చౌక దుకాణాల్లో ఈజీ మార్ట్‌లు ఏర్పాటుకు సన్నాహాలు

సత్తెనపల్లి: దారిద్య్రరేఖకు దిగువనున్న నిరుపేదలకు రేషన్‌ బియ్యంతోపాటు తక్కువ ధరలకు అన్ని రకాల నిత్యావసరాలు ఒకేచోట చౌక ధరల దుకాణాల్లోనే అందించాలనే ఉద్దేశంతో చౌక దుకాణాల్లో ఈజీ మార్ట్‌ ఏర్పాటుకు ప్రభుత్వం సన్నాహాలు చేస్తుందని జిల్లా పౌరసరఫరాల శాఖ అధికారి ఎంవీ ప్రసాద్‌ చెప్పారు. పట్టణంలోని ఆర్డీవో కార్యాలయంలో శనివారం సత్తెనపల్లి చౌక ధరల దుకాణాల డీలర్లతో సమీక్ష సమావేశం నిర్వహించారు. డీఎస్‌ఓ మాట్లాడుతూ ఔత్సాహికులైన డీలర్లు ముందుకు వస్తే ఆ నివేదికలను తయారు చేసి ప్రభుత్వానికి పంపుతామన్నారు. ఏఏ సరుకులు ఈజీ మార్ట్‌ యాప్‌ ద్వారా అందుబాటులో ఉంచాలి? వాటి వల్లన అటు పేదలకు కలిగే మేలు? ఇటు డీలర్లకు ఒనగూరే ఉపాధి గురించి ఈజీ మార్ట్‌ ప్రతినిధి బోస్‌ వివరించారు. సమావేశంలో డీఏఓ చంద్రారెడ్డి, డిప్యూటీ తహసీల్దార్‌ నెల్లూరు రవికుమార్‌, రెవెన్యూ ఇన్‌స్పెక్టర్‌ బోస్‌బాబు, చౌక ధరల దుకాణాల డీలర్లు పాల్గొన్నారు.

రేషన్‌ షాపులకు సకాలంలో అందించాలి

రాజుపాలెం: మండలంలోని అన్ని రేషన్‌ షాపులకు సకాలంలో బియ్యం, పంచదార పంపించాలని జిల్లా పౌరసరఫరాల శాఖాధికారి ఎంవీ ప్రసాద్‌ తెలిపారు. రాజుపాలెంలోని ప్రభుత్వ పౌరసరఫరాల గోదామును ఆయన శనివారం పరిశీలించారు. ఉన్న స్టాక్‌ మొత్తాన్ని తనిఖీ చేసి స్టాకు రిజిస్టర్లను పరిశీలించారు. అన్నీ సక్రమంగా ఉన్నట్లు గమనించారు. ఆయన వెంట తహసీల్దారు ఎన్‌ సరోజ, డిప్యూటీ తహసీల్దారు జానీబాషా, గోదాం సిబ్బంది ఉన్నారు.

జిల్లా పౌరసరఫరాల శాఖాధికారి

ఎంవీ ప్రసాద్‌