ఫోన్‌ చేసి జీవితంపై విరక్తి చెంది ఆత్మహత్య చేసుకుంటున్నానని చెప్పాడు. బంధువులు ఇంటికి వచ్చి చూసేసరికి ఉరివేసుకున్నాడు. ఈ విషయం గుర్తించిన బంధువులు చుట్టుపక్కల వారి సహాయంతో ప్రభుత్వ ఆస్పత్రికి తరలించారు. అప్పటికే మృతి చెందినట్లు వైద్యులు తెలిపారు.

వ్యక్తిగత కారణాలతో..

సదాశివపేట రూరల్‌(సంగారెడ్డి): వ్యక్తిగత కారణాలతో వ్యక్తి ఆత్మహత్య చేసుకున్నాడు. ఈ సంఘటన మండలంలోని వెంకటాపూర్‌ శివారులో శనివారం చోటు చేసుకుంది.సదాశివపేట సీఐ వెంకటేశ్‌ తెలిపిన వివరాల మేరకు... కోహిర్‌ మండలంలోని మనీయార్పల్లి గ్రామానికి చెందిన పుర్రె దినకర్‌(31) వ్యవసాయ పనులు చేస్తూ జీవనం గడుపుతున్నాడు. ఈ నెల 28న బయటకు వెళ్తున్నానని ఇంట్లో చెప్పి తన బైక్‌పై వెళ్లాడు. అలా వెళ్లిన వ్యక్తి శనివారం వెంకటాపూర్‌ శివారులో ఓ చెట్టుకు ఉరేసుకున్నాడు. స్థానికులు గమనించి పోలీసులకు సమాచారం ఇవ్వడంతో ఘటనా స్థలానికి వెళ్లి వివరాలు సేకరించారు.

ఇంట్లోకి చొరబడి..

చైన్‌ స్నాచింగ్‌

కొమురవెల్లి(సిద్దిపేట): వృద్ధురాలి మెడలోంచి బంగారు గొలుసును గుర్తు తెలియని దండుగుడు ఎత్తుకెళ్లాడు. ఈ ఘటన మండల కేంద్రంలోని కొమురవెల్లి మల్లన్న ఆలయ పరిసరాల్లో చోటు చేసుకుంది. స్థానికులు, పోలీసుల వివరాల ప్రకారం... మండల కేంద్రంలో సాములపల్లి అనసూర్య తన ఇంట్లో మెదటి అంతస్తులో నిద్రిస్తుంది. ఉదయం 5.30 నిమిషాల సమయంలో గుర్తుతెలియని వ్యక్తి ఇంట్లోకి చొరబడి ఆమె మెడలో నుంచి నాలుగున్నర తులాల బంగారు పుస్తెలతాడు లాక్కెల్లాడు. వెంటనే ఆమె అరవడంతో దొంగ పారిపోయాడు. బాధితురాలు పోలీసులకు ఫిర్యాదు చేయడంతో టాస్క్‌ఫోర్స్‌ ఏసీపీ రవీందర్‌, చేర్యాల సీఐ శ్రీను సంఘటనా స్థలాన్ని పరిశీలించి దర్యాప్తు చేస్తున్నట్లు ఎస్‌ఐ మహేశ్‌ తెలిపారు.

25 మంది బైండోవర్‌

హుస్నాబాద్‌రూరల్‌: పంచాయతీ ఎన్నికలను దృష్టిలో పెట్టుకొని గ్రామాల్లో ఎలాంటి గొడవలు జరగకుండా ముందస్తు చర్యలు తీసుకుంటున్నట్లు ఎస్సై లక్ష్మారెడ్డి శనివారం తెలిపారు. శనివారం మండలంలో 25 మంది పాత నేరస్తులను తహసీల్దారు ముందు బైండోవర్‌ చేసినట్లు చెప్పారు. మిగితా నేరస్తులకు అరెస్టు వారెంట్‌ జారీ చేయనున్నట్లు తెలిపారు. గ్రామాల్లో ప్రశాంత వాతావరణంలో ఎన్నికల నిర్వహణకు యువత, రాజకీయ నాయకులు సహకరించాలన్నారు.

గంజాయి స్వాధీనం

రాయికోడ్‌(అందోల్‌): మండలంలోని ఇటికేపల్లిలో ఎకై ్సజ్‌ శాఖ అధికారులు శనివారం నిర్వహించిన దాడుల్లో 230 గ్రాముల ఎండు గంజాయిని స్వాధీనం చేసుకున్నారు. ఎకై ్సజ్‌ ఎస్‌ఐ రమేశ్‌ తెలిపిన వివరాల మేరకు.. పక్కా సమాచారంతో సిబ్బందితో కలిసి ఇటికేపల్లి గ్రామ సమీపంలో దాడులు నిర్వహించారు. గ్రామానికి చెందిన శరణప్పతో గంజాయి స్వాధీనం చేసుకుని నిందితుడిని అదుపులోకి తీసుకున్నామని ఎస్‌ఐ తెలిపారు.