రోడ్డు దాటాలంటే వణుకు..

ముప్పాళ్ల: ముప్పాళ్లలోని జిల్లా పరిషత్‌ ఉన్నత పాఠశాలలోని విద్యార్థులు నిత్యం భయం భయంగా పాఠశాలకు రాకపోకలు సాగిస్తున్నారు.

పాఠశాలను ఆనుకునే సత్తెనపల్లి–నరసరావుపేట ప్రధాన రహదారి ఉండటంతో రోడ్డు దాటాలంటే వణికిపోతున్నారు. రహదారిపై ప్రమాద సూచికలు కూడా లేకపోవటం ముప్పుగా మారింది. ఇక్కడ సుమారు 430 మందికి పైగా విద్యార్థులు విద్య నభ్యసిస్తున్నారు. ఎక్కువ మంది పిల్లలు సమీప గ్రామాలైన ముప్పాళ్ల, గోళ్లపాడు, కుందురువారిపాలెం, లంకెలకూరపాడు, నరసరావుపేట మండలంలోని ములకలూరు, ఇస్సపాలెం, రెడ్డిపాలెం గ్రామాల నుంచి వచ్చి వెళుతుంటారు. పాఠశాలకు వచ్చే సమయంలో, ఇంటికి వెళ్లే సమయంతో పాటుగా ముప్పాళ్లకు చెందిన పిల్లలు మధ్యాహ్నం ఇంటికి వెవెళ్లే సమయంలో రహదారి దాటడం సవాల్‌గా మారింది. నిత్యం వందలాది వాహనాలు మితిమీరిన వేగంతో వెళుతున్నాయి. పాఠశాల ఉందనే కనీస అవగాహన లేక, అదే వేగంతో వెళుతున్నాయి. నిబంధనల ప్రకారం పాఠశాల సమీపంలో రహదారిపై హెచ్చరికల బోర్డులు ఏర్పాటు చేయలేదు. రహదారిపై వేసిన స్పీడు బ్రేకర్‌ కూడా కనిపించకపోవటంతో వాహనాల వేగానికి నియంత్రణే కరువైంది.

రోడ్డు దాటాలంటే వణుకు..