రెబెల్స్‌ బెడద

ఆదివారం శ్రీ 30 శ్రీ నవంబర్‌ శ్రీ 2025

మెదక్‌ అర్బన్‌: గ్రామ పంచాయతీ మొదటి దశ ఎన్నికల్లో నామినేషన్ల ఘట్టానికి తెరపడగా.. బుజ్జగింపుల ఎర మొదలైంది. పంచాయతీ ఎన్నికలు పార్టీ రహితంగా జరగాల్సి ఉన్నప్పటికీ, పార్టీల ప్రభావం స్పష్టంగా కనిపిస్తోంది. అయితే కాంగ్రెస్‌లో పలు చోట్ల రెబెల్స్‌ ప్రభావం కనిపిస్తుండగా, బీఆర్‌ఎస్‌లో అక్కడక్కడ రెబెల్స్‌ నామినేషన్లు దాఖలు చేశారు. ఒకే పార్టీ నుంచి ఒక్కరి కన్నా ఎక్కువ అభ్యర్థులు నామినేషన్‌ వేసిన చోట, పార్టీ అధినేతలు రంగంలోకి దిగి బుజ్జగింపులకు దిగుతున్నారు. మాట వినకపోతే తమ వంతు సహకారం అందదని, భవిష్యత్‌లో ఇబ్బంది పడాల్సి వస్తుందని ఓ నాయకుడు బహిరంగ సమావేశంలో హెచ్చరించారు. అయినా కాంగ్రెస్‌లో రెబల్స్‌ బెడద తప్పేలా కనిపించడం లేదు. అలాగే బీఆర్‌ఎస్‌లో సైతం అక్కడక్కడ ఒకే స్థానానికి ఇద్దరేసి అభ్యర్థులు పోటీ పడుతున్నారు. అయితే ఒకే పార్టీలో ఉన్న పోటీదారుల నామినేషన్లను ఉపసంహరించుకునేలా పార్టీ నాయకులు ప్రయత్నాలు కొనసాగిస్తున్నారు. తదుపరి రాజకీయ అవకాశాలు కల్పిస్తామని హామీలు ఇస్తున్నారు. మరికొన్ని చోట్ల స్థానిక నాయకులు, వివిధ రకాల ఆశలు చూపుతున్నట్లు సమాచారం. నామినేషన్ల ఉపసంహరణకు డిసెంబర్‌ 3 వరకు అవకాశం ఉన్నందున, రెబెల్స్‌ను పోటీ నుంచి తప్పించే అవకాశాలు ఉన్నా యని ప్రధాన అభ్యర్థులు ఆశపడుతున్నారు.

మొదటి విడతలో 160 పంచాయతీలు

జిల్లాలోని పాపన్నపేట, హవేళిఘణాపూర్‌, అల్లాదుర్గం, రేగోడ్‌, టేక్మాల్‌, పెద్దశంకరంపేట మండలాల్లో మొదటి విడత ఎన్నికలు జరుగనున్నాయి. మొత్తం 160 పంచాయతీలు, 1,402 వార్డులకు డిసెంబర్‌ 11న ఎన్నికలు జరుగనున్నాయి. కాగా ఇప్పటికే నామినేషన్ల గట్టం ముగియగా, డిసెంబర్‌ 3 వరకు ఉపసంహరణ ఉంటుంది.

ప్రధాన పార్టీలకు తప్పని తిప్పలు