జేఎన్‌వీ ప్రవేశ పరీక్ష హాల్‌టికెట్లు విడుదల

చిలకలూరిపేటటౌన్‌: నవోదయ విద్యాలయ సమితి డిసెంబర్‌ 13న నిర్వహించే ఆరో తరగతి ప్రవేశ పరీక్షలకు సంబంధించిన అడ్మిట్‌ కార్డులను ఆన్‌లైన్‌లో విడుదల చేసినట్లు మద్దిరాల జేఎన్‌వీ ప్రిన్సిపాల్‌ నల్లూరి నరసింహారావు తెలిపారు. శనివారం ఆయన వివరాలను వెల్లడించారు. 2026–27 విద్యా సంవత్సరానికి ఆరో తరగతి ప్రవేశ పరీక్షలు ఉదయం 11.30 నుంచి మధ్యాహ్నం 01.30 వరకు ఉంటాయన్నారు. దరఖాస్తు చేసుకున్న అభ్యర్థులు తమ హాల్‌ టికెట్‌ను వెంటనే అధికారిక వెబ్‌సైట్‌: హెచ్‌టీటీపీఎస్‌:// సీబీఎస్‌ఈఐటీ ఎంఎస్‌. ఆర్‌సీఐ ఎల్‌.జీవోవీ.ఇన్‌/ఎన్‌వీఎస్‌/ నుండి ఉచితంగా డౌన్‌న్‌లోడ్‌ చేసుకోవాలని సూచించారు.

ముఖ్య సూచికలు...

విద్యార్థుల తల్లిదండ్రులు అడ్మిట్‌ కార్డును డౌనన్‌లోడ్‌ చేయడంలో లేదా ఇతర పరీక్ష సంబంధిత విషయాలలో ఏవైనా సాంకేతిక సమస్యలు ఎదురైతే, తక్షణ సహాయం కోసం 9494676751 హెల్ప్‌లైన్‌ నంబర్‌ను సంప్రదించాలన్నారు. అడ్మిట్‌కార్డులో పొందు పరిచిన పరీక్ష కేంద్రం పేరు, చిరునామా, తేదీ, సమయాన్ని విద్యార్థుల తల్లిదండ్రులు సరి చూసుకోవాలని సూచించారు. పరీక్ష రోజున అభ్యర్థులు అడ్మిట్‌కార్డు, ఆధార్‌ కార్డు తప్పనిసరిగా తీసుకురావాలన్నారు. ఈ రెండూ లేనిదే పరీక్ష రాయడానికి అనుమతి ఉండదన్న విషయాన్ని అభ్యర్థులు, తల్లిదండ్రులు గ్రహించాలన్నారు. ముఖ్యంగా అభ్యర్థులు పరీక్షా కేంద్రానికి సకాలంలో ఉదయం 10.30 గంటలకంటే ముందే చేరుకోవడానికి తగిన ఏర్పాట్లు చేసుకోవాలని కోరారు.