నాడు నిశ్చింతగా అమ్మ ఒడి.. నేడు తల్లికి శఠగోపం

May 31 2025 1:22 AM | Updated on May 31 2025 1:22 AM

కూటమి అధికారంలోకి రాగానే ఇంట్లో ఎంతమంది చదువుకున్న పిల్లలుంటే.. అందరికీ తల్లికి వందనం పథకం కింద రూ.15 వేలు చొప్పున జమ చేస్తామని చంద్రబాబు ప్రకటించారు. గతంలో వైఎస్సార్‌సీపీ ప్రభుత్వం అందజేసిన అమ్మ ఒడి పథకాన్ని రద్దు చేశారు.

నాడు: వైఎస్సార్‌సీపీ ప్రభుత్వ హయాంలో క్రమం తప్పకుండా అర్హులైన ప్రతి ఒక్కరికీ అమ్మ ఒడి పథకం లబ్ధి అందేది. జిల్లాలో ఈ పథకం కింద వేలాది మంది లబ్ధిదారులు గత ప్రభుత్వ హయాంలోనే రూ.493.28 కోట్ల మేర లబ్ధి పొందారు. ప్రభుత్వ, ప్రైవేట్‌ పాఠశాలలనే తేడా లేకుండా అర్హతే ప్రామాణికంగా పథకాన్ని గత ప్రభుత్వం వర్తింపజేసింది. ఆ డబ్బులు పిల్లల ఫీజులు, ఇతర అవసరాలకు ఉపయోగపడేవని తల్లిదండ్రులు చెబుతున్నా రు. ఇదే కాక.. విద్యాదీవెన కింద రూ.23.42 కోట్లు, వసతిదీవెన కింద రూ.15.84 కోట్లు చొప్పున వారి ఖాతాల్లోకి జమ చేశారు. ఏటా క్రమం తప్పకుండా ఈ నిధులను విడుదల చేస్తూ, వారి చదువుకు ఆటంకం లేకుండా చూసుకునేది.

నేడు : తల్లికి వందనం పథకమని చంద్రబాబు ప్రభుత్వం శఠగోపం పెట్టింది. అందరు బిడ్డలకూ కాదు కదా.. కనీసం ఒక్కరికై నా రూపాయి విదల్చలేదు. ఇదిగో అదిగో అంటూ ఏడాది కాలయాపన చేసేశారు. ఈ విద్యాసంవత్సరంలోనైనా అమలు చేస్తారా? అని జిల్లాలోని దాదాపు 1,80,000 మంది అర్హులైన విద్యార్థుల తల్లులు ఎదురు చూస్తున్నారు. దీవెన డబ్బులు విడుదల చేయకపోవడంతో విద్యార్థులు ఫీజులు కట్టుకోలేని పరిస్థితి ఏర్పడింది. చాలా పాఠశాలలు/కళాశాలలు హాల్‌ టికెట్లు ఇవ్వడానికి నిరాకరించాయి. దీంతో ప్రతి సోమవారం పీజీఆర్‌ఎస్‌ కార్యక్రమానికి విద్యార్థులు వచ్చిన సందర్భాలు ఉన్నాయి.