వ్యక్తి అదృశ్యం.. కేసు నమోదు

చౌటుప్పల్‌ : సంస్థాన్‌నారాయణపురం మండలం పుట్టపాక గ్రామానికి చెందిన వ్యక్తి శుక్రవారం రాత్రి అదృశ్యమయ్యాడు. పోలీసులు తెలిపిన వివరాల ప్రకారం.. పుట్టపాకకు చెందిన పున్న అనిత చౌటుప్పల్‌ పట్టణ కేంద్రంలోని మాంగళ్య షాపింగ్‌మాల్‌లో పనిచేస్తోంది. ఆమె భర్త బ్రహ్మయ్య చేనేత కార్మికుడు. శుక్రవారం సాయంత్రం అతడు పుట్టపాక నుంచి క్యారేజీ బ్యాగులు తీసుకొని తన భార్య పనిచేస్తున్న షాపింగ్‌మాల్‌ వద్దకు వెళ్లాడు. అక్కడ ఆమెకు ఆ బ్యాగులు చూపించి ఎలా ఉన్నాయని అడిగాడు. అవి బాగాలేవు, మరో కలర్‌ తీసుకురమ్మని ఆమె చెప్పింది. దీంతో అతడు స్వగ్రామానికి వెళ్తున్నానని చెప్పి అక్కడి నుంచి వెళ్లిపోయాడు. భార్య అనిత తన డ్యూటీ ముగిసిన తర్వాత ఇంటికి వెళ్లింది. ఆ సమయంలో భర్త ఇంట్లో కన్పించలేదు. ఎక్కడ ఉన్నాడో తెలుసుకునేందుకు ఫోన్‌ చేయగా స్విచ్చాఫ్‌ వచ్చింది. ఎంత వెతికినా బ్రహ్మయ్య ఆచూకీ లభించకపోవడంతో శనివారం ఆమె పోలీస్‌ స్టేషన్‌లో ఫిర్యాదు చేసింది. ఈ మేరకు కేసు నమోదు చేసుకొని దర్యాప్తు చేస్తున్నట్లు సీఐ మన్మథకుమార్‌ తెలిపారు.

ఆర్టీసీ బస్సులో ప్రయాణికుడి నగదు చోరీ

ఫ దొంగను వెంబడించడంతో బస్టాండ్‌ ఆవరణలో

నగదు పారేసి పరార్‌

సూర్యాపేటటౌన్‌ : ఆర్టీసీ బస్సులో ప్రయాణికుడి నగదు చోరీ చేసిన దొంగ.. ఆ నగదును బస్టాండ్‌ ఆవర ణలో పారేసి పరార య్యాడు. ఆ నగదు ఆర్టీసీ అధికారులు, పోలీసులు బాధితుడికి అప్పగించారు. ఆర్టీసీ అధికారులు, పోలీసులు తెలిపిన వివరాల ప్రకారం.. మద్దిరాల మండలం గుమ్మడవెల్లి గ్రామానికి చెందిన రామగిరి రాములు వడ్లు అమ్ముకున్న డబ్బులతో శనివారం తన సొంత గ్రామానికి వెళ్లేందుకు సూర్యాపేట పట్టణంలోని కొత్త బస్టాండ్‌లో తొర్రూర్‌ బస్సు ఎక్కుతుండగా.. అతడి జేబులోంచి రూ.44 వేల నగదును గుర్తుతెలియని వ్యక్తి దొంగిలించాడు. అది గమనించిన రాములు తోటి ప్రయాణికుల సహాయంతో ఆ దొంగను వెంబడించగా వారికి చిక్కకుండా బస్టాండ్‌ ఆవరణలో డబ్బులు వదిలేసి పారిపోయాడు. అది గమనించిన ఓ ప్రయాణికుడు విధి నిర్వహణలో ఉన్న కండక్టర్‌కు సమాచారం ఇవ్వగా కింద పడేసిన డబ్బులను బస్టాండ్‌లో విధులు నిర్వహిస్తున్న ఆర్టీసీ స్టేషన్‌ మేనేజర్‌ ఆర్‌వీ సింగ్‌కు అందజేశాడు. బాధితుడి ఫిర్యాదు మేరకు బస్టాండ్‌ ప్రాంతంలో విధులు నిర్వహిస్తున్న కానిస్టేబుల్‌ ఎండీ అఫ్సర్‌, ఆర్టీసీ స్టేషన్‌ మేనేజర్‌ చేతులమీదుగా బాధితుడు రాములుకు డబ్బును అందజేశారు.

వ్యక్తి అదృశ్యం.. కేసు నమోదు