రైతులు సొంత వాహనాల్లో ధాన్యం రవాణా చేసుకోవచ్చు

కొల్లిపర: ఇకనుంచి ధాన్యం రైతులు కొనుగోలు కేంద్రాల నుంచి జీపీఎస్‌ అనుసంధానం లేకుండానే వారి సొంత వాహనాల ద్వారా కూడా మిల్లర్ల వద్దకు ధాన్యం తరలించుకొనే వెలుసుబాటును ప్రభుత్వం కల్పించిందని జాయింట్‌ కలెక్టర్‌ ఆశుతోష్‌ శ్రీవాస్తవ రైతులతో అన్నారు. మండల పరిధిలోని హనుమాన్‌పాలెం, తూములూరు, చివలూరు గ్రామాల్లో రోడ్డు వెంట ఆరబోసిన ధాన్యం రాశులను శనివారం తహసీల్దార్‌ జి.సిద్ధార్ధతో కలసి ఆయన పరిశీలించి, కొనుగోలు కేంద్రాల్లో రైతులు ఎదుర్కొంటున్న సమస్యలను అడిగి తెలుసుకున్నారు. ఈ సందర్భంగా జేసీ మాట్లాడుతూ రెండు రోజుల్లో దిత్వా తుఫాన్‌ ప్రభావం కారణంగా వర్షాలు కురిసే అవకాశం ఉన్నందున రైతులు అప్రమత్తంగా ఉంటూ వరి నూర్పిళ్లను వేగవంతం చేయాలన్నారు. ఇటువంటి సమయంలో రైతులను ఆదుకోవాలని ఉద్దేశంతో జీపీఎస్‌తో సంబంధం లేకుండా రైతులు తమ సొంత ట్రాక్టర్లు లేకపోతే ఇతర వాహనాల ద్వారా వారి ధాన్యాన్ని రైతు సేవా కేంద్రాల ద్వారా నమోదు చేసుకొని, కేటాయించిన మిల్లర్లు వద్దకు వారే నేరుగా రవాణా చేసుకునే అవకాశం కల్పించినట్లు తెలిపారు. రైతులు పండించిన ప్రతి ధాన్యం గింజను కొనుగోలు చేయటానికి ప్రభుత్వం సిద్ధంగా ఉందన్నారు. జేసీ వెంట ఇన్‌చార్జి ఎంపీడీఓ భార్గవ్‌, ఏఓ శ్రీనివాసరెడ్డి, రైతులు అవుతు సుధాకరరెడ్డి, ఎ.శివారెడ్డి, అడపా నారాయణరెడ్డి తదితరులు ఉన్నారు.

జాయింట్‌ కలెక్టర్‌ అశుతోష్‌ శ్రీవాస్తవ