దైవదర్శనానికి వెళ్లి అనంతలోకాలకు..

జిన్నారం (పటాన్‌చెరు): తిరుమల తిరుపతి దర్శనానికి వెళ్లిన ఓ మహిళ తీవ్ర అస్వస్థతకు గురై మృతి చెందింది. కుటుంబ సభ్యులు తెలిపిన వివరాల ప్రకారం... మండలంలోని గడ్డపోతారం పట్టణ పరిధిలోని కిష్ణయ్యపల్లి గ్రామానికి చెందిన రూపేరావు సునీత(52) కుటుంబ సభ్యులతో తిరుపతి వెంకటేశ్వర స్వామి దర్శనానికి వెళ్లారు. శుక్రవారం క్యూలైన్‌లో ఒక్కసారిగా అస్వస్థతకు గురైంది. వెంటనే కుటుంబ సభ్యులు ఆస్పత్రికి తరలించారు. చికిత్స పొందుతూ సునీత శనివారం మృతి చెందింది. దైవదర్శనానికి వెళ్లి తిరిగిరాని లోకాలకు వెళ్లడంతో కుటుంబ సభ్యులు బోరున విలపించారు. కాగా కిష్టయ్యపల్లి గ్రామంలో విషాద ఛాయలు అలుముకున్నాయి.

వాహనం ఢీకొని వృద్ధురాలు..

కొండపాక(గజ్వేల్‌): గుర్తు తెలియని వాహనం ఢీకొట్టడంతో వృద్ధురాలు మృతి చెందింది. ఈ ఘటన మండలంలోని తిమ్మారెడ్డిపల్లి శివారులో శనివారం రాత్రి చోటు చేసుకుంది. వివరాలు ఇలా ఉన్నాయి. తిమ్మారెడ్డిపల్లిలో మార్వాడి మమత భర్త దేవదానం సుమారు నెల రోజుల కిందట ఆత్మహత్య చేసుకున్నాడు. దీంతో కొమురవెళ్లి మండలంలోని రాంసాగర్‌ గ్రామానికి చెందిన భూదవ్వ (75) మనవరాలు మమత వద్దే ఉంటుంది. ఈ క్రమంలో వృద్ధాప్య పింఛన్‌ తీసుకోవడానికి ఉదయం రాంసాగర్‌కు వెళ్లి తిరిగి వస్తుంది. ఈ క్రమంలో తిమ్మారెడ్డిపల్లి శివారులో రాజీవ్‌ రహదారిపై ఉన్న ఐనాపూర్‌ క్రాస్‌ రోడ్డు వద్ద ఆర్టీసీ బస్సు దిగింది. మనుమరాలి ఇంటికి నడుచుకుంటూ వెళ్తూ రోడ్డు దాటే క్రమంలో హైదరాబాద్‌ నుంచి కరీంనగర్‌ వెళ్తున్న గుర్తు తెలియని వాహనం ఆమెను ఢీకొట్టి ఆపకుండా వెళ్లిపోయింది. దీంతో తీవ్ర గాయలై అపస్మారక స్థితిలోకి వెళ్లిన ఆమెను అంబులెన్సులో సిద్దిపేట ప్రభుత్వ ఆస్పత్రికి తరలిస్తుండగా మృతి చెందింది. మనవరాలు ఫిర్యాదుతో పోలీసులు కేసు నమోదు చేశారు.

చికిత్స పొందుతూ వ్యక్తి ..

చిన్నశంకరంపేట(మెదక్‌): రోడ్డు ప్రమాదానికి గురై చికిత్స పొందుతూ వ్యక్తి మృతి చెందాడు. ఈ సంఘటన శనివారం చోటుచేసుకుంది. నార్సింగి పోలీస్‌స్టేషన్‌ పరిధిలోని వల్లభాపూర్‌ గ్రామానికి చెందిన ధర్మారం రాములు(30) ఈ నెల 11న తల్లిని ఆస్పత్రిలో చూపించి, బైక్‌పై ఇంటికి తిరిగి వస్తున్నాడు. ఈ క్రమంలో జాతీయ రహదారిపై గుర్తు తెలియని వాహనం వీరిని వెనుక నుంచి ఢీకొట్టింది. ఈ ప్రమాదంలో తల్లి బాలమణి అక్కడికక్కడే మృతి చెందగా, రాములుకు గాయాలయ్యాయి. వెంటనే ఆస్పత్రికి తరలించగా చికిత్స పొందుతు శనివారం మృతి చెందాడు. వాహనం ఆచూకీ ఇప్పటికీ లభించలేదు. తల్లి మృతి చెందిన 14 రోజులకు కుమారుడు మృతి చెందడంతో గ్రామంలో విషాద ఛాయలు అలుముకున్నాయి.

దైవదర్శనానికి వెళ్లి అనంతలోకాలకు..