విపత్తుల నివారణపై అవగాహన

రాయగడ: విపత్తు సమయంలో ఎలా స్పందించి, ప్రాణాలను కాపాడాలన్న అంశంపై సదరు సమితి మల్లిగాం గ్రామంలో గల పాఠశాలలో శనివారం విద్యార్థులకు శిక్షణ శిబిరం జరిగింది. ఈ శిబిరంలో వివిధ పాఠశాలలకు చెందిన 30 మంది విద్యార్థులు పాల్గొన్నారు. జిల్లా యంత్రాంగం ఆధ్వర్యంలో జరిగిన ఈ శిక్షణ శిబిరంలో భాగంగా అత్యవసర సమయాల్లో అదేవిధంగా ప్రాణాపాయ స్థితిలో ఉన్న వారిని ఎలా రక్షించి కాపాడాలన్న అంశంపై శిక్షణ కల్పించారు. ఉరుములు, మెరుపులు సమయంలో పిడుగులు పడుతుంటాయి. పిడుగుపాటు వల్ల ప్రాణనష్టం సంభవించకుండా ఎలా రక్షించుకోవాలన్న విషయాలపై అవగాహన కల్పించారు. ప్రధమ చికిత్స ఎలా అందించాలన్న వాటిపై శిక్షణ కల్పించారు. ఒ.ఎస్‌.డి.ఎ.ఎం.ఎ సంస్థకు చెందిన మితాలి సాహు, వైశాఖి స్వయ్‌ అనే ఇద్దరు రిసోర్స్‌ పర్సన్‌లు శిక్షణ ఇచ్చారు.

చోరీ కేసులో ఒడిశా వాసి అరెస్ట్‌

● రూ.8.60 లక్షల బంగారు, వెండి ఆభరణాలు స్వాధీనం

బద్వేలు అర్బన్‌ : స్థానిక సిద్దవటం రోడ్డులోని మసీదు కాంప్లెక్స్‌లో గల జె.బి.స్వర్ణ దుకాణంలో సుమారు మూడు నెలల క్రితం జరిగిన చోరీ కేసుకు సంబంధించి ఒడిశా రాష్ట్రానికి చెందిన నిందితుడిని బద్వేలు అర్బన్‌ పోలీసులు అరెస్టు చేశారు. అతని వద్ద నుంచి 72 గ్రాముల బంగారు ఆభరణాలు, ఐదున్నర కిలోల వెండి సామగ్రి స్వాధీనం చేసుకున్నారు. శనివారం స్థానిక అర్బన్‌ స్టేషన్‌లో నిర్వహించిన విలేకరుల సమావేశంలో మైదుకూరు డీఎస్పీ జి.రాజేంద్రప్రసాద్‌ వివరాలు వెల్లడించారు. పట్టణంలోని మార్కెట్‌వీధికి చెందిన జబీవుల్లా స్థానిక సిద్దవటం రోడ్డులోని మసీదు కాంప్లెక్స్‌లో గత కొన్నేళ్లుగా వెండి, బంగారు ఆభరణాల దుకాణం నిర్వహిస్తున్నాడు. ఈ ఏడాది ఆగస్టు నెల 9వ తేదీన రోజూ మాదిరే వ్యాపార కార్యకలాపాలు పూర్తి చేసుకుని దుకాణంలోని వస్తువులన్నీ సర్ది బ్యాగులో ఉంచి ఇంటికి తీసుకువెళ్లేందుకు సిద్ధమయ్యాడు. అప్పటికే కాపు కాసిన కొందరు యువకులు దుకాణంలోకి వెళ్లి.. బంగారు, వెండి ఆభరణాలను భద్రపరిచిన బ్యాగులను తీసుకుని బైక్‌లో పరారయ్యారు. బాధితుడు ఇచ్చిన ఫిర్యాదు మేరకు కేసు నమోదు చేసుకున్న అర్బన్‌ పోలీసులు దర్యాప్తు చేపట్టారు. సీసీ కెమెరాల ఆధారంగా నిందితుడు ఒరిస్సా రాష్ట్రం గంజామ్‌ జిల్లా ఆస్కా తాలూకా కలసందాపూర్‌ గ్రామానికి చెందిన దాస్‌ శ్రీరామ్‌గా గుర్తించారు. ఈ క్రమంలో శనివారం అర్బన్‌ సీఐ లింగప్ప సిబ్బందితో కలిసి బద్వేలు– నెల్లూరు ప్రధాన రహదారిలోని పాలిటెక్నిక్‌ కళాశాల వద్ద వాహనాలు తనిఖీ చేస్తుండగా.. దాస్‌ శ్రీరామ్‌ ఆటోలో వస్తుండగా ఆపి తనిఖీ చేయగా అతని వద్ద బంగారు, వెండి ఆభరణాలు లభించాయి. నిందితుడిని అదుపులోకి తీసుకుని కోర్టు ఎదుట హాజరు పరిచినట్లు డీఎస్పీ తెలిపారు. కాగా నిందితుడు దాస్‌శ్రీరామ్‌ అతని స్నేహితుడైన ఒరిస్సా రాష్ట్రానికి చెందిన రావులబినోద్‌ అలియాస్‌ బిన్ను గతంలో పలు చోరీ కేసులలో ఒరిస్సా రాష్ట్రంలో జైలుకు వెళ్లారు. వీరు ఆంధ్రప్రదేశ్‌లోని రాజమండ్రికి చెందిన తొండపోతురాజు, అతని అన్న మౌలాలితో కలిసి బద్వేలులో చోరీకి పాల్పడినట్లు విచారణలో తేలిందని, త్వరలోనే వారిని కూడా అరెస్టు చేస్తామని డీఎస్పీ తెలిపారు. సమావేశంలో అర్బన్‌ ఎస్‌ఐ సత్యనారాయణ, క్రైమ్‌ పార్టీ ఏఎస్‌ఐ రాంభూపాల్‌రెడ్డి, అర్బన్‌ స్టేషన్‌ హెడ్‌ కానిస్టేబుల్‌ కె.శ్రీనివాసులు, కానిస్టేబుళ్లు శివ, వెంకటేష్‌, ఓబులేసు తదితరులు పాల్గొన్నారు.