షరా మామూలే!

ప్రైవేట్‌ ట్రావెల్స్‌ బస్సుల్లో తెరుచుకోని ఎమర్జెన్సీ డోర్లు
● భద్రత నిబంధనలు గాలికొదిలేసిన యాజమాన్యాలు ● విజిలెన్స్‌ తనిఖీల్లో వెలుగులోకి లోపాలు

సాక్షిప్రతినిధి, సంగారెడ్డి: ప్రైవేట్‌ ట్రావెల్స్‌ బస్సుల్లో భద్రతాలోపాలు షారా మామూలైపోయాయి. కర్నూలు వద్ద గత నెలలో జరిగిన ట్రావెల్స్‌ బస్సు అగ్ని ప్రమాదంలో 19 మంది మృత్యువాత పడిన విషయం విధితమే. ఈ ఘటన తర్వాత రవాణాశాఖ అధికారులు తనిఖీల పేరుతో కాస్త హడావుడి చేశారు. ఈ ఘటన కాస్త మరచిపోయినట్లు కాగానే ప్రస్తుతం ట్రావెల్స్‌ బస్సులు ఎప్పటిలాగే భద్రతా ప్రమాణాలను గాలికొదిలేశాయి. చాలా బస్సుల్లో వెనుక వైపు ఉన్న అత్యవసర ద్వారాన్ని పూర్తిగా మూసి వేసి.. దాని వద్ద ఒక సీటును బిగించి నడుపుతున్నారు. కొన్ని బస్సులకు ఈ అత్యవసర ద్వారం ఉన్నప్పటికీ, అది ఎంత తెరిచినా తెరుచుకోవడం లేదు. సాధారణ పరిస్థితుల్లోనే ఈ ద్వారం తెరుచుకోకపోతే, ప్రమాదం జరిగినప్పుడు పరిస్థితి ప్రశ్నార్థకంగా తయారైంది. కాసులకు కక్కుర్తి పడిన కొన్ని యాజమాన్యాలు కొన్ని బస్సుల్లో సీటింగ్‌ కెపాసిటీ కంటే రెండు, మూడు సీట్లు అధికంగా బిగించినట్లు అధికారుల తనిఖీల్లో తేలింది. దీంతో సీట్ల మధ్య దూరం తగ్గి ఇరుకుగా తయారైంది. అగ్ని ప్రమాదం జరిగినప్పుడు మంటలను ఆర్పేందుకు ఉంచే పరికరాల వినియోగంపై బస్సు సిబ్బందికి కనీస అవగాహన కూడా లేదని తనిఖీ అధికారులు గమనించారు.

రాష్ట్ర విజిలెన్స్‌, ఎన్‌ఫోర్స్‌మెంట్‌ అధికారులు ఇటీవల జిల్లాలోని ముంబై హైవేపై ఆకస్మిక తనిఖీలు చేశారు. ముత్తంగి ఔటర్‌ రింగ్‌ రోడ్డు వద్ద చేపట్టిన ఈ తనిఖీల్లో ఈ ట్రావెల్స్‌ బస్సుల్లోని భద్రతా లోపాలు మరోమారు వెలుగులోకి వచ్చాయి. ఇలా భద్రతా లోపాలతో నడుపుతున్న బస్సులు ఒక్కరోజే తొమ్మిదింటిని గుర్తించారు. వీటిపై కేసులు నమోదు చేసి రూ. 1.90 లక్షల జరిమానా విధించారు. ప్రతి పది బస్సులను తనిఖీలు చేస్తే భద్రతా ప్రమాణాలున్న బస్సులు కనీసం రెండు, మూడు కూడా ఉండటం లేదు. దీంతో ఈ ప్రైవేటు ట్రావెల్స్‌ బస్సుల్లో ప్రయాణించే వారి భద్రత ఎప్పటిలాగే గాలిలో దీపాలైపోయాయి.

అత్యధిక బస్సులు ఇక్కడి నుంచే ప్రారంభం

ఏపీలోని విజయవాడ, వైజాగ్‌, తిరుపతి, నెల్లూరు వంటి ప్రాంతాలతో పాటు, మహారాష్ట్రలోని షిర్డీ వంటి క్షేత్రాలు నిత్యం వందలాది ప్రైవేటు ట్రావెల్స్‌ బస్సులు వెళుతుంటాయి. ఇందులో సగానికి పైగా బస్సులు జిల్లాలోని పటాన్‌చెరు, ఇస్నాపూర్‌ ప్రాంతం నుంచే ప్రారంభమవుతాయి. కొన్ని సంగారెడ్డి నుంచి నడుపుతుంటారు. సదాశివపేట, సంగారెడ్డి, ఇస్నాపూర్‌, పటాన్‌చెరు, బీరంగూడ, రామచంద్రాపురం ఇలా ముంబై హైవేపై పికప్‌ పాయింట్లు ఉంటున్నాయి. అయితే ఈ బస్సులను రవాణాశాఖ అధికారులు ఎప్పటికప్పుడు తనిఖీలు చేయాల్సి ఉంటుంది. కానీ ప్రమాదాలు జరిగినప్పుడు హడావుడి చేస్తున్న ఈ శాఖ అధికారులు కొన్ని రోజులకే ఈ తనిఖీలను పట్టించుకోవడం లేదు. దీంతో ఈ ట్రావెల్స్‌ బస్సుల ఇష్టారాజ్యం కొనసాగుతోందనే అభిప్రాయం వ్యక్తమవుతోంది.