తెలంగాణ నరదిష్టి అంటే సహించం

జడ్చర్ల: తెలంగాణ నరదిష్టి పెట్టడంతోనే కోనసీమలో కొబ్బరిచెట్లు మాడిపోయావన్న సినీ నటుడు, ఏపీ డిప్యూటీ సీఎం పవన్‌కల్యాణ్‌ వ్యాఖ్యలపై మహబూబ్‌నగర్‌ జిల్లా జడ్చర్ల ఎమ్మెల్యే అనిరుధ్‌రెడ్డి తీవ్రస్థాయిలో మండిపడ్డారు. శనివారం ఆయన జడ్చర్లలో మీడియాతో మాట్లాడుతూ తెలంగాణ నరదిష్టితో గోదావరి ప్రాంతం నాశనమయ్యిందని పవన్‌ ఆరోపణలు చేయడం తగదన్నారు. తన వ్యాఖ్యలను వెనక్కి తీసుకుని వెంటనే క్షమాపణ చెప్పాలని డిమాండ్‌ చేశారు. తెలంగాణలో వ్యాపారాలు చేసుకునే వారంతా ఏపీకి చెందిన వారేనని, తాము ఆంధ్రప్రదేశ్‌కు చెందిన వారితో స్నేహపూర్వకంగా ఉన్నాం కాబట్టే తెలంగాణలో వ్యాపారాలు చేసుకోగలుగుతున్నారని అన్నారు. నీటి పారుదల, నిర్మాణ తదితర రంగాలలో ఏపీ వారే ఉన్నారని, తాము నరదిష్టి పెడితే ఇక్కడ మీరంతా ఎలా బాగుపడుతున్నారని ప్రశ్నించారు. హైదరాబాద్‌లో ఎందుకు ఆస్తులు కొనుగోలు చేస్తున్నావంటూ మండిపడ్డారు. పవన్‌ కూడా హైదరాబాద్‌లో ఆస్తులు కొని అప్పులు తీర్చుకున్నాడట కదా.. ఏపీ డిప్యూటీ సీఎంగా ఉంటున్న పవన్‌కు ఇక్కడేం పని అంటూ నిలదీశారు. ఏపీపై నిజంగా ప్రేమ ఉంటే ఇక్కడి ఆస్తులు అమ్మేసుకుని విజయవాడలో ఉండి ప్రజలకు సేవ చేయాలని హితవు పలికారు. ఇటీవల పవన్‌ నటించిన ఓ ప్లాప్‌ అయిన సినిమాను కూడా తాము రూ.800 పెంచి నిర్మాత బాగు కోరి సినిమా చూశామని గుర్తుచేశారు. 2019 ఎన్నికల్లో పోటీ చేసి గెలువలేక పోయాడని, 2024 ఎన్నికల్లో సింగిల్‌గా పోటీ చేసి ఉంటే సత్తా తెలిసి ఉండేదని, చంద్రబాబుతో పొత్తు పెట్టుకుని గట్టెక్కావన్నారు. మెగాస్టార్‌ చిరంజీవి తమ్ముడిగానే నీకు స్థానం ఉందని లేకుంటే ఎక్కడ ఉండేవాడివన్నారు. సామాన్యుడైన తానే మరో పదేళ్ల తర్వాత సీఎం కావాలన్న కోరిక ఉందని, అలాంటిది 15 ఏళ్ల తర్వాత 70 ఏళ్ల వయస్సులో పవన్‌ సీఎం అయ్యి చేసేదేముంటుందని ఎద్దేవా చేశారు. మీ కుటుంబంలో రామ్‌చరణ్‌, అల్లు అర్జున్‌ తెలంగాణ అమ్మాయిలనే పెళ్లి చేసుకున్నారని అలాంటిది తెలంగాణను అవమానించే విధంగా మాట్లాడితే సహించబోమన్నారు. సినిమా టికెట్‌ ధరలు పెంచాలంటే అందులో 20 శాతం మొత్తాన్ని సినీ కార్మికులకు ఇవ్వాలని సీఎం రేవంత్‌రెడ్డి నిర్ణయం తీసుకోవడం హ్యాట్సాప్‌ అన్నారు.

చట్టం దృష్టిలో అందరూ సమానమే..

జడ్చర్ల: చట్టం అందరికీ సమానమేనని, ఎవరు తప్పు చేసినా శిక్ష అనుభవించాల్సి ఉంటుందని ఎమ్మెల్యే అనిరుధ్‌రెడ్డి అన్నారు. శనివారం ఆయన మీడియాతో మాట్లాడుతూ.. ఇటీవల జడ్చర్ల పోలీస్‌స్టేషన్‌లో భూత్పూర్‌ మండల కాంగ్రెస్‌ పార్టీ నాయకులు, పోలీసులకు మధ్య జరిగిన ఘటనపై స్పందించారు. పోలీసులపై దాడి చేసే ధైర్యం తెలంగాణలో ఎవరికీ లేదన్నారు. అలా దాడి చేసినట్లు రుజువులు ఉంటే పోలీసులు వెంటనే కేసులు నమోదు చేస్తారన్నారు. తమ పార్టీ కార్యకర్తలు పోలీస్‌స్టేషన్‌లో సెటిల్‌మెంట్లు చేసే పరిస్థితి లేదన్నారు. అలా చేస్తే సీసీ పుటేజీల ఆధారంగా చర్యలు తీసుకోవచ్చని పోలీసులకు సూచించారు. జడ్చర్ల పీఎస్‌లో జరిగిన ఘటనపై సమగ్ర దర్యాప్తు చేపట్టి, నిందితులపై చట్టపరమైన చర్యలు తీసకోవాలని ఇప్పటికే ఎస్పీ, డీఐజీని కోరినట్లు తెలిపారు.

ఏపీ డిప్యూటీ సీఎం పవన్‌ వ్యాఖ్యలపై జడ్చర్ల ఎమ్మెల్యే అనిరుధ్‌రెడ్డి ధ్వజం

ఒంటరిగా ఓడి.. పొత్తుతో గెలిచావ్‌

మెగాస్టార్‌ చిరంజీవి తమ్ముడిగానే నీకు స్థానం

తెలంగాణ నరదిష్టి వ్యాఖ్యలపై క్షమాపణ చెప్పాలి