అధునాతన హంగులతో అన్నప్రసాద కేంద్రం

యాదగిరిగుట్ట : యాదగిరిగుట్ట లక్ష్మీనరసింహస్వామి ఆలయానికి వచ్చే భక్తులకు అన్న ప్రసాదాన్ని అందించేందుకు గాను శాంత రుష్యశృంగ అన్నప్రసాద కేంద్రాన్ని వైటీడీఏ ఆధ్వర్యంలో అద్భుతంగా నిర్మాణం చేశారు. ఈ అన్న ప్రసాద భవనాన్ని ఆదివారం ఉదయం 10.42గంటలకు దాతలు వేగేశ్న సంస్థ ఆధ్వర్యంలో ప్రారంభించనున్నట్లు అధికారులు వెల్లడించారు.

2021లో పనులు ప్రారంభం..

యాదగిరి కొండకు దిగువన ఆధ్యాత్మిక వాడలో అన్నదాన భవన నిర్మాణ పనులకు 2021 మార్చిలో శంకుస్థాపన చేశారు. ఈ ఏడాది మార్చి 23న పనులు పూర్తయినప్పటికీ కొన్ని కారణాల చేత భవనాన్ని ప్రారంభించలేదు. ఈ అన్న ప్రసాద కేంద్రం నిర్మాణానికి 2.7ఎకరాల స్థలాన్ని వైటీడీఏ కేటాయించగా.. 1.3 ఎకరాల్లో అన్నదాన భవనాన్ని నిర్మించారు. ఈ నిర్మాణానికి వేగేశ్న ఫౌండేషన్‌ సంస్థ మొదట రూ.11కోట్లు విరాళం అందజేసింది. ఆ తర్వాత వైటీడీఏ సుమారు రూ.11కోట్ల వరకు ఖర్చు చేసింది. గతేడాది క్రితం మిగిలిన పనుల కోసం తిరిగి వేగెశ్న సంస్థ మరో రూ.2కోట్లు ఇచ్చింది.

ఒకేసారి 900 మంది భోజనం చేసేలా..

అన్నదాన భవనంలో 2 డైనింగ్‌ హాల్స్‌, రెండు వెయిటింగ్‌ హాల్స్‌, 12 స్టోర్‌రూమ్‌లు నిర్మించారు. అంతేకాకుండా 25శాతం స్థలంలో కిచెన్‌ సైతం ఏర్పాటు చేశారు. ఒకేసారి ఒక్కో హాల్‌లో సుమారు 450 మంది భక్తులు అన్న ప్రసాదాన్ని స్వీకరించవచ్చు. భక్తుల కోసం బయట గార్డెన్‌ సైతం ఏర్పాటు చేశారు. దీంతో గత మూడు, నాలుగు సంవత్సరాలుగా కొండకు దిగువన లక్ష్మీ పుష్కరిణి పక్కన దీక్షాపరుల మండపంలో తాత్కాలికంగా కొనసాగుతున్న అన్న ప్రసాద కేంద్రంలో సరైన సౌకర్యాలు లేక ఇబ్బందులు పడుతున్న భక్తులకు ఊరట లభించనుంది.

ఫ యాదగిరిగుట్టలో నేడు ప్రారంభం