సాహిత్యంతో జీవితావిష్కరణ

భువనేశ్వర్‌: సాహిత్యం విలువలతో కూడిన జీవితాలను ఆవిష్కరిస్తుందని రాష్ట్ర గవర్నర్‌ డాక్టర్‌ హరిబాబు కంభంపాటి అన్నారు. స్థానిక శిక్షా ’ఓ’ అనుసంధాన్‌ (ఎస్‌ఓఏ) విశ్వవిద్యాలయంలో శనివారం జరిగిన మూడో విడత ఎస్‌ఓఏ సాహిత్య ఉత్సవం ప్రారంభోత్సవంలో ఆయన మాట్లాడారు. సంస్కృతి, సృజనాత్మకత, కృత్రిమ మేధస్సు ఇతివృత్తంతో ఈ కార్యక్రమాన్ని చేపట్టారు. వర్ధమాన పరిస్థితులకు అనుకూలంగా సందర్భోచిత కార్యక్రమం చేపట్టడం హర్షణీయమని గవర్నర్‌ అభినందించారు. విద్యా వ్యవస్థల ఆవిర్భావం, అభివృద్ధికి ముందు సమాజాలు కథలు, కవితలు, ఇతిహాసాల ద్వారా సత్యం, న్యాయం, ధైర్యం, కరుణ వంటి విలువలను నేర్చుకున్నామని గవర్నర్‌ అన్నారు. దేశవ్యాప్తంగా ప్రముఖ రచయితలు, కవులు, పండితులు మరియు కళాకారులు హాజరయ్యారు. ఈ సందర్భంగా ప్రముఖ కవి, గేయ రచయిత, సాహిత్య రచయిత పద్మభూషణ్‌ జావేద్‌ అక్తర్‌కు మొదటి ఎస్‌ఓఏ సాహిత్య సమ్మాన్‌ 2025తో సత్కరించారు.