కోల్‌కారిడార్‌కు గ్రీన్‌సిగ్నల్‌

సాక్షి, పెద్దపల్లి/గోదావరిఖని: పెద్దపల్లి జిల్లా రామగుండం – భద్రాద్రి కొత్తగూడెం జిల్లా మణుగూరు మధ్య రైల్వేలైన్‌ నిర్మాణానికి కేంద్రప్రభుత్వం నుంచి గ్రీన్‌సిగ్నల్‌ లభించింది. తెలంగాణలోని పలు ప్రాంతాల అభివృద్ధికి ఇది అత్యంత కీలకంగా మా రనుంది. కొత్త రైలు మార్గాన్ని కోల్‌కారిడార్‌ పేరిట పిలవాలని నిర్ణయించారు. రామగుండం, మంథని, భూపాలపల్లి, మేడారం నుంచి రైల్వేలైన్‌ నిర్మిస్తారు. దూర భారం తగ్గడంతోపాటు సింగరేణి బొగ్గు రవాణాకు సులభతరమైన మార్గం అందుబాటులోకి వస్తుంది. 1999లో తొలిసారి సర్వే ప్రారంభించారు. 2013–14లో ఆధునికీకరణకు ఆమోదం తెలిపారు.

కేంద్రప్రభుత్వానికి డీపీఆర్‌..

రామగుండం– మణుగూరు రైల్వే ప్రాజెక్టు డీపీఆర్‌(డీటైల్డ్‌ ప్రాజెక్టు రిపోర్టు) కేంద్రప్రభుత్వానికి సమర్పించారు. 2024 మేలో భూ సేకరణ కోసం గెజిట్‌ నోటిఫికేషన్‌ విడుదల చేసింది. అధికారిక స్పెషల్‌ రైల్వే ప్రాజెక్టుగా ప్రకటించింది. ఇప్పటికే భూసేకరణ ప్రారంభమైంది.

ఇవే ప్రయోజనాలు..

కోల్‌కారిడార్‌ రైల్వే ప్రాజెక్టు ద్వారా అనేక ప్రయోజనాలు ఉంటాయి. సింగరేణి బొగ్గు రవాణా సులభతరం కానుంది. ఆదివాసీ, గ్రామీణ ప్రాంతాలు, పల్లెటూళ్లకు మెరుగైన రైలు సౌకర్యం అందుబాటులోకి వస్తుంది. పర్యాటక, కార్మిక, ధార్మిక రంగాల్లో ప్రగతి సాధిస్తాయి.

తగ్గనున్న దూరభారం..

రైల్వే ప్రాజెక్టు పొడవు 207 కి.మీ. ఉంటుందని అంచనా వేశారు. ప్రస్తుతం ఇదే గమ్యానికి చేరుకునేందుకు 286 కి.మీ.కుపైగా ప్రయాణించాల్సి వస్తోంది. దీనిద్వారా సుమారు 70 మిలియన్‌ టన్నుల బొగ్గు రవాణా సులభమవుతుందని భావిస్తున్నారు. మణుగూరు – రామగుండం మధ్య కొత్తగా లింక్‌ ఏర్పడితే భద్రాద్రి – కొత్తగూడెం ప్రాంతాలకు ప్రయాణం మరింత మెరుగవుతుంది. మంథని, మేడారం జాతర ప్రాంతానికి తక్కువ దూరంతో చేరుకునే వీలుంది. ఖనిజ, వాణిజ్య సామగ్రి రవాణాలో కూడా కీలకం కానుంది.

భూసేకరణకు ముందున్న సవాళ్లు

భూసేకరణ ప్రక్రియ దీనికి సవాల్‌గా మారనుంది. భూసేకరణ చివరివరకు పారదర్శకంగా చేయాల్సి ఉంటుంది. ప్రాజెక్ట్‌ పూర్తి అయ్యే వరకు, ఫండింగ్‌, ట్రాక్ట్‌ లేఅవుట్‌, భూ విలువ, భూ నిర్లిప్తత వంటి మార్గాలు స్థిరంగా ఉండాల్సి ఉంటుంది. సమయ పట్టిక ఇంకా స్పష్టంగా ప్రకటించలేదు. ట్రెయిన్ల కనెక్టవిటీ ఎప్పటివరకు ప్రారంభం అవుతుందనేదానిపైనా ఇంకా స్పష్టత లేదు.

9 రైల్వేస్టేషన్లు..

కొత్త మార్గంలో 9 రైల్వేస్టేషన్లు నిర్మించాలని అంచనా వేశారు. కేంద్ర ప్రభుత్వం దీనికి గ్రీన్‌సిగ్నల్‌ ఇవ్వడంతో భూసేకరణ ఇటీవల ప్రారంభమైంది.

రైల్వేమార్గం సాంకేతిక వివరాలు

కోల్‌కారిడార్‌కు గ్రీన్‌సిగ్నల్‌